أفضل  مئة  مدونة

Saturday, September 29, 2007

الدبلتين والأسوره

الجوارى

النهارده سوق الخميس
سوق الجوارى والمعيز
محتاج معيز دى تمنها غالى وبالفلوس
محتاج بنات قرب وشوف
متنأيين مترصصين جوى الفانوس
أدعك و دوس طرف الفانوس
فتح المزاد
مين يشترى جاريه حلوه محجبه
بنت طويله مؤدبه
جسمها ملفوف حبتين
وحسنه سوده فى دقنها
يا جمال دلالهاو سحرها
حتى طل فى وشها
وأنزل بعينك من جبينها لتحتها
شوف ده وسطها
و ده قدها شوف نعومة جلدها
قرب و دوق كمان طعامة أكلها
ولا نضافة فرشها
هات دبلتين وأسوره
و طلع ميتين أهلها
أخبط وأرزع بالدماغ
وأديها مطــوه فى خدها
دى مش فى الضمان أن تنكسر
أرجع وعاين فى البضاعه
بس أحذر
ليك مــ الجوارى أربعه
هات دبلتين وأسوره
وأعمل سعادتك شهريار
وأحنا جوارى لــ خدمتك
وفــ أى وقت تزهق أو تمل
بسيـــطه
تقدر تغير عتبتك و كمان تبدل دبلتك
وأحنا البنات يدوب يدوب أساور فى كم و دراع حضرتك
يا خروووووووووووووف
مع الأعتذار لى سي السيد
والأخوه الوهابيين
وشعوب شبه الجزيره الرعويه
مااااااااااااااااء
===========
الأخوان يمتنعون
المدونه دى طاهره وهاتفضل طاهره
يا أم المطاهر رشى الملح سبع مرات
لووووووووووووووووووووووووول
كلنا ليلى كلنا ليلى
أنبى حد ينادى على ليلى من علــ القــهوه
عشان تتسحر











58 comments:

Esmat said...

الاميرة الامورة اوسه
عنك انا حجرى على القهوة انده ليلى
لا يا قمر ليلى لا يمكن تبقى جارية
وان كان فيه شوية منهم هن اللى رضوا لنفسهم يبقوا كده براحتهم فى الاخر بتعك على دماغهم
واللى ترفض تبقى كده عمرها ما حتبقى كده
بس والله يا اوسا انا بقى لى فترة بشوف الرجالة بقت ولا الست امينة
يعنى عندك الراجل السعودى اللى ساكن فوقنا مراته بتبهدله وكل يوم والتانى صوتها بيبقى عليه اد كده وهو بيصعب على ولا حس ولاخبر وعمرى ما سمعت منه رد
والمصرى اللى ساكن امامنا
ده كل كام شهر نسمع مدامته بتصرخ فيه
وبرده مش بسمع منه لا حس ولاخبر
تلاقيكى مش مصدقانى طيب وراس حسنى مبارك كده زى ما بقولك
اوعى تقولى لى انا بعمل ايه مع جوزى
لا مش حقولك
وتحياتى لكى

Lasto-adri *Blue* said...

يخرب عقلك يا اوسة
بتختفى فين يا بنت انتى المدة دى
البوست وقعنى م الضحك.... ومسا التماسى مسا التماسى يا ورد قاعد على الكراسى
:D

محمود علي said...


انا سمعت عن موضوع كلنا ليلي ده بس للاسف معرفتش هة ايه بالظبط

غالبا حاجه متعلقه بالمراة
اصل انتوا مبتتجمعوش الا علي
احم
الخير

المهم
البوست تحفه
فطسني من الضحك
واقعي بدرجه تحزن
بس زي ما في جوواري
في كمان عبيد

جبهة التهييس الشعبية said...

آه
وابطح كمان واديها علقة عشان
تدبح القطة وتعجب النسوان

ماحدش بيستعبد غير بمزاجه يا اوسا
فيه صنف من الحريم جرأ عليناالرجالة وخلوهم يفتكروا ان الست ما يعجبهاش غير اللي يشكمها ونازلين رغي ومش عايزين يتخرسوا ويبطلوا خراب في بيوتهم وبيوت غيرهم

أوشــــــه said...

يا دماغك يا أوسه...
زمان كانت الجواري بتتباع لأمراء وملوك وذوي شأن وبالغالي

ودلوقت بيبيعوا نفسهم رخيص لمافيش..

بس بجد البوست دمو خفيف

ايه موال كلنا ليلى ده؟؟

لماضة said...

هههههههه
عسل يا اوسه يخرب عقلك
بس فى ناس موافقه يا ستى تضرب على دماغها بس تيجى الدبلتين والاسوره
استرها معانا يارب
ده احنا ولايا

Alexandrian far away said...

ظريف الشعر قوي
كتابتك؟

bluestone said...

الله يخرب عقلك يا شيخة ..
فكرة جامدة جدا .. ضحكتيني الله يكرمك

هو بصراحة اي واحد بيفكر كده يبقى خاروف بجد .. لكن للأسف يا أوسة ما اكتر الخرفان في بلدنا ..
بس برضه اللي ترضى تبقى جارية
تستاهل ميت خروف ..
وكله بالميزان .. هو بيدفع ويشيل
وهي برضه بتشيل طول عمرها ..
بتشيل الطين ..

Desert cat said...

اه ده على اساس ان ليلى بقت خلاص بيعه وشروة
حاجه معروضة فى المزاد
هتتباع للى يدفع اكتر
طيب طالما هى من الاول رضيت بكدا يا اوختشى
لا فكرت فى اخلاق ولا دين ولا تربية وبصت للدبلتين والاسورة
ما تستاهل ان الخروف يديها على دماغها ودماغ اللى يتشدد لها كمان
هو حر مشتريها بفلوسه بقا

حسن مشالي said...

الصراحة انا لم اقرأ اجمل ولا اكثر دلاله فى السياق دا الا منك

شغلك عالى جدا ومدونتك استهوتنى
وسعدت بمعرفتها

تحياتى وتقديرى

Reemo said...

فى كتير جدا من ليلى بتقبل بالدبلتين والاسوره مقابل ان الخروف يديها فوق دماغها
وبعد ما تفرح بيهم وتزهق منهم يبدأالضرب على الدماغ يوجعها
فتجرى تشتكى وتبكى وتولول وتقول يفيد بايه الدبلتين والأسوره
وتفيد بايه يا ندم
البوست حلو جدا
تحياتى ليكى

He & She said...

ya ekhwanna Laila is not after el debleten wel eswera. Laila is after making a family, after promotion from a princess to a Queen, after having children to take care of her when she gets old and the kharoof dies, and that worth all her suffering. This is one point, the other point is that mosh kol kharoof 3ando oroon yenta7 beeha. Some kherfan are really ghalaba

شـــــهــــروزة said...

هههههههههههههههههه
هههههههههههههههه
آآة يا أما يا بطنى

يخرب بيت مخك وسنين الصنف اللى بتضربيه يا أسئوووس

الصورة تحفةةةةةةةة يا بنتى

ومين غيرك من ايام ليلى وحنفى يقدر يكتب كدة؟؟؟

وليلى رضيت بالدبلتين بس
وبرضة مش عاجبة سى حنفى

قطيشعة يختشى الحنفيات وسنينها

فى القلب said...

أوسه ايه الجمال و الدماغ العاليه دى

أنا مش عارفه و اللهى الواحد كان مسروع على الذل ده ليه و هيموت عليه
و مش لقيه تبرير منطقى داخل نفسى انى هموت و بنتى تتجوز بدرى
الظاهر أغلبنا بقى مدمن تعذيب
بصراحه مش عارفه ممكن تقوليلى انتى يا قمر

أحمد العربي said...

لم لأجد غير الضحك سبيلاً
هههههههههههههههههههههههههههههههههههههههههههههههههههههههههههههههههههه

Sampateek said...
This comment has been removed by the author.
Sampateek said...

هو حنفي عارف يتجوز واحدة لما يتجوز اتنين بلا وكسة
يا امي الرجالة مش عارفين يجيبوا دبلة فضة يغيروا العتبة ازاي !!!انت عارفة ايجار العتبة قانون جديد بكام النهاردة؟؟؟

الشريحة اللي بتشتري الجواري دي اليومين دول يتعدوا على الاصابع كلهم من تجار الخردة اللي عاملين ابونيه عند عم عبدة الاجزاخنجي علشان المقويات الزرقا و الذي منه
و الجواري اللي بترضى بكده قلة قليلة من ساقطين الكيك(القيد)و المتسربين من العلام و ساقطين الثانوية البعبع العامة

يعني الملخص هازوهي الحالة خاصة و ليست عامة
عايزة موضوع في الصميم
ارجعي لموضوع الحبس مش سمعت انهم حينزلوه على بطاقة التموين يبقى كل بلوجراوي ليه ازازتين زيت و سنة حبس و
\
\
\
\
صابونة


----
قبلاتشي

الأميره أوسه said...

عصمت
مصدقاكى بدل حلفتى بالغالى
بس مايمنعش أن فى حالات مختلفه
وبتصل للتعذيب
مش مصدقانى طيب وراس أل سعود
عندك عوض جارنا بيكتف مراته
من رجليها وهاتك يا ضرب
وهى أتعودت أو أدمنت
وتشوفيها فى الشارع مع جوزها
ولا كأنهم فى شهر العسل
وحالات كتير كده
بالمناسبه هو سي الأفندى بتاعك
حونين ولا شرس
قولى ماتخبيش
سلامى للكتكوت الصغير

الأميره أوسه said...

Lasto-adri *Blue
أنا هنا بس كنت بحضر للبوست ده
أنا البوست ده مكلفنى كتشير
مبروك النجاح
مفكرتيش تكملى دراسات عليا
دبلوم كده ولا حاجه
أهو كله بينفع
تشاو

الأميره أوسه said...

محموددددددددد
أحنا مش عاوزين جوارى ولا عبيد
أنا عن نفسى فى عربيه

الأميره أوسه said...

جبهة التهييس الشعبية
نواره حبيبتشى
أزيك وأزى القطط بتاعتك
فى ستات أتعودت على البهدله
فى مقابل مأوى ولقمه
او عشان العيال
أو عشان لو روحت بيت أبوها أحتمال هو كمان يضربها أو يذلها
النوعيه دى بتلاقى أسباب وكمان
بتشجع الرجاله يضربوا ستاتهم
عشان تلاقى ناس زيها
ويعملوا بارتى بقا كل راجل يجيب مراته ويدوها تلطيش
خرفااااان ومعيز

الأميره أوسه said...

أوشــــــه
أزيك
كلنا ليلى دى فكره تقريبآ
من بنات أفكار بنت مصريه و لست أدرى وأبتاف مفادها الدفاع عن بنات ونساء مصر وتوصيل صوتهن عاليآ
الحمله بدأت السنه اللى فاتت
ودى الذكره التانيه للصوات
يالهووووووووووووووووووى
صوتى معايا عشان صوتنا يوصل

الأميره أوسه said...

لماضة
أمين يارب
ده أحنا مش حــمــل قفا
بصى أحنا نروح نشيل حديد
وندرب دفاع عن النفس
ونطول ضوافرنا
وناكل مولــتو
بس بالفراوله عشان يجيب نتيجه

الأميره أوسه said...

Alexandrian far away

طبعآ أنا شاعره كبيره
وليه دواوين
أنت أنزل أى مكتبه وقول
عاوز ديوان حلة كشرى بالصلصه للأميره أوسه
ياااه
هايرحبوا بيك

الأميره أوسه said...

bluestone
أولآ قهوتك أيه
وعندك واحد بن سكر بره
وشيشه عجمى
حالات العنف المنزلى فى المناطق الشعبيه
كتير جدآ
فى مراكز الأسره وخلافه
الأرقام كبيره جدآ
وأنا عملت بحث سنة 1920 عن الموضوع ده
ونشرته فى جريدة الوقائع المصريه
الكلام ده لو تفتكرى كان أيام
الملك عتريس الأول
الله يطول فى عمره

الأميره أوسه said...

Desert cat
المشكله مش فى المعزه فى الظروف بتاعتها
هل هى مستقله ماديآ
هل من أسره خاليه من العنف
هل الخروف بتاعها خارج من بيئه مسالمه
ولا أتعرض للأغتصاب وهو خروف صغير
الموضوع كبير
محتاج فيش وتشبيه
يا قطه
مياووووووو

الأميره أوسه said...

حسن مشالي

ياكسوفى
ميرسى يا باشا
شرفنا فى أى وقت
صينية الكنافه كلها لــ حسن بيه

الأميره أوسه said...

Reemo
صح صح صح
فى بنات بتقول أخرج من بيت أبويا
وأنشألله يحصل أيه
على أساس ان الجواز ده أجمل حاجه فى الدنيا أو
أن أحتمال أيد جوزها فى الضرب تكون أحن شويه من أيدين أبوها وأخواتها
أهو شخص واحد يضرب أفضل من عائله بتلطش فيها
التار ولا عار

الأميره أوسه said...

He & She
الأم دورها كبير
وبرغم كده أحيانآ بتتعرض لعنف
من أولادها
أكيد فى خرفان غلابه عاوزه تعيش
وتاكل قرقيش
بس العنف أصبح متزايد فى المدن
أنت بقا مين
هو ولا هى
أعترف

الأميره أوسه said...

شـــــهــــروزة

الحنفيات كلها بتنقط
معاكيش جلده
بس واخده بالك أنا مطلعه ليلى مؤدبه
و نسمه ورقيقه
أحتمال بكره أقلب عليها
وأشهر بيها لو البنات مجوش سابوا تعليقات هنا
هو أنا كاتبه التعليق ده لأمى
ههههههه

الأميره أوسه said...

فى القلب

أنا أقولك الخلاصه
أولآ بنتك علميها وخليها تشتغل
وكمان تستقل ماديآ
وماتتنزلش عن شغلها حتى لو هو طلب منها
وعلميها أنها صوتها يكون عالى وقت الجد
والأهم من كده الأحترام
يعنى ميندهاش بأسمها
لازم يناديها بيا مدام أو أستاذه
وهى تقوله يا خروووف
أيوه هو كده بقا
مينفعش غير العين الفوشيا

الأميره أوسه said...

أحمد العربي

أنت ضحكتك جامده لدرجة أنها بوظت صفحة التعليقات حتى بص كده
ياريت لما تتجوز متضحكش كده فى وش مراتك عشان وشها ميعرضـــــش
ماشى وفداك الصفحه دى واللى بعدها
أهم حاجه أنك تنبسط
تشاو

الأميره أوسه said...

Comment deleted
This post has been removed by the author.

عارفاك وهاجيبك هاجيبك هنا
واحتمال أعذبك

الأميره أوسه said...

Sampateek
Sampateek
سمباتيك هنا يا ناااااس
صينية الكتافه وكوباية تمر هندى وسيجاره بسرعه يا ميشوووووووو
شرفتى يا سبماتيكو
صدقينى خرفان كتير بيجيبوا الدبل بس عشان يعيشوا وينفثوا عن رغباتهم
ولو وصلت للجواز بينتقموا
وفيه منهم سادى
متبصيش لسى الأفندى بتاعك
ده راجل محترم ومعاه شهاده
بصى لباقى مصر الناس
اللى مضايقه على طول و بيشموا كوله
وبيطلعوا همهم فى ستاتهم
متتأخريش عليا
أمواااااه
تقبلاتشى وتحرشاتى

بيجاسوس المصرى said...

ايوة جاى و عندك واحدة كابتشينو للمعلمة قصدى الاستاذة اوسة

هما فين الدبلتين اصلا بدوروا على حاجات غريبة انتوا والله
هههههههههههههههههههههة

ربنا ما يحرمنا منك يا أوسة

الأميره أوسه said...

بيجاسوس المصرى

وعندك كوباية خروب ومشط كبريت وسيجاره
أكيد مش أنت اللى أقصده
أنت شاب مثكف وعندك وعى وشقه صح
أنضم معانا للحمله
بس أدفع الف جنيه أشتراك
كله لعمل الخير

Esmat said...

العزيزة اوسا
تحياتى لكى عارفة يا اوسة انا متغاظة قوى من مرات جاركم عوض ده إزاى قابلة كده
حقيقى ما مرش على من اهل او من جيران او معارف نوعية من الرجالة اللى بتضرب ستاتها
خناقات كتير بتحصل لكن مد ايد ماشوفتش

وهى مدام عوض اللى حسسته ان الموضوع عادى علشان كده عمره ما حيبطل ضرب فيها لكن لو وقفته عند حده من الاول ومن اول ضربة منه كانت كسرته مناخيره -مكنش رفع ايده علها تانى- يبقى تستاهل اللى يحصل لها

انا والله جوزى حنيين قوى قوى بس احنا كنا زمايل واصدقاء قبل الجواز والله انا فى نعمة الحمد لله لان فيه تفاهم كبير بينا وبنخاف على مشاعر بعض و لما بنختلف على شىء بنتكلم فيه بهدوء لغاية ماحد يقنع التانى بوجهة نظره
الله يسلمك يارب يا اوسا
و تحية لكى
ا

الأميره أوسه said...

Esmat
أزيك
شوفتى أزاى قدرت أستفذك
عشان تجاوبى على السؤال
أنت عامله أيه مع جوزك
هههههههههههههههه
اللهم لا حسد واضح أنه أنسان محترم
وكمان هيمان بيكى
أشطه يا عم
بس صدقينى أنا كنت ساكنه فى منطقه شعبيه قبل كده
وشوفت حالات غريبه
يصل ألامر فيها للتعذيب باستخدام سكينه وخلافه
والمهم بعد كده جوزها يسحبها على غرفة نومه ليمارس حقوقه
كأنه متجوز بقره
و فى ستات بتستلذ بالضرب والصلح
أدمنوا الضرب
هو التغيير حلو بس مش بالضرب
ممكن بالشتيمه
هههههههههههه
أنتى حبيبتشى

Esmat said...

اوسا العزيزة
صباح الفل وانا بمر بالصدفى على مدونة فرندز قريت الكفن الابيض صعبة قوى يا اوسا يااااه احساس وحش حسيته
يا ترى لسه فيه بنات بتجبر على الجواز من رجالة مش طيقاها طيب ازاى دا الواحد بيبقى صعب يتعامل مع زميل غلس ولا جارة تقيلة فيبقى ازاى واحدة تدخل فى علاقة حميمية مع واحد مش بتطيقه الموت اهون
اكيد الدنيا مليانة حالات صعبة كتير بس دى اصعب حاجة ممكن يمر بيها حد
وتحياتى لكل ما تكتبه

زوجه مفروسه said...

ههههههههههههه
ايه العسل ده
وايه الكلام الجميل ده..
أنا على كده رجلي هتاخد على المدونه...
سلام يا قمر

الأميره أوسه said...

Esmat
صباح الخير
عصمت القصه اللى قريتيها
دى حقيقيه شفتها بنفسى وأنا فى أعدادى
وفى تفاصيل حصلت بس قاسيه جدآ
من ناحية الزواج بالأكراه ده موجود
وبيع البنات للى يدفع موجود
الأحياء الفقيره والشعبيه والأرياف فيها كتير
عندك فى قريه سمعت عنها بينزلوها
السعوديين عشان يختاروا بنت صغيره يتجوزوها مقابل مبلغ
الدنيا فى كتير
ربنا يحفظك

الأميره أوسه said...

زوجه مفروسه
يا حبيبتى أنتى تنورينى
فى أى وقت
المدونه وصاحبتها تحت امرك

Epitaph said...

loooooooooooooooool!

welcome back ya AOSSA bgad :D

بنت القمر said...

ايه الازعاج دا بقا وبعدين ماله الحاج متولي ما هو راجل فولا قولا لالا
مجوز اربعه وده مش اختراع رعوي وهابي دا بتاع الفلفزيون المصري وتاليه الحاج سلطان الغرام يابنتي دا تحفه ويشحتف النسوان وراة رغم انه مش لاقي ياكل وطله ابنه من التعليم
وليه عشان الغرام ليه سلطان
بس لو يسيبو الغرام والحب في حلهم عشان بهدلوا امهم
وبعدين ليلي مش فاضيه تتسحر ليلي لسه ما مسحتش المطبخ ولا كوت قمصان المدرسه ولسه ها تعلق علي الشاي
ههههههههههه
تنام خفيف احسن
هههههههههه تحياتي

Esmat said...

وحشتينى يا اوسا
شوفت الرد دلوقتى واتغظت اكتر
اقول ايه
الهى يولع فى كل حد يبيع لحمه
ربنا ينتقم من كل راجل او ست بتاجروا فى بناتهم - يا رب تقبل منى
و ربنا يقوى البنات اللى بيحصل فيهم كده
يعنى جبوهم الدنيا علشان يعذبوهم
ربنا يولع فيهم بجاز
امين

logarithms said...

اضحكتني كثيرا تلك التدوينة :D
ومعك الحق في ان هناك من الملقبين بالرجال من يريد ذلك وهناك من الاناث من ترتضي بهذا الذل ايضا
ولكنها ستكون علاقة بين خادمة وسيدها وليس زوج و زوجة !

muslim masri said...

اسمحيلي من غير تهزيء والله هو حضرتك معقدة من الرجالة. معاكي فيه رجالة نازلة تلطيش في مراتاتها قوة وافترى. لكن برضه فيه نسوان مستعبدة رجالتها يشتغلوا بره زي الحمير ويتبهدلوا جوا. بس بلاش على طول تقطيع في الرجالة يا ست أوسة. والله كتير منهم غلابة. وبعدين هم انتو يا ستات ما بتشبعوش مكاسب. يعني في الشغل أنا يطلع روحي في الشغل وزميلاتنا اللي عندها ساعة رضاعة واللي تعبانة وطبعا كل الزميلات ما يشتغلوش زينا عشان هم الجنس اللطيف. وطبعا في العطلات والأجازات أحنا اللي نشتغل ويطلع روحنا. وساعة الجواز يجي أهاليكو يطلعوا روحنا وأحنا يا حرام غلابة. يا بنتي والله العظيم ولا ليكي علي يمين أنا تملي في الشغل بقول أنا بأطالب بمساواة الرجل بالمرأة لان المرأة دلوقتي واخدة حقها أكتر من الرجالة. وبعدين حضرتك معترضة على تعدد الزواج ليه. هاتعترضي على شرع ربنا كمان. يعني الواحد مراته تبقى أميرة متوجة أيام الخطوبة وبعد الجواز تبقى منكوشة وريحتها أعوذ بالله والراجل بدل ما ينحرف يروح يتجوز واحدة تانية إيه المشكلة. يا ستي دا لما جوزك يتجوز عليكي يخف من عليكي التعب شوية. وبعدين فيه أزمة جواز زي ما أنتي عارفة لازم ما تبقيش انانية. يعني خلي عندك شوية إيثار ونقى لجوزك زوجة تانية أهو منها ترحميه شوية منك (لا مؤاخذة) ومنها برضه تساهمي في حل مشكلة العنوسة. أوعي تزعلي. كل سنة وانتي طيبة وتقبل الله منا ومنكي الصيام والقيام.

الأميره أوسه said...

Epitaph
أنا هنا من زمان
مش كنت عندك قريب
أمواه

الأميره أوسه said...

بنت القمر
ليلى قررت متعملش حاجه فى البيت
اللى عاوز حاجه يروح يعملها
هى دلوقت بتشرب شيشه على القهوه
وبعد كده عندها ماتش كوره
ليلى خلاص فاقت
loooooooooooooooool!
على رأى أبيتاف

الأميره أوسه said...

logarithms

لا خلاص مش تقلقى
انا ورا الستات لما يقتلوا أزواجهم
بلا رجاله بقا

الأميره أوسه said...

muslim masri

أيه يا عم أنت قفشت ليه
ده بوست كوميدى
هو أحنا لينا غيركم
ليك عليه أكتب بوست
أشلفط فيه ليلى
خاصة اللى بتدلع فى شغلها
واللى بتعتمد على جمالها بدل عقلها
كل سنه وأنت طيب
هات العديه
عشره جنيه

muslim masri said...

شكرا جزيلا على ردك بصراحة أحرجتيني. بخصوص العيدية مش عارف أديهالك ازاي.هاديلك بدلها دعوة وأنا صايم. روحي ربنا يكتر بتوستاتك ويبارك في زوارك ويجعلك من المدونين المقبولين اللي من الأمن محفوظين.آمين

Soooo said...

طب اقولك حاجه .. امبارح واول امبارح عمال اتكلم مع بنتين اعرفهم سنهم واحده 23 سنه والتانيه 25 سنه والاتنين متقدملهم رجاله متجوزين اللي متجوز واحده واللي متجوز اتنين ومع ذلك اللي غايظني انهم بيفكرو بجديه انهم يتجوزوهم
وغلبت معاهم يابنتي ماينفعش
انتي مش كبيره قوي
ازاي تقبلي ان جوزك يبقى ماشركك في واحده ولا اتنين غيرك
الاقيهم بيقولولي لأ . اصله قاللي بيحبني
قولي انتي بقى

الأميره أوسه said...

muslim masri

أمين يارب
دعوه حلوه
ربنا يكرمك ويحقق أمانيك

الأميره أوسه said...

Soooo

أعذريهم
لما نكون عايشين فى مجتمع زى مجتمعنا
بيبص للبنت من زوايا محدده
وأنها ضرورى تتجوز ولو محصلش يبقى هى أنسانه مش كامله
ويبص للراجل على أنه مجرد شوية فلوس وأمكانيات
مجتمعنا مجتمع قاسى جدآ
الشعب كله متبهدل وكان بيبهدل بعضه
يعنى اللى تتجوز راجل متجوز
دى بتبهدل فى أنسانه تانيه
وبكره يجى يوم عليها هى كمان وتتبهدل
أنصحيهم بالرفض

Soooo said...

الأميرة أوسه
خدامك سوووو .. وعلى رأي حمزه ابن اخويا لما بندلعه ونقوللو ياختي كميله .. يقوم باصص لينا وقايل
i'm a BOY
وبكده اكون وضحتلك نقطة في غاية الاهميه .. اللي هي اني راجل ملو وهدومه .. ومع ذلك بعترض على مبدأ ان الواحد يتجوز اكتر من واحده ولو على سبيل الشراء
وبيني وبينك .. الواحد مش عارف يتجوز مره واحده بالرغم من ان الحالة الماديه كويسه والحمدلله .. يقوم يتجوز اكتر من واحده؟؟؟
سيبك انتي ... نورتي البلوج بتاعي .. والحمد لله قريت تعليقك بعد ما المغرب أذن .. عشان اعرف اضحك براحتي

سلام يا الذ واظرف أوسه

Bacteria said...

mawdo3 gamed a5r 7aga
hayla ya bnt
bas a2olek 7aga soghyra keda 3ala el mashy
ana wa7da sabty bet2oly ana a7b el atgwzo ykon sha5sito kawia gedan we ydeny bel gazma 3alashan a7ebo :/
we lama ba2olohom ya gama3a el ragl zay el set maynf3sh enak tegii le bentak te2olaha mat3mlesh we mat5rogesh we mattklmesh ma3 da wel sa3a 9 tekoni fel beet
we mafesh safr
we mafesh we mafesh we enta sayb ebnak say3 ma3 banat masr kolaha
mays7sh 7ata
shaklak eh odam bentak
teftkr momkn te7termak
ma azonsh
3alashan keda e7na ma3ndnash 7aga esmaha kodwa fe masr
el 3ial shayfeen ahalehom be2olo 7aga we y3mlo 7aga we byfr2o fel mo3amla
we el anyl en mafesh wasat
ya3ni momkn tela2y wa7ed sayb bento say3a bardo we far7an beha keda
matl2esh nas mo3tadela abdan fel tarbia
ya ytl3o 3enen el banat ya ysbolhom el 7anl 3al gharb
el mohm en mo3zam el banat aw el setat el 5at ra2yohom fel mawdo3 da shayfeen en el ragl lazm ys2al we y3mlek ta72e2 abl ma tero7y 7etta
we yfrd ra2yo we 7agat keda
law dalt 3ala 7aga be tadaol 3ala enhom lesa 3yshen zaman ayam amenah wel e7telal
wel salam 5etam

arabcooL said...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول

أفضل  ألف  مدونة