أفضل  مئة  مدونة

Sunday, November 04, 2007

نـــــب بــحـــتى



حـــــصة تاريخ هل ينجح أحد


مع نهاية الأسرة الثانية عشر والدوله الوسطى تبين أن هناك من يتربص بمصروذلك للأستفاده من خيراتها والأستيلاء عليهاأنهم قبائل حقاو - خاوست التى تسكن وسط أسيا والتى دأبت على الأغاره على الدول الآخرى فى جماعات غير منظمه تجيد الكر والفر وتمتلك أسلحه عملوا على تطويرها فصنعوا من الحديد أسلحة وعجلات حربيه تعد الأكثر تطورآ فى هذا الوقت لقد أمتلكوا القوه والخبره العسكريه التى ساعدتهم على أجتياح الكثير من البلدان فأجتاحوا أسيآ حتى وصلوا على مقربه من مصر فأغاروا عليها من الناحيه الشرقيه وتمكنوا بالفعل من السيطره على البلاد حيث بدأت مرحله جديده من تاريخ مصر فى ظل
الأحتلال وهى مرحلة الأنتقال الثانى أو الأنهيار الثانى والتى استمرت فى الفتره من الأسره الثالثة عشر وحتى الأسره السابعة عشره حيث ناضل المصريين من أجل أستيعادة حريتهم وأراضيهم لقد أغار الهكسوس على مصر فى عصور لم يعرف المصريين فيها الحديد بل كانت أسلحتهم بسيطه مصنوعه من خام النحاس الذى يستخرجونه من سيناء لم تكن لديهم الآت حربيه بل كان جل أهتمامهم هو الأهتمام بالزراعه والفن والأدب حيث بدأو فى تطوير اللغه وظهرت نصوص أدبيه كقصص سنوهى والملاح الناجى من الغرق و الفلاح الفصيح_ لم يكونوا فى حالة أستعداد لأى حرب خارجيه ورغم ذلك قام أمراء طيبه بمحاولات لتحرير مصر وبدأو فى صناعة الأسلحه والعجلات الحربيه وقد ناضل حكام الصعيد من أجل تحرير البلاد فأرسلو الحملات لتطهير الوطن وكان أخرهم الملك أحمس محرر مصر من الغزاه وطارد الهكسوس وهو أول ملوك الأسره الثامنه و قام أحمس الأول ( نب بحتى )، بقيادة جيشه بإتجاه الشمال لمواجهة الهكسوس،
وطردهم خارج البلاد، ثم تبعهم حتى شاروهين في فلسطين. ثم بدأ في إرسال حملات
عسكرية لتأمين حدود مصر لقد أستفاد المصريين من الدرس القاسى فأتبعــوا سياسة
الهجوم وأنطلقوا خارج حدودهم لتأمينها ضد أى غزو خارجى وبدأت مرحلة الأمبراطوريه
المصريه والدخول الى مرحلة الأذدهاروالرخاء هكذا حول المصريين الهزيمة الى نصر بالأستفاده من الدروس التى تعلموها على أيدى قبائل الهكسوس بالطبع الجميع يعرف تلك القصة الرائعه المنقوشه على اللوحات الجداريه لكن أى الدروس المستفاده لنا نحن المصريين اليوم وبعد مرور الآف السنين تغيرت الظروف لكن ابدآ لن تتغير طبيعة الأنسان فهناك من يتربص بنا داخليآ وخارجيآ ونحن نعلم ماهية العدو وتفكيره وأمكانياته فهل يأتى يوم نكون نحن أنفسنا كما كنا قديمآ ويخرج من بيننا أحمس جديد يعشق تراب مصر ونهرها يخرج علينا قائد مصرى مغوار باسل لم تصبه لعنة الخضوع ولم يكترث للعبة الأستسلام يشق ظلام الليل بسيفه اللامع الا من أحمس آخر يامصرأم سنتحول جميعآ لشم الكوله وأكل شندوشتات مربى بالأشطه والنوم تحت الكبارى على رأى محمد سعد
عزيزى عزيزتى لا داعى للأستسلام لقد عرفت مصر عصور أنهيار أينعم مش زى اليومين دول بس برضه لازم يكون عندنا أمل ونحاول نستفيد ولو على مستوى شخصى وبلاش نقول أهو كله برتقال ودعواتكم معايا للسيد الدكتور حاسى هواز اللى جاب عليها واطيها وشكله ناوى يحنطنا ويبعتنا فى توابيت لللخارج ألــ عشان يتفرجوا علينا وده موضوع تانى أنشألله نتكلم فيه قريب
المصادر
رسالة الدكتوراه المقدمه من الأميره أوسا
حول علاقة الأنسان بالبطيخ
رائدة علم المصريات والآثار
كتابات مهيسه حول حاسى هواز
مع تحيات أتحاد الحوارتجيه مع حركة أفحت وجبهة التهييس الشعبيه

Wednesday, October 31, 2007

النظافه حلوه

Sunday, October 28, 2007

Friday, October 19, 2007

نقاب بالإسكوتش

Thursday, October 18, 2007

الأخوان قادمون


أحلق دقنك يا عم شكشك
أنه أمر يتكرر حدوثه معى وهوحدوث مشادات حامية مع أحد مدعي التدين ذوى اللحيات المزيفه والوجوه العابسه المتجهمه والصوت الأجش والملامح الغليظه والأسلوب الهمجى فى التعامل مع الناس ودائمآ معاركى على ارض الواقع مع شيوخ الفكر الوهابى وشيوخ التكفير أما شيوخ التدوين الذبن يختبؤن خلف شاشات الكمبيوتر ليكفروا من يختلف معهم بل ويسبونه فلا شأن لى بهم لأنهم أقل ما يقال عنهم أنهم منافقين وجبناء يتخذوا من شاشات الكمبيوتر ستار يقذفون من خلفه الآخرين بأشد العبارات غلظه وساديه
الحادثه قبل الأخيره كانت فى أحد المحال التى تبيع لوازم كهربيه والتى يملكها أصحاب اللحيات العثه وما حدث انى سألت عن ثمن شىء فأجابنى أحد العمال بأنه سعره عشرين جنيه أخرجت النقود فأذا بالشيخ يرد بعصبيه لأ لأ ده بخمس وعشرين جنيه دفعت المبلغ و أستلمت المشترك الكهربائى و وجدت السعر مكتوب عليه وهو عشرين فقط فسألت الشيخ أنت ليه أحتديت كده و كمان كاتب سعر وبتبيع بسعر آخر مش دى مغالطه
الشيخ أنا حر وبعدين دى مرابـحه عاجبك خديه مش عاجبك خلاص أوووف
أنا أنت ليه بتكلمنى كده يا عم الشيخ
الشيخ عشان بتقولى أنى بابيع بسعرين ودى حريه شخصيه وبعدين هاتى مرايه وبصى فيها
أنا مراية أيه ... أيه علاقة المرايه بالسعر أنت بتقول أى كلام
الشيخ هاتشترى ولا لأ أنا مش فاضيلك
هنا والدماء غليت فى نفوخى و فرجت عليه المنطقه تمـآ وكدت أن أشده من لحيته لولى قرفى منها... ميتين أبو الغباء وطبعآ عم الشيخ شكشك أكتشف أنى ممكن أتخانق وأبهدله فخرج من المحل فى أتجاه المسجد ولما سألت أحد الموجودين هو راح فين رد عليا ده رايح يصلى بالناس
النهارده بقا لسوء الحظ رحت أشترى لوازم من محل فتح جديد لقيت البائع وهو ملتحى أيضآ بيرص أيس كريم فى الديب فريزر وقفت فى أنتظار أن ينتهى فى أدب الى أن أنتهى بسلامته ثم وجدته ينظر لى شذرآ ويقول أنتى واقفه كده ليييييييه
أنا مستنياك تخلص يا عم الشيخ
الشيخ أنتى مالك نادينى وقولى عاوزه أيه حاجه تنرفز
أنا ليه كده يا شكشك ده أنا قولت أصبر عليك تقوم تتكلم بالأسلوب ده
شكشك أنا كده
أنا طيب دقنك دى عيره مش مفترض أنك تكون حليم عفيف اللسان ولا دى علامه تجاريه
شكشك دقنى دى لربنا
أنا ولا أنت مربيها نظام أكل عيش طبعآ مسكتش وناس جيرانه وصلوا على صوت المعركه وشخص منهم قاله مش كده يا شيخ كل شويه خناقه هى الناس شغاله عندك كلمه من هنا وأخرى من هناك أشتبك مع أصحاب المحلات المجاورة تركته وأنا مندهشه من هؤلاء الشيوخ أصحاب اللحى وسألت نفسى ماذا لو حكم هؤلاء مصر بفكرهم الجامد و مشاعرهم المتحجره و ما سر أنتشار محلات يملكها ذوى اللحيه فى منطقتى ومن يمولها وما سبب ترديد طلاب المدارس التى حول منزلى لنشيد الأخوان بدلآ من النشيد الوطنى هل أصبحنا خاضعين للفكر الوهابى المتشدد وتناسينا وجود أطفال مصريين من ديانه آخرى فى صفوف الطلبه ليسوا مضطرين لترديد شعارات أسلامويه هل أصبحنا نفرض عليهم ما ينطقونه حتى فى نشيد الصباح وما السر فى أنتشار النقاب فى الحى الذى أسكنه وماذا بعد هل نحن مقبلون على مرحلة ترفع شعار الأخوان قادمون

Monday, October 08, 2007

وتدور الدوائر

واااااااااااااااااء
الصدفه اليوم أخدتنى الى مدونة العلمانيين الكويتيه أطشــيعه
قولت أدخل أشوف أيه أخبار الشكيكه الكويت
الموضوع كان عن الحريات ماشى نشوف بيقولوا أيه الأشكاء العرب لقيت فى تحديث للموضوع عن أنتهاكات يتعرض لها أبناء الكويت الموجودين
فى الاردن الشكيك برضه بغرض التعليم بصراحه الدمعه فرت من عينى وبكيت من قلبى خاصة من البطين الأيسر اللى بيموووت فى العرب
خاصة أهل الكويت من فضلكوا أطلعوا على الشكوى
وياريت كل واحد يحضر عبوة مناديل كلينكس
الشكوى لغير الله مذله
شبابنا يساق مرغما من قبل التعليم العالي وباوامر عليا للدراسة بالاردن .. ويتحملون الذل والمهانة والتضييق من قبل زلمات الأردن .. يضربون ويهانون وتسرق سياراتهم وممتلكاتهم .. والحكومة الجبانة تضع رأسها النتن بالرمال .. وحين يتدخل رئيس برلمانهم بما لايعنيه .. يتفلسف وينظر وهو يمثل دوله تقتات على الصدقات واكراميات اعمالها القذرة بين سياسي دول المنطقة .. مدخلا انفه النتن في شؤونا لدرجه تقديمه اقتراحا يدعو لإخصاء ديمقراطيتنا العرجاء .. لم تكتفي حكومتنا الهبلة بالسكوت على تجاوزاته وانما اعتقلت ابنها الذي تصدى له !! سحقا لكم ولذلكم وجبنكم .. ولنا ان سكتنا على ماتفعلون

أيه رأيكوا بقا علمايين علمانيين يعنى والسطور بتقطر دمآ وشجب وأستنكار وتطاول على الأردن وصوت كله تعالي وفشخره

وأنا بقرأ السطور الدسمه دى أفتكرت ماحدث للأخوه المصريين فى الكويت منذ شهور على أيدى شرطة الكويت من تعذيب وأهانه - بالأضافه الى المعامله الغير أدميه التى يتعرض لها المصريين فى كلا البلدين منذ سنوات ولسان حال المصريين هناك يقول مرضيناش بالمر لقينا اللى أمر منه وكل ذنبهم أنهم بيدوروا على لقمة عيش مش رايحين ولا مؤخذه يتعلموا هناك حيث جهابذ العلماء وأفضل الجامعات أو رايحين يتسلوا ويبرطعوا هناك ويدوسوا فــوق كرامة الناس تذكرت مايفعله الطلبه والطالبات الكويتين فى العام الدراسى داخل جامعات مصر وفضائحهم فى جامعات سته أكتوبر وأحيائها وأستهتارهم بحياة البشر وهم يقودون سياراتهم الفارهة وسبهم للمصريين فى كل لحظه والتعامل معهم على أنهم درجة تالته وحوادثهم لا تنتهى _نظرة دونيه تملاء عيون الكوايته تجاه المصريين سواء داخل أو خارج مصر و كرامة المصرى غير مصونه سواء هنا أم هناك سواء ضيف أو صاحب بيت فى الصيف يحضر الكويته لقضاء شهور الصيف فى مصر التى يعتبرونها مرتع كل ماعليهم هو ضرب جواز السفر الكويتى فى سراويلهم للتهديد به عند اللزوم فى وجه أى مصرى وليس للمصرى أن يشتكى سواء فى مصر أو الكويت لأنه فى الغالب ليس له حق أمام بائعى النفط ناهيك عن تعاملهم مع المصريات ومعاكسة فتياتنا وأستغلال فقر البعض و الحديث عن مصر كما لوكانت ماخور كبير مع أن اللى بيته من الزجاج يسكت ويحط لسانه جوه قفاه ولو أردنا التطاول بالمثل لكتبنا الآف التدوينات ولكننا أفضل من ذلك لقد أستكتروا علينا رفضنا لتعذيب المصريين فى بلدهم بل تمادوا وتطاولوا علينا وعلى رأسهم الصحافة الكويتيه التى لم تزل تحبو وترتدى الكادليز وبكل أسف يخرج علينا من يحدثنا عن قوة العلاقات بين البلدين وأن حق كل مصرى فى الكويت محفوظ محفوظ محفوظ ورغم الحمله الشرسه ضدنا و تحول معاملة المصريين فى الكويت من أســوء الى أســوء بالرغم من ذلك ماذلنا نتعامل نحن كمواطنين مع العرب فى مصر بمنتهى الكرم المصرى الذى يصل الى حد العبط ليس بدعوه أننا أشقاء أو تحت شعار الوطن العربى بل لأننا فقط أفضل فلانرد الأسأه بالأسأه بل نحن على أستعداد للتضحيه بدماء شبابنا الغاليه من أجل من لا يستحق ومن أجل من يرمينا بالباطل ومن يزايد علينا وينسى من هم المصريين ولكن أذ هم تناسوا فذاكرة التاريخ ستذكرهم ولو بعد حين وفى النهايه أقولها من مكانى هذا الى أهــــــل الكويت وغيرهـــم ( ماطار طير وأرتــــفع الأ فى برميل بترول وقع )

الأميره أوسه

ناصرية الهوى


Saturday, September 29, 2007

الدبلتين والأسوره

الجوارى

النهارده سوق الخميس
سوق الجوارى والمعيز
محتاج معيز دى تمنها غالى وبالفلوس
محتاج بنات قرب وشوف
متنأيين مترصصين جوى الفانوس
أدعك و دوس طرف الفانوس
فتح المزاد
مين يشترى جاريه حلوه محجبه
بنت طويله مؤدبه
جسمها ملفوف حبتين
وحسنه سوده فى دقنها
يا جمال دلالهاو سحرها
حتى طل فى وشها
وأنزل بعينك من جبينها لتحتها
شوف ده وسطها
و ده قدها شوف نعومة جلدها
قرب و دوق كمان طعامة أكلها
ولا نضافة فرشها
هات دبلتين وأسوره
و طلع ميتين أهلها
أخبط وأرزع بالدماغ
وأديها مطــوه فى خدها
دى مش فى الضمان أن تنكسر
أرجع وعاين فى البضاعه
بس أحذر
ليك مــ الجوارى أربعه
هات دبلتين وأسوره
وأعمل سعادتك شهريار
وأحنا جوارى لــ خدمتك
وفــ أى وقت تزهق أو تمل
بسيـــطه
تقدر تغير عتبتك و كمان تبدل دبلتك
وأحنا البنات يدوب يدوب أساور فى كم و دراع حضرتك
يا خروووووووووووووف
مع الأعتذار لى سي السيد
والأخوه الوهابيين
وشعوب شبه الجزيره الرعويه
مااااااااااااااااء
===========
الأخوان يمتنعون
المدونه دى طاهره وهاتفضل طاهره
يا أم المطاهر رشى الملح سبع مرات
لووووووووووووووووووووووووول
كلنا ليلى كلنا ليلى
أنبى حد ينادى على ليلى من علــ القــهوه
عشان تتسحر











Friday, September 28, 2007

اليوم ذكري وفاة الزعيم وكذلك الكرامه

ارفع رأسك يا أخي فقد مضي عهد الذل والاستعباد

بعد أن أعتاد الشعب المصرى أن يرفع رأسه فى حياتك وحتى رغمآ عن النكسه

الشعب الأن أيها الزعيم يرفع شعار طاطى دماغك يا أخى فقد مضى عهد الحريه والكرامه

نحن الآن تهدر كرامتنا أيها الزعيم داخـــل مصر وخارجها لعلك تتعجب ولك الحق فى ذلك

فمن كان يستطيع أن يهــــين مصريآ فى الدول العربـــــيه فى عـــهدك

لقد كنت زعيمآ رغم أنف المتشكــكين ورغم أنف الحاقدين

عار على كل من خانك وخدعك فى عصرك

وعار على كل من يقلل من شأنك الآن

فقط أنت زعيم فى قلبى

رحمك الله

الأميره أوسه ناصرية الهوى


Friday, September 21, 2007

طااااطى طاااااطى طاااااااااااطى

أبويااااااا


المشهد ده رغم حدوثه من شهر لكنه دائمآ مايقفز أمامى ويلاحقنى وكلما حاولت نسيانه كلما عاد ليزعجنى بتفاصيله المؤلمه
مكان الحدث شارع الهرم بالتحديد أمام أحد معارض البرديات والذهب الذى يزوره السياح يوميآ لشراء هدايا تذكاريه
الزمان يوم جمعه وأثناء خروج المصلين من صلاة الجمعه و مرورهم على نفس الرصيف الذى تراصت بجواره خمس أتوبيسات سياحيه فى أنتظار أشاره من مشرفى شركة السياحه للنزول لزيارة الجاليرى وفى نفس التوقيت على الجهه المقابله يتوقف ميكروباس فجأه من نوع الفلوكس
ثم يلحق بيه ميكروباس أخر ليتوقف معترضآ طريق الأول واضح أنها كانت مطارده وأنتهت فى تلك البقعه فى لمح البصر نزل كل سائق مسرعآ للأنقضاض على السائق الآخر مدججان بقطع حديديه وهاتك ياضرب والركاب طبعآ لأستكمال المشهد نزلوا من الميكروبسات وأديها
صويت وصراخ اللى جرى يمين واللى راح شمال والأجانب بتتفرج من نوافذ الأتوبيسات السياحيه وأنطباعات متعدده بتوضح أن الموضوع مش ساسبنس بالنسبه ليهم وأنهم واخدين فى بلادهم على كده

واحد منهم بولندى واقف بيتفرج وهو بيصرخ بوليس بوليس وفجأه وكأن أبواب السما كانت سمعاه توقفت سيارة دوريه بيضاء قاطعه الطريق على الميكروباست بطريقة هوليوديه وفيها ثلاثه من أمناء الشرطه لابسين أبيض وكل امين منهم طول بعرض طبعآ الأجانب أطمنوا وبدأت تصقف للشرطه و أنتابتهم حاله من الحماسه وأنا بدأت أغنى أغنية أولاد بلادنا أولاد بلادنا للمطرب العظيم شكوكو
طبعآ ثوانى وصوت التصفيق توقف وتم أستبداله بنظرة ذهول وأستنكار
الساده أمناء الشرطه نزلوا ضرب على السائقين بدأو البدايه الطبيعيه وهى أصطياد قفاهم تلى ذلك شلاليط من تحت لفوق مع شتيمه نقاوه من اللى وصى عليها السيد حنفى بلطجه
طبعآ المشهد فزززززززززززززززيع صعب وصفه فى بعض السطور
الأجانب بتتفرج والأخوه المصلين توقفوا لمتابعة فاعليات التعذيب بأهتمام بالغ مما أثر على سيولة المرور
فى شارع الهرم فتوقف الطريق من الجانبين سؤال لكل قارىء هل توقف الموضوع عند ذلك
أبدآ بكل أسف بدأت أحداث أكثر ألمآ
أثناء علقة الموت كان واقف أخر راكب وهو عباره عن راجل غلبان حاضن أبنه تقريبآ عنده أربع سنين و فى أنتظار أنتهاء الخناقه لركوب الميكروباااااز مجدآآ ليه طبعآ عشان دافع أجره و ممكن مايكونش معاه فلوس
مع سيل الضرب اللى شغال ومحاولة السواقين التملص من الضرب أختبأ أحدهما خلف الراجل الغلبان تقريبآ الراجل الغلبان أعترض كأى مواطن مصرى شجيع وقال ممممممممعلهــــش والنـــبى يا باشا
الأمين أستجاب لنداء الغريزه وبدأ فى ضرب الراجل الغلبان بينما الراجل يحاول ألتقاط أكبر عدد ممكن من الصفعات والركلات لكى يحمى أبنه الصغير مما أعتبره الأمين أهانه فقرر أصطحابه الى سيارة الدوريه
فى مشهد غايه فى الساديه الأمين يسحب الراجل الى داخل السياره والطفل يصرخ ويحاول التعلق بوالده حتى نجح الأب فى أحتضان طفله تحت وابل من الضرب البشع وركب السياره فقام أمين أخر بشد الطفل بقسوه
وأخراجه بالقوه وسط دموع أبوه وتوسله بعدم ترك أبنه فى الشارع وحيد
أمين الشرطه بيصرخ فى الطفل أبن السنوات الأربع تعررررررررررررررررف ترروح ياض
طيب أقف هنا مكانك لحد منرجع أبوك
الطفل يخالف الأوامر ويجرى فى أتجاه سيارة نقل الموتى أقصد الدوريه وينادى أبوياااااااا فيعاود الأمين الكره ببساله كما لو كان فى حربه المقدسه فى شد الطفل وحمله وألقاءه بجوار الحائط
ردود الأفعال
أنا واقفه فى حالة خرس وخوف على الطفل و جسمى كله بيترعش من الغضب لكن مش بتحرك الشعب اللى لسه خارج من مسجد الصباح واقف يمصمص فى شفايفه ومعظمهم بيضرب كف على كف أحتمال الأرض تتشق و تطلع من جوفها تنين بيطلع نار من بقه يساعد الطفل وأبوه
الأجانب فى حالة غضب ودهشه وأستنكار بس مش النوع المحلى عدد كبير مخرج أيده من الأتوبيسات وبيشاور بطريقه أستنكاريه رافضه
العربيات اللى واقفه فى الزحمه بسبب الأختناق المرورى بيتابعوا الحدث وهم فى أنتظار أنفراجه فى
السيوله المروريه والطفل لسه بيصرخ أبويااااااااااااااااااااااااااااااااا
راجل لابس بدله شيك يوطى على ألأمناء يقولهم حاجه طبعآ مش سمعاها لأنى فى الجهه المقابله يقوم الأمين بأنزال المواطن الغلبان و ركوب سيارة الدوريه مع زمايله مع سرينه عاليه لأفساح الطريق
المواطن بيحضن أبنه ويشيله ويمشى فى طريقه

الشعب يتفرق وتعود السيوله المروريه
والسياح فى حالة ذهول وأنا وشى فى الأرض
الموقف ده لم يتعدى بضعة دقائق قليله لكنه كفيل بأظهار حقيقة أمرى أنا وكثيرين
أكتشفت أن الخوف والجبن والتردد و الأنبطاح ليست مشاعر أو ردود أفعال بقدر ماهى صفات جينيه نتوارثها جيل بعد جيل ونهديها لأطفالنا من بعدنا

لو حد ضربك يا حماده قوله الله يسامحك
الشتيمه مش بتلزق والضرب كمان
وأذا ضربوك على خدك اليمين ناولهم الشمال بمحبه وأن مكفاش متبخلش بقفاك حبه
وأن ذاد عليك الضرب تعمل أيه

طاطى

طاطى

Thursday, September 13, 2007

مهـــرجان الســــجن للجمــــيع


بدأت فاعليات مهرجان السجن للجميع بسجن أربع من رموز الصحافه المستقله الحره فى مصر بعد صدور تقرير من قبل المجلس الأعلى للصحافه بأدانتهم و التخلص منهم كبدايه للتخلص من الصحف المستقله والمعارضه بعد زيادة حجم مبيعاتها وأزدياد أعداد قرائها مقارنة بالصحف الحكوميه التى أنخفضت مبيعاتها بشكل ملحوظ بل أكاد أزعم أن من يقدم على شراء هذه الصحف يكون بغرض الأستفادة من كثرة عدد صفحاتها التى تتعدد أستخدامتها سواء لفرشها على الأرض أستعدادآ لأكلة سمك مشوى على كيفك مع وجود عدد من الأكيله يتعذر معه أستخدام ترابيزه السفره المسكينه ومنها تأتى أهمية هذه الصحف وأن كانت الشكوى العامه من مستخدميها هو نوعية الحبر الردىء الذى يطبع
على ملابسنا كما أشتكى بعض البسطاء فى المناطق المقطوع عنها المياه
منذ فتره طويله من أن أستخدام أوراق هذه الصحف بعد قضاء حاجتهم فى
دورات المياه ينتج عنه تلوث مؤخراتهم باللون الأسود المهبب
مش عارفه أيه حكاية الحكومه بمؤخرات الشعب هم ليه صحيح مهتمين أوى بيها كده المهم من أجل مؤخرات نظيفة ناصعة البياض ننادى بصحافة بيضاء أى خاليه من الكتابه والأحبار فلا داعى لتحمل عناء الكتابه فياريت يشتروا دماغهم ويصدروا صحفهم بيضاء وتخيلوا مدى أقبال الشعب على شراء الصحف القوميه الخاليه من الأحبار حيث سنستفيد منها بشكل أوسع فيمكن للتلاميذ كتابة فروضهم و واجباتهم المدرسيه عليها كما يمكن تصديرها للخارج كورق تواليت أمن ونظيف
بالأضافه للأستخدامات المعتاده اللى أتعودنا عليها عمل القراطيس الخاصة بالب والترمس وتلميع الزجاج ولف الشندويشتات الى أخره مما يزيد من الأقبال عليها بدلآ من أنتهاز الفرص للقضاء على الصحافه الحره و القاء اللوم على رؤساء مجالس أدارتها فى كل مصيبه تحدث ومنها أنخفاض أل حجم الأستثمارات أل نتيجة أوشاعه مغرضه للدرجه دى وصل الأستخفاف بعقولنا والى هذا الحد وصل الأمر أن يتخلى المجلس الأعلى للصحافة ونقابة الصحفيين عن مبدأ حرية الصحافه مقابل النيل من الصحف المستقله حتى لو كان الثمن هو الأرتداد مره أخرى
الى الخلف حيث لاحريه ولا رأى سوى للصحف الأمنيه وحيث محاكم التفتيش
أن الحكم على هؤلاء الصحفيين بالسجن والغرامه هو حكم علينا جميعآ بالخرس الجماعى وعدم محاولة التعبير او حتى التفكير
أنها رسالة حاده موجهة للجميع من النظام وليس للصحف المستقله وحدها الرساله التى بدأت مع ضرب الصحفيات والأعتداء عليهن وضرب قاض وسجن بعض الناشطين والمدونين و التربص بأى أنسان يستطيع أن يستخدم قلمه أو لسانه فى التعبير مع وجود كم من التهم جاهز وتفصيل تحت شعار السجون تتسع للجميع وبذلك ستحتفظ بلدنا بمكانتها فى قائمة أسوء الدول تعاملآ مع الحريات وأيضأ ستحتفظ بوضعها كدولة فقيره ناميه حيث لا أرتقاء ولا تقدم بدون الكلمة الحره
والفكر الحر المستنير الذى يولد الأبداع



Sunday, September 09, 2007

رمضانيات

عزيزى المدون عزيزتى المدونه الأخوه الزائرين كل عام وأنتم بخير بمناسبة حلول شهر رمضان المبارك أعاده الله عليكم باليمن والبركات و بالمناسبة دى أنا قررت أوزع لفة قمر الدين ونص كيلو بلح مع شوية بمب وصواريخ لكل مدون جرىء لايعرف الخوف وبمناسبة البمب أنا النهارده أنضرب فيا بمب طبعآ زى كل سنه الأولاد الشاطرين بيعدوا على الشقق يلموا فلوس عشان الزينه والفانوس اللى هاينور أم الشارع
طبعآ أفتكرونى وعدى عليا عيل طفل عنده ست سنين كمندوب عن أولاد شارعنا وطلب منى عشره جنيه
طبعآ أنا بكل سذاجه جريت على الشنطه على غير عادتى وطلعت حته بعشره بس أيه بتــــدبــــح
أتفضل يا حبيبى بس الكلام على أيه عشان الشرط نور
أيوه يا طنط هانوصلك فرعين زينه واحد أحمر والتانى فوشيا وكمان بكرانيش والفانوس فى النص
شاطر يا مازن أتفضل الفلوس أهيه وخد كمان سيجاره كليوباترا حلى بقك الصغنون
متنساش تسلم على مامتك دى حبيبتشى
طبعآ جريت على البلكونه ونورتها وجبت حبل غسيل بطول العماره عشان أسحب الزينه من الشارع
الى الشرفه اللى هى البلكونه عشان الناس المثكــفـــه وشويه كده وبدأت الناس تخرج فى البلكونات فى أنتظار تعليق الزينه وهاتك يا سلامات وكل عام وأنتم كويسبن و وأنا برد السلام بمنتهى الموده
و الحكمه و شويه كمان والزينه وصلت وشباب ورجاله و أولاد وبنات وهيـــــــــــه زيطه بقا
وأنا هايصه وجارتى فوق بتسألنى هم بيعلقوا زينه طيب مين دفع
رديت عليها كلنا دفعنا كل واحد عشره جنيه فرعين زينه وفانوس ونص كيلو كنافه
طيب يا أوسه خدى خمسه جنيه وأدينى فرع
أسفه مش أقدر عشان سمعتى فى المنطقه
طبعآ الشارع طويل بدأوا تعليق الزينه من جهة اليمين بالتحديد من عمارة أم مازن ثم عمارة الواد شهاب اللى فى خامسه أول ونصب عليا فى رمضان اللى فات فى خمسه جنيه يأأأأه ذكريات
بعد ساعتين بدأت الزينه تقرب فى أتجاهى وبدأت أهلل و أشاور للجيران فى فرح
وفجأة الساعه عشرة مساء بتوقيت الحاره بدأت فلول الشعب فى الأختفاء معلنه عن التوقف لحين شراءالمزيد من الزينه ومرت دقائق الأنتظار مريره ولم يعد هناك فى الشرفات الخاويه سوايا أنا وأحدى جاراتى
فى المنزل المقابل نتبادل النظرات فى صمت والألم يعتصر شنطتى على العشره جنيه
قررت أن أستجمع شجاعتى وأسألها فى صوت لا يخلو من التردد
ههههى الساعه كام معاكى يا أم العربى
أم العربى ترد فى أنكسار ورائحة الممبار تطل من فمها رغم عرض الشارع الذى يبلغ ست أمتار
خلاص داخلين على نص الليل يا أوسه
كل عام وأنت طيبه يا أم العربى رمضان على الأبواب
تعيشى وتفتكرى يا حبيبتــــشى أزي مامتك والنبى ماحد بيسأل عليا غيرك
أن شاء االله تكونى السنه الجايه فوق جبل المقطم بتشوى دره يا أم العربى
وذلك بعد أن أكتشفت أن أم العربى مش سمعانى
دقائق ممله بطيئه مرت قبل أن أسمع وقع أقدام تدق على الطريق
حاولت الوقوف على أطراف أصابعى والنظر فى أتجاه الصوت القادم فوق أرض الشارع المكسر عشان بيوصلوا الغاز عقبال عندكو
وأذا به عم حنفى زوج أم العربى قادم من على القهوه يا فرحت مصر بيه
فابتسمت أم العربى و لوحت بيدها فى الهواء على أستحياء ورياح الليل تداعب خصلات شعرها الداكن
أبتسم لها حنفى كاشفآ عن ظقم أسنانه ملوحآ بقدمه ورياح الليل تداعب شعر صدرة
يا واقعه سوده يعنى أنا الوحيده اللى فى أنتظار الزينه
بصراحه أنتابتنى حاله من الغليان والزهق
وبصوت عالى أقسمت على أسترداد أموالى
لمحت أحد الصبيه يمر أسفل المنزل فناديته
واد يا عادل أنت مش كنت مع مازن وهو بيلم الفلوس فين الزينه ياض
أيوه يا طنط بس الفلوس مع تامر وصلاح
تامر مين ياض
صدقينى يا طنط بكره الصبح هاروح لتامر ونعدى على صلاح نجيب الفلوس منه
أوكى يا عادل بس أوعا ماتجييش
وهكذا يا أعزائى كانت قصتى مع الزينه وطبعآ مر يومان ولم أحصل على أموالى وأيضآ لم يتم تعليق الفانوس بل أنتشرت أشاعه فى الحى كله أنى أنا كسرت الفانوس
أسأله كثيره تبحث عن أجابه
هل ذهبت العشرة جنيهات بغير رجعه هيهات
اين الفانوس ومن الذين أطلقوا الشائعه فى ظل غياب الفانوس
هل هو مازن هل هو الأعلام هل الحكومه أم هى جريدة الدستور
و على كل وبرغم غياب الفانوس فسيأتى رمضان فى موعده ليحتضن الجميع
ونستمتع بالشهر الكريم ونتقرب الى الله ونخشع له وندعوه أن تزول همومنا وهموم هذا الوطن
و كل عام وأنتم بخير



الأميره أوسا
أميرة الكونغو وبيروت وميدان لبنان
الطبعه الرابعه
مطابع الحوارتجيه
السادس من آيار سحلول الأول

Tuesday, July 24, 2007

هنــــــــــــــد أشتغالات

هند أشتغلتكم يا بشر
تحديث لابد منه
بعد أن أهتزت مشاعر الشعب المرهف بقصة هند التى أدعت أن فلان أغتصبها
وأنه ولــع عود الكبريت وحولها الى مودام وجابت نونه بتقول وااااء
وبعد أن أستعطفت ماما سوزان بالتدخل لحل مشكلتها و بعد أن أدمعت الجميع
وحصلت على شقه بمنافعها ومكافأه ألف جنيه جبس وبعد أعادة القبض على غول الخصوص و طرحه أرضآ و أستقباله بحفاوة داخل االقسم من قبل دكتور دومه
تخصص النفخ وأستخدام ألخابور العجيب وأخذ عينه منه
أتضح من خلال تقرير الطب الشرعى أنه مابيعرفش أسفه أقصد أن الطفلة لا تنسب له
كمما أتضح أن هند الشاطره لسه عذراء
أما عن السيناريو الذى أتخيله من خلال ثقافتى البوليسيه أن هند زيها زى كتير من البنات
الى عايشين فى عشوائيات و زحام عجيب أتعرفت على عالم الكبار قبل الأوان
مما دفعها الى التقليد من خلال الفلكولور الشعبى المتمثل فى لعبة عريس وعروسه
وبعد أن وقع المحظور قامت أسرتها بالبحث عن من يقوم بدور الأب ربما لعدم معرفتها يقينآ بشخصية الأب أو لكون الأب الحقيقى عيل فى أعدادى لسه
فى سنه تانيه تالت ولسه بياخد سجايره من مامته
المهم مبروك على هند الشقه و الألف جنيه وعقبال العربيه
خلاصة ألموضوع أننا شعب عاطفى وبنصدق أى حاجه عشان كده مضطره أتابع الأحداث بنفسى وأرجع أعتمد على المراسلين بتوعى
وأنتظرونى قريبآ

Thursday, January 25, 2007

بعض أنواع القــطــط


ضع المؤشر فوق الصورة لمعرفة النوع

هذه مجموعه لبعض أنواع القطط فى العالم

المصادر كتاب الحيوان للقطط وموقع الطب البيطرى

Wednesday, January 24, 2007

الشرطه بتعيد على الشعب







عيــد الــــــشــر.. طه
بينما كان برنامج تسعين دقيقه يحتفل بعيد الشرطه خرج علينا مسؤل أمنى بتصريح غير عادى وغير مقبول وغير مفهوم مفاده أن سفاح المعادى
هو صناعه أخوانجيه قصد بيها الأخوان المسلمين تهديد الأمن العام
صاحب هذا التصريح دائمآ مايظهر فى برنامج العاشره مساء ليسجل أعتراضه الشهير مـــحـصــلــش
لينفى أى جرم أرتكبه الأمن حتى مع وجود شهود عيان
كما أستنكر سيادته عدم تمكن المواطنين من ملاحقة السفاح
والقبض عليه
===================
هذا وقد أعربت السيده أعتدال نفخو عن قلقها المتزايد
تجاه فشل المواطنين فى القبض على السفاح أبن الكلب
و تحقيق الأمن والأمان للأخوه بتوع الأمن هذا وقد تحدث السيد كراكيبو الحائز على شهادة شراسه و اجرام فى دنيا الكون والمتحدث الرسمى عن منظمة أطفال الشوارع عن عدم معرفته بملابسات الــجــضيه وأن السيد توربينى ربنا يفك آسره ويعلي مراكبه كمان وكمان محبوس عندكم
وقد رفضت وبشده الدكتوره أنشراح الادلاء بأى تصريح على هامش الأحتفالات بمهرجان الكتاب وأصدرت صرختها المشهوره خخخخخخخخخخخ
أم الكتاب على اللى عايزين يقروا الناس جعانه ونفسها فى شندوشتات كبده ,و وصلة دش من أم عشــين جنيه عشان نشوف قنوات الثقافه وبرامج الفاشون ونتصل بالواد شريف بتاع الأسره والتفل ونسأله عن طريقة حشى المونبار
أم البت موزه بنت الشيخ شكشك بتاع العيال فخدت ديلها فى سنانها وطيران يا معلمى وركبت التوكتك وراحت على مــعرض الفن التجريــجى بتاع السيد الفنان وزير الأحسان وهناك قابلت الفنانين والفنانات و سمعت محاضره للعالم بضانه النفخ اللى أتكلم عن المدرسه الجديده للفن التكعيبى وأن الفنان أستخدم الوان جريئه زى اللون الجــرجـيرى ومزج الألوان بطريقه سيرياليه متعمقه فى أصول الطبخ أما الدكتور العظيم حنفى أنسداد وده أول عالم فضاء من المنوفيه بالأضافه أنه أول أنسان ياكل بأيده اليمين برضه فى المنوفيه فقد أشاد باللوحات و أستوقفته لوحه عليها شوية طرطشه باللون البنى الفاتح وفى النص دايرة صغيره باللون الأحمر واللوحه أسمها الدنيا دى صغيره أوى وقد أعجب بها كل الحاضرين وقد حاول البعض شرائها بمبلغ أتنين كيلو فياجرا ونص كيلو جمبرى لكن الفنان رفض البيع وقال للأسف أعمل بيهم أيه مكنش ينعذر أم اللوحه الأولى وهى عباره عن مجموعه من الألوان الداكنه ومحتضنه للون الأزرق فى أنسيابيه وتحرش ودفء فقد سميت بأحتمال تمطر وقد طالب الحضور بضرورة تدريس هذه اللوحه لطلبة فنون كميله وطلبة هندذه قسم كيميا حيث ثبت من خلال الابحاث المعملجيه أحتوائها على مادة ثانى اكسيد المنجنيق والتى تعمل على تحسين رغيف العيش فى ساحل العاج بالاضافه الى دورها الأقليمى فى بناء مستوطنات جديده للامريكان فى كفر الدوار وحوش عيسى
المعرض فى حد ذاته يعتبر نقله جديده لمصر ودول العالم الرابع صرحت بهذا الفنانه العائده من الموت عنيات أم شلته وايدت أن الألوان مع عنصر الضوء والظل مع قليل من ورق البفــره وبعض العرانيس ممكن تعمل دماغ وتسمع فى الــمخ وأن الأنبساط الحقيقى لجماعه من الناس فى وقت معين يبدأ من اللحظه دى لحظه الهرتله مع أهمية أعادة التوزيع الديمغرافى للمجتمع على أساس من الشفقه والرحمه والحنيه يعنى النص نص والربع ربع والكيلو كيلو واللى يغش فى الميزان بيروح النار
وسكينه تــشق بطن الكافر والمفترى وأبن الحرام وبتوع أكياس الدم الفاسد وسمعونى احلى سلام سلام المدونين والحوارتجيه و ربنا يخلى باباو يرجع تيتى بالسلامه
السلام الجمهورررررررررررى
وشششششششششششششششش
أنتهى الأرسال

Sunday, January 21, 2007

Wednesday, January 03, 2007

أولاد الشوارع 2

نفسى أبقا مدون
يا خروف العيد
نفسى أكل منك حته
أو فروة صوفك أعملها جاكته
نفسى أقول ماءءءءءءءءءءءءءء
زيك مش عارف
أصل أنا زيك أضحيه
نفسى أركب قطر الصبحيه
وأدخل مدرسة فى الحلميه
و ابقا زميل للطالب عربى
أيدى فى أيده و كتفى فى كتفه
واقفين فى طابور الثانويه
يا خروووف
نفسى أفطر كيك الصبحيه
و أروح من نفسى على الجامعه
وأقابل أبيتاف ونوران
ويحيونى أحلى تحيه
أصلى زميلهم فى الكليه
هههههههههه
يا خروف أسمع أرجوك منى
من تانى
نفسى فى كلبوزه تأكلنى
مهى زى أمى
و تدلعنى وتهننى
أنشاءالله تضربنى روصيه
أأأه يا دماغى
يا خروف يا ملك الأضحيه
ممكن تسمع منى شويه
من تانى
نفسى أبقا أشد مدون
ههههههههههههه
نفسى فى فارس بيه ينصحنى
أو جرجس ينادينى بصاحبى
كان نفسى شقير يبقا أبويا
أيوه أحمد باشا شقير
و أودى يندهلى بأخويا
هههههههههه
كان نفسى أبقا مدون
مش عارف ليه
يمكن علشان لو حد أذانى
دماغ ماك يعمل منها قضيه
نفسى أبو الليل ينادينى
أو سمراء النيل تدعينى
يا خروف
نفس لما أخاف أو أمرض
توته الدكتوره الزين تداوينى
ولما البرد يلفح بدنى
حفوصتشا الغاليه تغطينى
ياخروف
نفسى وأملى أبقا مدون
نفسى أشوف مكسوفه بعينى
وأتصاحب مع همس الليل
عاوز أزور سلامترو كافيه
أشرب كباية حلبسه
مع ساسو وأعمل بقا بيه
يا خروف نفسى اللف الدنيا
يا سلام مع سوسه المفروسه
أو شهروزه الحلوه النغشه
نتقابل ويا أم أحمد حلم
ونسمع لحكاوى فريده
والله يا جماعه أنا أنسان
أوعا حد يقول حيوان
ماااااااااااء
يا خروف بطل نطح شويه
أسمع أسمع بلاويه
نفسى أبطل شم الكله
واشم ريحة التقليه
أو حتى صوابع رجليا
نفسى فى بكره يحن شويه
مبقاش واد صايع كده وهافيا
ده أنا أنسان محتاج حنيه
نفسى فى بابا وماما
نفسى أما أغلط
بابايقولى عيب يا حبيبى
ويشخط فيا
ماما تحضنى وتصححلى الغلطه داهيه
أأه يا خروف منفوخ على الفاضى
أسمع بقا
هاتللى ودانك ألعب فيهم
نفسى أتعلم أبجد هوس
وأشترى كي بورد مع الماوس
وأقعد أدون أدون أدون
والناس تقرا كلامى وتضحك
هههههه هاهاها
أو تقراه فتبكى عليا
أهىء أهىء
نفسى أتعلم أبقا نياتى
وأعزف سيكا و مره بياتى
نفسى أرقص مع مايكل جاكسون
و أركب مرشيدس و دهاتسون
طيب أتعلم جمباز
أهو أرقص رقص أيقاعى
لو مخى من التعليم باز
أعمل أيه يا خروف
نفسى أبطل طبع الخوف
لما بنام على الأرض الناشفه
يجى البيه الباشا الظابط
و يروح هابد بالنبوت
طاخ طيخ طوخ
أأه يا جسمى
يناولنى مية علقة موووت
أعمل أيه يا خروف العيد
لما الدمع فى عينى يفيض
أعمل عيشه
طبعآ لا أشرب طبعآ كله
أأأه من الكله
أشرب منها أبقا وزير
تومين أو صحه
أبقا أى حد كبير
ممكن أبقا معلم
حلوه معلم دى
أو حتى أمير
يا خروف جرب تشرب كوله
بتخلى دماغى كده فله
وأنام وأحلم
وأعرف ستات وبنات قمرات
وأصحا على رجلين بدوسنى
أتلفت يا خروف فى البرد
مفيش غير الواد زاحبى
أباظا والواد ظاظا
على يمينى بشله وبزازه
وعلى شمالى
قطط نايمه كتيييييييير
والكل بيحضن فى أزازه
أأه يا خروف أضحيه
أحنا ضحيه
التوقيع طفل الشارع

Tuesday, January 02, 2007

خزى و عار


صدام تعرض للضرب بالاقدام على راسه بعد اعدامه
نقلآ عن جريدة دنيا الوطن الفلسطينيه
أضغط هنا وأقرأ الخبر وأيضآ التعليقات التى تعبر عن ردود أفعال الشعوب العربيه
لا تأسفن على غدر الزمان لطالما رقصت على جثث الأسود كلاباً . مابالها تعلو على أسيادها . تبقى الأسود أسودا والكلاب كلابا

أفضل  ألف  مدونة