أفضل  مئة  مدونة

Thursday, October 18, 2007

الأخوان قادمون


أحلق دقنك يا عم شكشك
أنه أمر يتكرر حدوثه معى وهوحدوث مشادات حامية مع أحد مدعي التدين ذوى اللحيات المزيفه والوجوه العابسه المتجهمه والصوت الأجش والملامح الغليظه والأسلوب الهمجى فى التعامل مع الناس ودائمآ معاركى على ارض الواقع مع شيوخ الفكر الوهابى وشيوخ التكفير أما شيوخ التدوين الذبن يختبؤن خلف شاشات الكمبيوتر ليكفروا من يختلف معهم بل ويسبونه فلا شأن لى بهم لأنهم أقل ما يقال عنهم أنهم منافقين وجبناء يتخذوا من شاشات الكمبيوتر ستار يقذفون من خلفه الآخرين بأشد العبارات غلظه وساديه
الحادثه قبل الأخيره كانت فى أحد المحال التى تبيع لوازم كهربيه والتى يملكها أصحاب اللحيات العثه وما حدث انى سألت عن ثمن شىء فأجابنى أحد العمال بأنه سعره عشرين جنيه أخرجت النقود فأذا بالشيخ يرد بعصبيه لأ لأ ده بخمس وعشرين جنيه دفعت المبلغ و أستلمت المشترك الكهربائى و وجدت السعر مكتوب عليه وهو عشرين فقط فسألت الشيخ أنت ليه أحتديت كده و كمان كاتب سعر وبتبيع بسعر آخر مش دى مغالطه
الشيخ أنا حر وبعدين دى مرابـحه عاجبك خديه مش عاجبك خلاص أوووف
أنا أنت ليه بتكلمنى كده يا عم الشيخ
الشيخ عشان بتقولى أنى بابيع بسعرين ودى حريه شخصيه وبعدين هاتى مرايه وبصى فيها
أنا مراية أيه ... أيه علاقة المرايه بالسعر أنت بتقول أى كلام
الشيخ هاتشترى ولا لأ أنا مش فاضيلك
هنا والدماء غليت فى نفوخى و فرجت عليه المنطقه تمـآ وكدت أن أشده من لحيته لولى قرفى منها... ميتين أبو الغباء وطبعآ عم الشيخ شكشك أكتشف أنى ممكن أتخانق وأبهدله فخرج من المحل فى أتجاه المسجد ولما سألت أحد الموجودين هو راح فين رد عليا ده رايح يصلى بالناس
النهارده بقا لسوء الحظ رحت أشترى لوازم من محل فتح جديد لقيت البائع وهو ملتحى أيضآ بيرص أيس كريم فى الديب فريزر وقفت فى أنتظار أن ينتهى فى أدب الى أن أنتهى بسلامته ثم وجدته ينظر لى شذرآ ويقول أنتى واقفه كده ليييييييه
أنا مستنياك تخلص يا عم الشيخ
الشيخ أنتى مالك نادينى وقولى عاوزه أيه حاجه تنرفز
أنا ليه كده يا شكشك ده أنا قولت أصبر عليك تقوم تتكلم بالأسلوب ده
شكشك أنا كده
أنا طيب دقنك دى عيره مش مفترض أنك تكون حليم عفيف اللسان ولا دى علامه تجاريه
شكشك دقنى دى لربنا
أنا ولا أنت مربيها نظام أكل عيش طبعآ مسكتش وناس جيرانه وصلوا على صوت المعركه وشخص منهم قاله مش كده يا شيخ كل شويه خناقه هى الناس شغاله عندك كلمه من هنا وأخرى من هناك أشتبك مع أصحاب المحلات المجاورة تركته وأنا مندهشه من هؤلاء الشيوخ أصحاب اللحى وسألت نفسى ماذا لو حكم هؤلاء مصر بفكرهم الجامد و مشاعرهم المتحجره و ما سر أنتشار محلات يملكها ذوى اللحيه فى منطقتى ومن يمولها وما سبب ترديد طلاب المدارس التى حول منزلى لنشيد الأخوان بدلآ من النشيد الوطنى هل أصبحنا خاضعين للفكر الوهابى المتشدد وتناسينا وجود أطفال مصريين من ديانه آخرى فى صفوف الطلبه ليسوا مضطرين لترديد شعارات أسلامويه هل أصبحنا نفرض عليهم ما ينطقونه حتى فى نشيد الصباح وما السر فى أنتشار النقاب فى الحى الذى أسكنه وماذا بعد هل نحن مقبلون على مرحلة ترفع شعار الأخوان قادمون

35 comments:

mary victor said...

http://blanila.blogspot.com/2007/10/blog-post_19.html

دكتور كسلان said...

ليكى حق انك تزعلى من لمعاملة الجافة دى

بس عايز اقوللك توضيح بسيط

مش كل الملتحيين كده

يمكن فيه بعض الناس بتتخد اللحية ستار

وبعدين الاخوان مش ملتحين

احنا دايما بنخلط بين الاخوان والجماعات الاخرى

سلااااااااااااااااااااااااااااااااااااااام

أبو ضحى said...

انتى بتقولى فيها ..فعلا احنا داخلين على مرحلة الاخوان قادمون حقيقى
كل المظاهر بتقول كده..انتى مشفتيهمش فى انتخابات مجلس الشعب الللى فاتت و شفتى الللى عملوه فى الشوارع، دول كانوا بيمشوا امم باعلام و شعارات بس فى الشوارع لجانبية عشان ميحتكوش بالشرطة

و هنتكلم على الانتخابات ليه ، انتى نسيتى اللى عملوه فى الجامعة من فترة

------
ربنا يستر..عشان دول لو مسكو الحكم هتبقى ديكتاتورية متخلفة و هنرجع مليون سنة لورا و حنا مش ناقصين اساسا

----------
بس ايه موضوع نشيد الاخوان ده..بيقول ايه؟
----------

أما عن موضوع اصحاب المحال الملتحين بتلك اللحى المشعثة المغبرة، فده امر بقالى كتير اوى، و اغلبه حرامية
فاكرة فيلم كراكون فىالشارع و اغلى كيس بلح فى العالم
:)

----------
بس خللى بالك و متدخليش نفسك فى مشاكل كتير

تحياتى

Soooo said...

كان في واحد صاحبي شغال في صيدليه .. صيدلي يعني
وجالو واحد ملتحي قوي ودقنه قد كده وجلابيه وعمة عالراس وحاجه كده هيبه يعني .. وبيقوللو انه عنده مشكله وعايز حقنه معينه وادالو اسم الحقنه في ورقه تقريبا حد كتبهالو ولا حاجه
صاحبي بيبص في اسم الحقنه لقاها حقنة للسيلان .. قام قاللو ماشي ثانيه واحده
وبعد ما ادالو الحقنه بيقوللو بس خلي بالك يعني ماتنامش مع مراتك لمدة اسبوع
قام عمنا ابو دقن قد كده وزبيبة صلاه قد كده .. قاللو لا انا مش متجوز أصلا
وراح رافع البنطلون والبتاع ومنزل الجلابيه ومطلع مسواك من جيبه وحطه في بقه ومديله تمن الحقنه ومشي

الغريب ان السيلان مابيجيش غير من حاجتين او تلاته
اول سبب هو ممارسة اللواط
تاني سبب هو ممارسه الجنس مع واحده مش نضيفه .. من الشارع يعني
تالت سبب عن طريق الملامسه بالعضو لعضو اخر مصاب بالسيلان

واقل واحده من الحاجات دي عقوبتها لو على الكلام اللي بيقولوه .. تبقى الرجم

حكايه تانيه برضه .. اكيد تسمعي عن شيخ اسمه يوسف البدري .. عموما لو سمعتي او ماسمعتيش الراجل ده حاجه اييييييه
دقن وجلابيه وبطيخة صلاه مش زبيبه صلاه يعني زي باقي الناس

الراجل ده كان بيدرسلنا دين في المدرسه في ثانوي مع اننا كنا في ثانوي عادي مش في ازهر ولا بتاع
في يوم جيت متأخر عن الطابور .. شافني الشيخ يوسف
وشتيمه وصوت عالي وتهزيئ وحاجه مرار ..
عمرك شفتي شيخ يقول لطالب لسه ماكملش الستاشر سنه .. انت هتروح النار عشان مش بتسعى للعلم
!!!!!
طب ياعم اعرف ايه الظروف .. كاني ماني مافيش
تخيلي بعدها عمل ايه
قاللي عقوبتك انك تحفظ اربع اجزاء من القرآن وهعمللك امتحان قدام المدرسه كلها ولو ماعرفتش او غلطت في آيه واحده انا هعبطك قدام المدرسه كلها

كحك
عل رأي نواره نجم
كحك بجد

فرضنا اني كنت مسيحي ياعم الشيخ .. هتصلبني بقى ولا ايه ؟؟؟؟؟؟

والله يا اوسه فكرتيني بيه وببلاويه وببلاوي الناس اللي زيه

ليه كده يابنتي مانتي كنتي بتتكلمي في الحنين والمواضيع في اللذيذ البمبي .. لازم تخليها في القبيح البني يعني

Unknown said...

الأخوان قادمون؟؟؟؟؟
الأخوان وصلوا خلاص يا أوسه

عليه العوض

الأميره أوسه said...

coffee break
زرت مدونتك وقريت التعليق ألله ينور

الأميره أوسه said...

دكتور كسلان
كلهم واحد خارجين من خلف عبأة التطرف

الأميره أوسه said...

أبو ضحى
بص ياسيدى
النشيد
هو
الله أكبر ألله أكبر ألله أكبر
ثم النشيد الوطنى
مشاكل أيه
ده أنا ناويه أبهدلهم
شرفت يا ابو ضحى

الأميره أوسه said...

Soooo
أحمد باشا
أنا بكتب تجربه مريت بيها أمبارح
وحرقة دمى
وبعدين شويه بمبى وشويه بنى
فكرتنى بالشيخ بتاع المسجد
اللى كنا بندرس فيه الصيف
كان بياخد الولاد ويروح بيهم الحمام
هههههههه
كان بيعملهم قلة أدب
شيخ واطى واطى
كويس أنه مكنش بيحب البنات
كان زمانه بقا
واطى واطى واطى

الأميره أوسه said...

Hassan El Helali
أنت جيت ياحسن
أكشف عن نفسك
وشيل سيفك
وتعالى ورايا
نروح نشرب حاجة ساقعه
الأخوان مش هايوصلوا لسدة الحكم
على جثتى

Soooo said...

على فكره يا اوسه

صاحبي هاني اللي جبتي سيرته في مدونة اجزاخانه ولا اجزاخانجيه بيقولك هو عايز حق عرب .. وزعل قوي مع اني قلتله يابني ده انت كده اشتهرت في عالم التدوين بدل مانت كنت مشهور في عالم سمسم بس
وصمم راسه والف صرمه قديمه اني امسح التعليق اللي كتبته هناك
وفعلا مسحته
وبيقوللك يا ابله اوسه امسحي اسمه من التعليق .. بس انا لما قلتله ان اوسه كانت فاتحه دولاب في الامام التونسي زمان .. قال اننو ممكن يتغاضى عن ذكر اسمه نظير شريط ترامادول ..
بس مش لبوس ..
كبسول العادي

عشان مش طالبه يعمل دماغ زباله ويخنق علينا

والسلاموووز ختامووووز

الأميره أوسه said...

سووووووووووو
طيب صاحبك فعلآ دخل التاريخ
ومن أوسع دولاب كمان
وبعدين ميت مره أقولك
أنى كنت فتحه دولاب فى السبتيه
عارفها
و كان عندى فرع فى جبل ناعسه
طيب بص بقا سيبك من اللبوس والشرايط
فى ترامادول شرب
يدوب نقطتين على لسانك وتسافر
والله زى مابقولك كده
بس عيب الترمادول أنه أدمانه سريع
أنا بطلته الحمدلله وباشم كوله
مع أطفال الشوارع
حتى أسأل نواره بتاعت حبهة التهييس
حتقولك أطفال الشوارع دول أطفالنا
أنا واخده حباية مهدىء يا أبنى مطيرانى
مش عارفه راسى من رجلى
ملعون أبو الهم والزهق

Unknown said...

مش حا يوصلوا يا أوسه؟
طيب شوفي التعليق اللي جالي النهارده


الاستاذ المحترم كاتب المقال
سلام عليك
بدلا من ان تنفق وقتك الثمين في ان تمنع مالن تستطع منعه بداهة....حاول ان تعرف ما لك وما عليك في ظل دوله الاسلام ولا تكن ككل العلمانيين او القوميين, اليساريين, الليبراليين, او حتى ولامؤاخذة الملاحدة فتدمن قتال طواحين الهواء
تحياتي
مهيب عز الدين النشوقاتي

الأميره أوسه said...

Hassan El Helali
واضح أن صاحب الرساله واثق من نفسه
لكن أحنا فى أيدنا نمنعهم
بأننا نعمل حملات مضاده ضدهم
وكمان تكتلات
لن نستسلم يا حسن يا هلالى
نريدها علمانيه

أجزاخانجيه said...

الاميره سوسه
نفس كلامك اللى بقراه ومبقدرش امسك نفسى من الضحك
كل سطر فيه كوميدى
ههههههههههههههههههههههههههههههه بكتبلك وانا نازله ضوحك ضوحك على قولتيه
انتى لو جتيلى الصيدليه هترفد وش
ومش بعيد اطلع عرفاكى كمان
يمكن جيتيلى الصيدليه مره وشرشحتيلى مين عارف هههههه
المهم
ضحكنا وخلص الضحك خلاص
انا مش هعلق على موضوع الشيوخ والاخوه والنقاب علشان الحاجات دى انا مخى جزمه فيها
بس احنا ليه بننقض الناس ولو بصينا جوانا هنلاقى عيوب اكتر من الناس اللى احنا بننقضهم
وليه علشان اتنين او تلاته غلط
احنا نعمم دا كله على الدين
ما انا اعرف منتقبات متدينين وبيعاملو اللى حواليهم كويس جداً
واعرف شيوخ وبدقن زى ما بتقولى و بجلابيه كمان
وبيتعاملو كويس جداً مع اللى حواليهم
وفيهم ادب الاسلام اللى بقى نادر دلوقتى
الصح والغلط موجود فى كل حته
وموجود جوانا
مش النقاب ولا الدقن ولا الجلابيه هما اللى غلط

bluestone said...

ما هو يا اوسا
مش كل قط يتقاله يا مشمش
ومش كل ملتحي يتقاله يا شيخ

افتكر ان السبب في المشكلة دي هي نظرةالناس للملتحي .. اي واحد لابس جلابية قصيرة ودقنه طويلة يبقى شيخ ومش بعيد الناس تسأله في الدين
واللي يقوله ابني مشي بطال
واللي يقوله مراتي بتسمع كلام امها افتينا يا شيخ
والشيخ مش شيخ ولا حاجة
ويمكن مستغلي تمن انبوبة معجون الحلاقة

وبنفس المنطق من الاخوة في الوطن (أللي هو احنا يعني يا أوسة) برضه لحد فترة قريبة جدا كان بالنسبة لي كل ملتحي مخيف ومشروع مشكلة هقابلها
وكان بيجيلي حالة هلع من الملتحين في الشارع
وبصراحة اللي عزز وجهة النظر دي كان ملتحي زي ده وغيره
واللي غيرها عندي برضه ملتحي تاني

الفكرة وما فيها اننا لو بطلنا ننظر للمظاهر على انها دليل إيمان الدنيا هتبقى انضف من كده بكتير
مش كل ملتحي مؤمن ولا حتى شيخ
ولا كل منقبة تقطر عفة وأدب

ولو قدرنا نتخلص من النظرة الخارجية للمظاهر على انها دليل للتدين من عدمه مش هتبقى الدقن سبوبة ولا النقاب ستار ولا التدين مظاهر

الأميره أوسه said...

أجزاخانجيه
مفترض أن الناس دى قدوة
ومتدينين لكن نعندهم روح الدين
السماحه فى القول
الأبتسامه صدقه
طيب خلوا أيه لواحده مثلى غير محجبه
مافيش معاكى قرص ترمادول
طول عمرك كده
حرمانى من كل حاجه
أهىء أهىء

الأميره أوسه said...

bluestone
أحسنتى قولآ يا أبنتى
طول عمرى أقول أنا مخلفتش غيرك
وبعدين لحية أيه أنا بأكل من الكلام ده
هى سبوبه زى أنتى ماتفضلتى
الدين أفيون الشعوب
طيب ليه مش الأنسانيه هى أفيون الشعوب
مش كنا أرتحنا
قهوتك على النار

Desert cat said...

على فكرة مش كلهم يا اميرتنا
بس للاسف الغالبية العظمى زى ما بتحكى
انا جارى فى الشغل من الناس دى
وكل حاجه حرام وميصعش ومينفعش وعند اول واحد تقف تضحك له تلاقيه بقا ولا صبى العالمة فى لحظة
ان شاء الله اكتب بوست عن الموضوع ده
لانى لو كتبت هنا هيكون ردى طويل جدا
ومعلشى ما تنرفزيش نفسك
حطيهم تحت الشوز ودوسى عليهم
تحياتى

الأميره أوسه said...

Desert cat
متقلقيش عليا
أنا واحده مفتريه
بس انتى شغاله أيه
سؤال تطفلى
أموااه ليكى

Esmat said...

بصرف النظر عن نوع الناس دى هل هم إخوان أم غيرهم لكن فعلا عندنا كمان فى إسكندرية كترت الاماكن اللى الواقفين فيها ملتحين وللاسف نفس الشكوى منهم إن معاملتهم جافة جدا وكمان بضاعتهم اقل جودة ومفيش إقبال من الناس عليهم

الاخطر اللى شوفته لما نزلت الاجازة الماضية

ماما أمامها جامع صغير و ميكروفونه عالى فى خطبة الجمعة سمعت الخطيب بيتكلم وكأنه بيتخانق على مظاهر الفساد اللى هو شايفها وإنحسرت كلها فى المرأة وإستخدم كلام ملىء بالشتائم ولعنهم وصور إن الفساد الدنيوى سببه المرأة ووجوب عقابها ، بقيت أصوت وأقول لماما يا دى المصيبة إيه الكلام الفارغ ده وإزاى كلام فاضح و مغلوط زى ده يتقال فى صلاة فيها الاطفال والشباب الصغير
و هى تقولى عيب تتكلمى على الشيخ كده وإسكتى خلينى أعرف أسمع – ماما مستعدة تنتقد أى شىء لكن اى واحد يلبس عمة وقفطان -لا أى حد ملتحى يبقى سيدنا وتاج راسنا ومولانا كمان
وبعد كده بقيت أشوف مجموعات من النساء بالخمار والنقاب فى مجموعات وبيدخلوا الجامع ده، ماما قالت لى الشيخ بيديهم دروس ، هما يوم والاطفال يوم. تخيلى النوع ده موجود بينا وبيغذى عقول من السيدات والاطفال
ومهما حيقول كلامه مصدق – ماهو شيخ
هو ده الخطر فعلا
و ربنا يستر
والف تحية لكى

Desert cat said...

لاء يا جميل لا تطفلى ولا حاجه
انا بشتغل فتاحه
فتاحه يعنى بتفتح لزباين
زى كدا رقاصة وبترقص
طبعا بهزر هو انا اطول اصلا اشتغل رقاصه دول دلوقتى ليهم وضعهم فى المجتمع ومش اى واحده تقدر تشتغلها الا بمؤهلات وواسطة فى كبارية خمس نجوم وانا مش عندى مؤهلات ولا واسطة فى كبارية نجمتين حتى
المهم يا ستى
اناعندى كوفى نت
وانا اللى بديره بنفسى اى والله العظيم
بس الجاهل ابو لحية اللى جنبى حسسنى انى فاتحه دعارة مش كوفى نت
بس وحياتك ولا بيهمنى فضلت احطه تحت الشوز بتاعى واضغط عليه لحد ما جبت خبره وبقا عامل زى الفار الاذعر
اصل اختك اللى هى انا فيها شبه منك شوية فى الافترا

اسامة يس said...

كما ذكر بعض المعلقين وهم على حق ليس الاخوان من ذوي اللحى ... هذه واحده...
الثانية فرق بين التربص المبني على رؤية ذهنية مسبقة نختلف او نتفق على صحتها .. وبين الواقائع فما ذكرتيه هنا وقائع تربصتي انت بأشخاصها فقد تدخلين محل لرجل غير ملتحي فيفعل ما فعل ذاك الملتحي... المعنى يا سيدتي ان ذهنيتك عنهم هي من جعلتك تتربصين ... ومع ذلك... وهنا نعود للرؤية العقلية ... فرق بين الاسلام النقي السمح النبع الصافي .. وبين تلك الرؤيا التي يمثلها السلفيون بصفه عامه ... وهي رؤية مخنوقه مسمومة منغلقة .. بالتأكيد تطفح على تصرفاتهم ... لكني أنأى بك ان تجعلي التدين في ذات الكفة ... والتهكم يختلط بك عليهم جميعا وهذا ظلم بين..
دمت بكل ود
خالص تحياتي

محمد الشريف said...

مممممممممم

عندك حق فى ان فيه ناس المفروض يكون مظهرها متماشى مع تعاملاتها

المشكلة مش فى الدقن
المشكلة فى الفهم العوج اللى موجود عند البعض
فاكر ان الدين بس دقن او نقاب , وناسى ان الدين بردو تعامل وأخلاق
أنا بس أختلف معاكى فى نقطة انك دخلتى الاخوان فى وسط الكلام

كتير من الاخوان مش مربيين دقنهم

وكمان الاخوان معتدلين فى تفكيرهم وأسلوبهم , وفهمهم

ايه علاقتهم بالناس اللى بتتكلمى عليهم

مش ناقص اننا نقول انهم اللى ورا اسامة بن لادن !!

hartaka said...

ازيك يا اوسة
انت عندك حق في كل الي بتقوللية
بس عايز اقولك ان عنوان البوست بتاعك دة هو مستقبل مصر الفترة الي جاية للاسف
الاخوان قادمون
لانهم القوة الوحيدة المنظمة في البلد هما دلوقت شبة مسيطرين علي قطاعات كثيرة
عميد كلية فنون جميلة ٌ إخوان
وعايز بسلامتة يعمل كلية فنون جملة اسلامية
شركات كتير في مصر تمويلها واصحابها اخوان ولو جمال محكمش هيبقوا هما البديل
النقاب زاد جدا في منطقتنا > انا بشوف مش اقل من ١٥ واحدة الصبح وانا رايح الشغل مع اني ساكن في حي يعتبر طبقة وسطي
الحاجة الاخيرة ليها علاقة بطبيعة المصريين وهي انهم
ممكن يموتوا من الجوع ومعيملوش ثورة
الحاجة الوحيدة الي تخليهم يثوروا
ان حد يتعرض لدينهم ودة الي بيلعب علية الجماعات المتدينة والاخوان - الدين علشان كدة الناس تضربلهم تعظيم سلام
للاسف احنا شعب منافق والحاجة الوحيدة الي ممكن تحركنا الدين
مدونتك جميلة وشكرا علي تعليقك عندي

شقاوة شعب said...

دى اول زيارة لمدونتك الجميلة أوسة

بس عايزة اقولك حاجة اننا فى مصر دايما نشوف الجانب السئ من الاشياء وبيكون الجانب ده كتر حاجة تلفت نظرنا

يعنى لو شفنا واحد ملتحى اخلاقه عالية بننساه من ذاكرتنا اول ما علاقتنا بيه تنتهى
واول ما نشوف المثال السئ نفضل فاكرينهاله طوووول العمر

دلوقتى لما حد من المعلقين قالك مش كل ملتحى يعنى متدين قلتليله لأ هو قدوة
بس اننا عايزة اقولك ان مش عشان واحد قرر انه يربى لحيته كنوع من التقرب لربنا -وهو حر- يبقى معناه انه قرر انه يبقى ملاك
كل الحكاية انه حب يزود حاجة عنده وده مش معناه انه كل ما هيرتكب غلط نقوله : الله اومال الذقن دى لازمتها اييييه؟؟
وكأن الشعرتين اللى رباهم هيربطوه من رقبته فى كل كلمة وكل حرف وكل فعل

انا كل كلامى ده مش معناه انى بدى مبرر لتصرف الراجل لكن بقول ان الذقن لا= ملاك

حاجة كمان يا أوسة
عنوان الموضوع الاخوان قادمون
مع ان الاخوان مش بيربوا ذقنهم اصلا
ولما حد من المعلقين قالك ان دول يختلفوا عن دول
قلتليله لأ كلهم متطرفين
بس احب اقولك ان شباب الاخوان اهم معاكى فى الجامعة ومتواجدين فيها من قبل دخولك بعشرات السنين وهاتيلى موقف واحد كان فيه تطرف منهم او اجبروا حد على فعل شئ من الدين

وهاتيلى واحد منهم لابس جلبية قصيرة ولا مربى ذقنه
احنا بس اللى مانعرفش ان فى جماعات دينية كتير جدا فى مصر وكل واحدة مختلفة تماما تماما عن التانية

عايزة اقولك على حاجة اخيرة
انا بنت من الاخوان ووالله العظيم عندى بنات اصحابى مش محجبات واصحابى جدا وقريبين قوى منى رغم انهم عارفين انى اخوان

واخويا برضه شاب من شباب الاخوان وعايزة اقولك انه بفضل الله استايل جدا فى لبسه وبيجيبه من انضف الاماكن ولو شفتيه مش هتصدقى انه من الاخوان

وعلى فكرة هما دول الاخوان الحقيقين : شباب عادى جدا مايلفتش نظرك فى اى حاجة فى شكله لكن اللى يلفت انتباهك اخلاقه العالية وحب جيرانه وقرايبه ليه

يعنى مش اللى لابس جلبية قصيرة ولا له دقن منعكشة

والله انا كنت صادقة فى كلامى معاكى فى كل كلمة قلتها
وبجد انا سعيدة جدا انى دخلت مدونتك وباذن الله مش هتكون المرة الاخيرة

واسفة جدا على الاطالة

shreen said...

اوسه المتمرده
المثقفه كما يبدو من مدونتك
اولا اسمحى لى ان اشكرك على تعليقك فى مدونتى وتشريفك بالزياره
اما عن النوعيه التى تكلمت عنها فى تعليقك
التى تحتاج ان
تتقطع بسطور
وتتحط فى أكياس
يا ستى احنا لا نقطع ولا نعبى
ربنا موجود واكيد اللى ظلم انسان ربنا هيعاقبه

الان
اعلق على بوستك الجميل ده
انا معك فى كل كلامك عن مدعى الاسلام
ومفكفرين كل من هو ليسوا على اراءهم
ومن يتخدوا اللحيه والجلباب ستارا زائفا للاسلمه
وافكارهم الاسلام منها برئ

انا عن نفسى ليا تجارب زى الزفت مع اصحاب اللحى والجلباب
مثلا يا ستى
كنت باروح معارض الكمبيوتر وكنت بالاقى من الخلق دول كتير
ما اعرفش ليه يا بنتى كانوا مستقصدينى
الاقى الواحد فيهم لازق فيا من ظهرى وطبعا مش محتاجه اقولك بيعمل ايه
لما اتعقدت فى حياتى
وكل مااروح معرض كمبيوتر ولاقى حد من الاخوة دول لازم اقف وادى ظهرى للحيطه

والله اللى كانو بيعملوه دة ما جه من شاب صغير او واحد عادى لابس البنطلون


اقولك بقى يا ستى ايه اكتر حاجه خلتنى احبك على طول
التعبير دة

مصر نوبيه فرعونيه
وليست عربيه

صوتى اتنبح يا بنتى وانا عماله افهم الخلق ده
وهم بينكروه كان الفراعنه بقوا تهمه

ولا لما تتناشقى مع حد عن عظمه الفراعنه ويقلولك ان رمسيس التانى هو فرعون موسى
اتفو عليه

بابقى عايزه اشد شعرى
واخنق الجهل والغباء
احنا بنتنصل من تاريخنا بمنتهى الغباء

والحمد لله بكلمتك دى خلتينى اعرف ان فى امل لسه فينا

وكمان هاضيفك عندى فى مدونتى علشان نفضل على تواصل

عجبنى جرأتك وروحك الصريحة المتمرده
الى لقاء قريب
يا صديقتى

Ahmed Al-Sabbagh said...

صديقتى العزيزة أوسة

انا تقريبا اول مرة اقرا البوست ده

رغم انه تقريبا قديم شوية

وليه ملحوظة

بس قبل الملحوظة اقولك انى مش أخوان ومش بدقن بالعكس خالص انا عامل المدونة دى للهلس هههه على رأى عبلة كامل

الملحوظة بقى
الدقن دى عارفة هى ايه اصلا ؟؟ سنة عن رسول الله علي الصلاة والسلام
فلازم نتكلم عنها كويس
الناس بقى ام دقن ووحشين دول انا معاكى ولاد كلب وانا اتعرضت لمواقف كتييييييير اوى مشابهه

بس زى ما فى ملتحين وحشين فى مش ملتحين وحشين وفى عريانين وحشين وفى مسلمين وحشين وفى مسحين وحشين وفى يهود وحشين وفى حالقين كابوريا وحشين

فياريت ارجوكى بلاش نسب كل اللى بدقن ونعتبر الدقن علامة للشخص السئ

كمان عايز اقولك معلومة
دقن مش معناها اخوان
بالعكس كمان

الاخوان دلوقت فيهم اتجاه قوى للشكل المدنى ابو من غير دقن وبنطلون وقميص


دقن دى ممكن تكون تيارات كتييييير اوى
اخوان - جهاد - تكفير وهجرة - سلفيين - شيوعين - هيبيز - واحد كسلان - واحد مش نضيف وهكذا
كمان ما تنسيسش ان جيفارا كان بدقن

وهكذا

ارجو تقرى وتفكرى وتقولي لى رأيك

تحية ليكى من كل قلبى على مدونتك الرائعة

أحمد الصباغ

Anonymous said...

انتى بتقولى فيها ..فعلا احنا داخلين على مرحلة الاخوان قادمون حقيقى
كل المظاهر بتقول كده..انتى مشفتيهمش فى انتخابات مجلس الشعب الللى فاتت و شفتى الللى عملوه فى الشوارع، دول كانوا بيمشوا امم باعلام و شعارات بس فى الشوارع لجانبية عشان ميحتكوش بالشرطة
وبش انا اتكلم فى السياسة
علشان انا بخاف من الحكومة

bassim said...

طب الذقن سنة عن الرسول...طب الرسول حج مرة واحدة في حياته..ليه بقى الناس مش بتعملها سنة و يحجوا مرة واحدة سنة عن الرسول و يساعدوا المحتاج بدل ما يحجوا 3 و 4 و5 مرات؟؟؟

bassim said...

طب الذقن سنة عن الرسول...طب الرسول حج مرة واحدة في حياته..ليه بقى الناس مش بتعملها سنة و يحجوا مرة واحدة سنة عن الرسول و يساعدوا المحتاج بدل ما يحجوا 3 و 4 و5 مرات؟؟؟

خالد المصري said...

اخر خبر

المدونين كلهم ملحدين وشواذ ولوطيين

ليه؟
قرأت لكريم عامر فوجدته ملحد يسب في سيدنا رسول الله صلى الله عليه وسلم والصحابه رضوان الله عليهم

وقرأت لامرأه مثليه فوجدتها تمجد في المثليات وتقولك كمان قال ايه الدين لا يتعارض مع الشذوذ بل والكتب السماويه تحث عليه والأمثله كثيره

اعتذر

ولكن كان لابد من ذلك التقديم لاني عممت الخاص تماما كما فعلت اوسه
قابلت حاله او حالتين او حتى الف من الملتحين ممن لا تمت اخلاقهم بصله للدين وانا ايضا قابلت حالات من المدونين لا تمت بصله لحريه الفكر والتعبير المحترم

اوسه انتي قابلتي عينه سيئه او عينات لكنك تجاهلتي ان هناك اخرين يمثلوا بحق دين اكثر من ثلثي كتابه المقدس القراءن الكريم يتحدث عن المعاملات بين الناس دين اعلنها رسوله الكريم عليه الصلاه والسلام من 1400 سنه ( بعثت لأتمم مكارم الأخلاق )

اوسه انا معك ان هؤلاء قد اخطئوا ولكن اللحية لم تخطيء قد تحكمي على من اخطء لكن ليس على اللحيه

انتقديهم كبشر وليس كملتحين

Abo Hmeed said...

استاذتى و اسمحى لى فى هذا
اذ انى اعلم انة يمكنك ان تتحملينى
اولا : دعينا نتفق على ان الناس معادن بدون لحية او بلحية
فربما قابلت معدن ردىء هذا لا يعمم على الباقى
و هل يا سيدتى لم تقابلى شخصا بدون لحية ذو جفاء فى المعاملة من قبل
ويا اما بالنسبة للأطلاق الكلام على العموم فهذا لا يصح


ثانيا : بالنسبة للأخوان

هو حد عارف يوصل للحكم لما هيوصلو هما ولو عايزة رأيى لو وصلو للحكم هيبقى حقهم ليةلأنهم المعارضة الوحيدة الى احتفظت بذاكرتها على رأى هيكل او نزلت للناس و اتعاونت معاهم اما حكاية استغلال الدين دى فا غيرهم مستغلهوش لية
"انا مش اخوان"


و
لية بقية الأحزاب بقت احزاب قهاوى دى مشكلة بقية الأحزاب مش الأخوان

و بعدين هل الحزب الوطنى حزب الأطهار الأنقياء


و تحياتى و شكرا

مصري بالغربة said...

السلام عليكم انا اول مرة اعلق واول مرة ادخل مدونتك

بس لي استفسار او سؤال

هل انت ضد الاسلام
هل انت ضد اللحية اسوة بالرسول الكريم ( ص )هل انت ضد الحجاب
ليه تشويه صورة الاسلاميين بالطريقة ديه ولا انت مش مسلمة؟

قصاصه said...

الاميره اوسه

تسمحى لى ان اضيف لينك مدونتك عندى فى مدونتى الفقيره الى الله ؟
Kosasah.blogspot.com

شكرا جزيلا
ماجد
dds1326@yahoo.com

أفضل  ألف  مدونة