أفضل  مئة  مدونة

Monday, February 18, 2008

حادثه وجبس وشوية مسامير


العكاز صديقى

منذ عشرين ديسمبر الماضى الموافق ثانى أيام العيد وهذا العكاز أصبح صديقى أو بمثابة أخويا الكبير الحكايه بدأت فى التاريخ السابق الساعه سابعة مساء ثانى أيام العيد وأثناء عودتى من العمل وتوجهى
لزيارة أحدى قريباتى وبينما كنت أسير بجوار الرصيف المشغول بكراسى وترابيزات و رواد أحد المقاهى اللى واخده الرصيف نظام وضع يد و كنت أشدو بصوتى الجميل أغنية العيد خنقة فوجئت بأتوبيس رحلات
رقم 1811 رحلات جيزه وسائقه هو الشاب الجرىء الغنى عن التعريف اللى مش همه حد أسامه حنفى رجب عطيه والقاطن فى أم خنان حوامديه يقترب منى من الخلف ٌال أيه بيعاكس ساب الشارع وأقترب من الرصيف وصدمنى من الخلف مما ادى الى سقوطى وسط الوحل والطين خاصة أن اليوم ده الدنيا مطرت لو تفتكروا المهم يا أصدقائى أنه أخد الجزء الذى يعلو القدم مباشرة تحت عجلة الأتوبيس اليمنى ولستر ربنا أنى كنت مرتدية بووت وبدأت أصرخ والأتوبيس يدفعنى على ألأرض الموحله وأنادى على السائق أن يتوقف بينما يشاهدنى التباع بتاعه اللى واقف على باب الأتوبيس بيتفرج عليه ولولا تدخل الماره بأيقافهم للأتوبيس أثناء محاولته أن يسحق بقية جسدى ويهرب لكنت فى عداد الأموات وقام بعض المواطنون بالتحفظ عليه لحين حضور الشرطه والأسعاف و طبعآ صعب أنى أصور حالتى وأنا ملقاة على الأرض و حولى عشرات من أقدام الناس والطين يلطخ ملابسى وألم فظيع فى ساقى اليمنى و قام أحد المتواجدين بأحضار حقيبة اليد الخاصه بى وأشرت أليه بأن يفتحها ويخرج الموبيل وقام بألأتصال بعائلتى و دقائق وحضر أمين شرطه طلب بطاقتى الشخصيه مش فاهمه ليه ودقائق آخرى من العذاب و حضرت سيارة الأسعاف لتبدأ معها رحلة عذاب حقيقيه رحلة عذاب ضحيتها كل يوم مئات بل ألاف من المصريين الذين يتعرضون لحوادث سير أو حوادث من أى نوع أنها رحلة لن أنساها ما حييت و ربما لأصبح أنا أيضآ ضحية للأهمال وعد م الأنسانيه التى نعيشها فى بلدنا كل يوم حتى تعودنا أن تهدر كرامتنا وأن نهان
و نشعر بالغربه فى بلدنا فى الواقع أشعر بمراره لا أرغب فى وصفها أو الكتابه عنها وسأكتفى بالأشاره لبعض ماحدث لي فى تلك الليله
مستشفى أم المصريين
نظرآ لحدوث الحادثه فى مكان قريب من مستشفى أم المصريين فقد توجه بي المسعفون اليها وليتهم ما فعلوا بالطبع لم أتوقف عن الصراخ للحظه وبعد دخولى المستشفى تخيلت أن هناك كم من الأطباء و الممرضات سيكونوا فى أنتظارى ولكن بكل أسف وجدتنى فى غرفه بارده وحيده والعديد من وجوه الغرباء من المرضى يدخلون لألقاء نظره خاطفه على المشهد و بنصرفون وبينما أرتجف من شدة البرد و الصراخ ونزيف الدم المستمر وجدت طبيبان حضرا لرؤيتى وهما فى قمة الغضب وقام أحدهم بالصراخ فى وجهى بأن أتوقف عن البكاء والعويل ثم نظرا الى مكان الأصابه وأنصرفا ثم حضرت تمرجيه قامت بدفع السرير الى غرفة آخرى فى منتهى القذاره و تركتنى وأنا أصرخ من الألم ثم حضرت سيدة ترتدى لبس حكيمه و تحمل طفل على يدها و بدأت فى عمل ألأشعه وطلبت منها أى غطاء لأن جسدى بدأ فى الأرتجاف بشده من الألم والبرد فقامت بألقاء ملايه متسخه باليه فوقى وهنا حضر أقربائى و أنزعجوا مما يحدث فلم تقدم لى أى أسعافات أوليه فقط أنا ودمائى و ملابسى المتسخه وصراخى مستنجده بالسماء وبعد جهد عثروا على طبيب نصحهم بسرعة التوجه بي الى مستشفى الهرم كذلك نصحهم بذلك بعض العاملين وقالوا أهربوا بجلدكم من هنا و لكى نستطيع الخروج لابد من المرور ببعض الخطوات و أهمها البحث عن طبيب يوقع بالخروج من المستشفى بشرط أن ينتهى أفراد الشرطه المتواجدين فى المستشفى من ألتحقيق معى وكأنى متهمه لم يشفع لى ألمى ولا دمائى من هذا الشرطى الذى جلس على كرسى وأشعل سيجاره وأمسك بأوراقه و نظر فى تحدى للجميع وبدأ فى طرح أسئلته الذكيه و كان أقربائى قد خلعوا جواكتهم و وضعوها فوقى لكى أستدفأ بها وبدأ الأستجواب
أسمك أيه- بطاقتك فين - مين ضربك – أتوبيس شكله أيه – تعرفى أسم السواق – طيب ضربك من اليمين ولا الشمال – طيب كنت رايحه ولا جايه وطبعآ أنا الألم بيزيد و أقاربى فى حالة غليان و طبعآ فهمنا هو عاوز أيه و بمجرد أن عشرينات من الجنيهات ظهرت و الراجل بطل يسأل وأظهر شىء من الأهتمام وكانت سياره الأسعاف التانيه وصلت وأبتدت خناقه بين الممرضه و مسعف الأسعاف على الملايه القذره اللى تحتى
والمسعف بيقول للممرضه أنا هارجعلك الملايه و هى رأسها و ألف جزمه أنى مش ماشيه غير لما أرجع العهده اللى هى الملايه و للمرة الثانيه خلال دقائق والفلوس تحل المشكله ويحملنى المسعفون الى جحيم مستشفى الهرم
مستشفى الهرم

هناك قابلنا الأطباء بأهتمام وكشفوا علي وطلبوا عمل أشعه بسرعه ولأول مره أستطع رؤية الجرح حيث وجدت فجوه فى أسفل ساقى زال عنها اللحم بلا رجعه و تظهر عظامى واضحه و الطين حول مكان الأصابه و داخله و بعد عمل الأشعه اللى أوضحت وجود كسور مضاعفه تم التوجه بي الى غرفة لتطهير الجرح وطلبوا من أحد أقاربى سداد الفاتوره بسرعه وبعد دفعها بدأو فى تطهير الجرح أو تعذيبى بمعنى أدق
حيث قاموا بألقاء سوائل من بعيد و بقوه داخل الجرح الغائر وأنا أصرخ من الألم وبعد عشر دقائق قام طبيب بمحادثتنا وقال يا جماعه بصراحه هى هتحتاج عملية و وضع شريحة و مسامير عشان نعالج الكسر ده
وأحنا فى عيد كل سنه وأنتم طيبين ده غير أن الجهاز عندنا اللى بيستخدم فى النوع ده من العمليات عطلان و مفيش دكتور تخدير وأحتمال منقدرش نعملها حاجه غير بعد أسبوع عشان كده بنصحكم بطلب سياره أسعاف و أصطحابها لمستشفى خاصه و لما سألناه طيب يا دكتور ليه مدوخنا ماكنت قولت من البدايه الكلام ده ده العظم واضح أنه متكسر طبعآ الدكتور عمل نفسه فاقد الذاكره و عرفنا أنهم كانوا عاوزين يستفيدوا من مصاريف الأشعه وخلاص و تم الأتصال بسياره الأسعاف اللى وصلت بعد ساعه لتبدأ معركة الملايه مره تانيه
بين الممرضه و المسعف وأنتهت بنفس النتيجه أننا نمشى أمورنا وندفع مبلغ للمرضه واللذيذ فى الموضوع أننا مش عارفين نروح فين و هل المستشفى القادمه هتقبلنا والا هنقضيها سيارات أسعاف لبقية العيد
وطبعآ يا شطار يا حلوين أحنا ماسيبناش مستشفى الهرم غير لما وقعنا أقرار يفيد أن الخروج على مسؤليتنا ولما رفضنا رد الدكتور خلاص خليكم لما تفرج و نعرف نعالجها
المهم أتصلنا بطبيب عظام نصحنا بالتوجه لمستشفى الزهيـــــــــــــــيرى التخصص وهو هايقابلنا هناك
وفى مستشفى الزهيرى كل شىء نظيف و كمان أبتسامه تقابلك من ناس شيك و موظف أستقبال زى بتاع الفنادق يسألك بأدب حضرتك تحبها مكيفه طيب أولى ولا تانيه طيب أولى ممتاز ولا عادى طبعآ كل ده وأنا برقع بالصوت والله والناس هناك بارده بعد كده طلب الموظف مننا ألف جنيه بصوت واضح وبعد دفع الألف طلب ألفين جنيه بحــجة أننا كلنا مسمعنهوش كويس طبعآ الناس لمت من بعض و دفعوا عشان نخلص
وجه الدكتور وبدأ يرش الجرح بالمحاليل وأنا أصرخ وقالنا بكره نعمل اللازم وتخرجوا على طول عشان مفيش دكتور بنج وأنا أديتها مسكن قوى وتانى يوم فعلآ عملت العمليه وهى كانت مجرد تنظيف للجرح
من الداخل و تم أخراج شظايا عظام و قطع طين ولأن الجرح فضل متلوث لليله كامله فكان لازم نستنى الجرح يقفل ودفعنا كمان الفين تانيين عشان ليله واحده يعنى أربعة الأف جنيه للغرفه وفتح غرفة العمليات وبعض المستلزمات الطبيه أم عن أجر الأطباء نفسهم فده موضوع تانى وخرجت وماذلت فى انتظار ميعاد العمليه التانيه بعد تحسن حالة الجرح لتركيب مسامير وشريحه من العظام ثم القيام بعمليات تجميل لتغير شكل ساقى من جهة القدم لوجود جزء غائر
العمليه كانت يوم 21 دبيسمبر و فى نفس اليوم ده عرفنا أن السائق خرج من القسم و كأنه داس على رجل كنبه وأنا من هنا بقول لوزير الصحه ياريت تقفل مستشفياتك دى أو تحولها لمحلات كشرى بس ياريت تكتر الدقه وبسأل هؤلاء الأطباء كيف تحجرت قلوبكم وصرتوا بلا رحمه مثلكم مثل سائق الأتوبيس الذى حطم عظامى بسهوله وحاول الهرب مثلكم مثل أمين الشرطه الذى لم يرحم ألامى وصمم على أستجوابى مثلكم كمثل كل من غلظ قلبه و رفض مساعدة أنسان رغم قدرته على المساعده
لقد تحجرت قلوب الكثيريين حتى فقدوا القدرة على الأحساس والتفاعل مع الغير
المشكله فى مصر تعدت رغيف الخبز و الغلاء والبطاله و الرشوه وكل أشكال الفساد فقد نال الفساد أيضآ من مشاعر وقلوب الكثيريين و اصبح الحديث عن الأنسانيه و حقوق المصرى فى بلده هو نوع من الترف
التعذيب لم يعد داخل زنزانه أو قسم بوليس التعذيب ساكن فى كل الطرقات ينتظرنا بلهفه فى أعمالنا و منازلنا و فى المواصلات و الشوارع والمستشفيات منذ أن نستقيظ وحنى ننام و نحن نحتضن خبر جديد
عن عباره تغرق أو حريق أو عمارة موت تطبق على ساكنيها و تحطم أحلامهم
وبقول لكل قارىء مشاعرك لوحدها مش كفايه أتبرع ولو بمسمار أو كماشه أو حتى شاكوش أنا داخله على عمليه جديده و ربنا يستر بقا
كان معكم أوسه الناجيه من الموت والتى ماذالت فى الجبس
تحديث
غدآ الأثنين موعدى مع جراحه جديده وغرفة عمليات آخرى
أرجو أنها تكون الأخيره حيث سيتم معالجة الكسور بشرائح
ومسامير , دعواتكم بقا وأراكم على خير





59 comments:

soosa el-mafroosa said...

إخص عليا إخص

لا ماتطيبيش خاطري

انا أصلي قلت البت أوسة باعتنا و راحت إشتغلت في عز الدخيلة و سابت المدونة و البلوجر كله يبكي و يمادي عليها

يا أوووووووووووسههههههههه

طلع الموضوع جبس و حادثة و مسامير

إلهي ينشك في إيده و رجلة و نواضره اللي كان السبب

و الله يا أوستي وحشاني موت

حمدالله ع السلامه

البلوجر منور نور غير طبيعي
اللهم أدمها نعمة و احفظها من الزوال

و يشفيكي و يقومك بالسلامة يا أوسة يا بنت حوا و آدم

ياااااااااارب
أمممواه

HafSSa said...

لا لا لا
كله الا اوسة

الف سلامة عليكي اي نضري
ان شاء الله عدوينك و لا ضفر واحد منك يا قمر
بقى كل ده يحصل و الواحد فاكرك نستينا و مبقاش ليكي نفس تشوفي خلقنا

بجد زعلتيني يا اوسوس
بس يا بنتي كنتي متوقعة ايه من المستشفيات سواء الحكومية و لا الخاصة
لما اقابلك ان شاء الله ابقى احكيلك عملوا ايه ف يامي السنة اللي فاتت

بس كفارة يا معلم
معلش
و ان شاء الله تقومي منها بخي رو تبقي فل الفل يا جميل
بجد فرحت اني شفتلك كلام
لكن زعلت من محتواه
هي دي مصر يا عبلة



بووووووووووسة يا اوسة
و تقومي بالسلامة يا رب

تحياتي

Nagdi said...

i am sory to what happen to you, i just read also some bad things by Karim...

i would like to say in DENIMARK , there is no such things like Om El masriin Hospital, like 20 Pounds to the police man or those who smoke in the hospital.....

i am very sory for our relegion, our country our sivilsation............

Abdou Basha said...

قصة صعبة جدا يا أوسة
كان الله في العون وان شاء الله تخرجي من الموضوع ده على خير وترجعي احسن من قبل الموقف ده كله

أنا وهي said...

الف سلامة عليكي ان شاء الله سواق الاتوبيس قولي امين
المشكلة مش في الحادثة المشكلة في اللي حصل بعد الحادثة
معلهش تعيشي وماتخديش غيرها

الأميره أوسه said...

سوســــــــــــه المفروسه
مرحب بيكى فى قسم العظام
ياريت دعوتك تكون مستجابه وينشك فى كل جسمه
الواد كان عاوز يفرمنى ويعملنى لحمه مفرومه بالمشروم
بس أنا بقا أتمسكت بالحياه وعافرت
سعيده بمشاعرك الرقيقه دى
أمممممممممممموه ليكى أنتشى

Desert cat said...

الف الف سلامة عليكى يا حبيبتى
انا برضه كنت بقول مش يمنعك عنا غير الشديد القوى
بالنسبة يا قلبى للى حصلك ده فدى مشاهد متكررة يوميا فى المستشفيات ... وكان حصل لوالدى قبل كدا نفس اللى حصلك واكتر شوية ... وروحنا المستشفى لاقيناه فى الاستقبال بينزف ورجليه الاتنين متكسرين وعم يصرخ ولا حد قاله انت بتعمل ايه ... عموما مبقاش فى مستشفيات ولا اطباء دلوقتى فى سلخنات وجزارين
الف سلامة عليكى وان شاء الله تعملى العملية وتقومى بالف خير بس ابقى طمنينا عليكى

الأميره أوسه said...

HafSSa
أزيك يا جميل
والله غصب عنى أنا مفروض أنى أكون فارده رجلى طول الوقت
بس قولت أدخل أشوف أخباركوا أيه
و أحكى عن مغامراتى فى العيد
أنا أتفسحت فى العيد لما شبعت ركبت ثلاث سيارات أسعاف خلال ثلاث ساعات
وعلى رأى المثل عمر الشقى بقى
يارب تكونى بخير يا حفوصه
الدنيا برد جدآ
أخبار شربة العتس أيه

الأميره أوسه said...

Nagdi
شكرآ ليك
فى مصر كل شىء مباح
قتل الشعب وتجويعه وتشريده مباح
كرامة الأنسان هى أخر حاجه الحكومه بتهتم بيها أما صحته فحدث ولا حرج

الأميره أوسه said...

عبدوووو باشا
ربنا يكرمك
مفيش كيس جوافه حتى
أو حتى كيس لب
شكرآ لأهتمامك يا باشا

الأميره أوسه said...

أنا وهي
ميرسى جدآ يا أنا وأخبار هى أيه
ربنا يخليكوا لبعض
أنا بعد الحادثه حدث عندى أنبعاج فى الشخصيه
ربنا يستر
ميرسى ليك

الأميره أوسه said...

Desert cat
بنت الشرقيه الرقيقه أزيك
سلامة والدك
أرجو أنه يكون بخير
مش عارفه بعد العمليه هارجع أمشى تانى طبيعى ولا لأ
بس الحمدلله لسه عايشه
وشكرآ ليكى يا جميله

اسكندراني في الغربة said...

حمد الله على السلامة
والف لا بأس عليكي
--
اديكي اتعلمتي درس مهم
لما تحبي تعملي حادثة خليها تكون ادام باب مستشفي خاص و تكون قابضة جمعية قبليها
-----
سلامتك مرة تانية

تحياتي

بيجاسوس المصرى said...

الف سلامة عليكى يا اوسة

و ان شاء الله تقومى بالسلامة و بخير بأذن الله

بس ايه حكاية العيد اللى فات ده انا كنت على كده فى القسم اللى جنبك فى المستشفى

اتمنى من الله انك تكونى بخير دلوقتى و ترجعلنا احسن من الاول كمان بأذن الله

mohandsmasry said...

الف مليون سلامة لأميرة البلوجرية وحمد لله على سلامتك معلهش باين كدا لعنة الفراعنة (بتاعة نب بتى) صابتك علشان عكيتى وخلطتى ابو قرش على ابو قرشين وكان تأثيرها شديد شوية عليكى بحكم انك من سكان الهرم جيران يعنى هههههههههههههههه

Nagdi said...

hallo princess, how are u today?
Nagdi

hartaka said...

الف سلامة عليكى يا اوسة
انا قولت انت اعتزلت الكتابة بعد الغيبة الطويلة دى

appy said...

يا حبيبتى الف سلامه عليك بجد انا بدخل لكى من زمان بس استغربت انك مش بتكونى موجوده اما المستشفيات فمنهم لله

Soooo said...

انا بجد مش عارف اقول ايه
انتي هتعملي العمليه في مستشفى ايه
ارجوكي لو سمحتي بلغيني

هل هتبقى في مستشفى الزهيري ولا في مستشفى تانيه
ولو في مستشفى تانيه هتكون مستشفى ايه
ارجوكي بلغيني وانا كده كده هروح مستشفى الزهيري اسأل هناك

ربنا يارب يشفيكي ويعفو عنك ويديكي على قد مصابك حسنات ويحاسب اللي كانو السبب بنفس فعلتهم

anwer said...
This comment has been removed by the author.
anwer said...

انت بتتكلمي علي واحد داس علي رجليكي
انا من 3 شهور اول الشتا
كان يوم خميس و كنت في العجمي
مش لاقي حاجة اعملها قلت اطلع اسهر في مارينا
المهم شاء الحظ ان عجلة فرقعت عملنا حادثة مما تسمي بحادثة مووت
اولا الأسعاف جت بعد حوالي نص ساعة
و لما دخلوني كان النور بيروح و بيجي مع السرينا
يعني الحمد لله ربنا اكرمني في الحادثة بأصابات ليست بالشديدة الأساتذة كان نفسهم في حالة ساكتة قلبية
الدكتور لما فشل في انه يخدني عافية معاه للمستشفي كتبني اقرار و نزل يتفرج علي العربية وطلع بيحاول يقنعني بقي فبيقول اه يابني انا نزلت ادور علي دم انت ازي طلعت منها
تاني هام مفيش ونش علي الطريق
طريق الساحل كله عليه ونش واحد بس و كان في حادثة تانية
الي بجد لهم كل الشكر و التقدير هما العرب
اما المرافق بتاعة الدولة فممكن تعزي الوزارات عليها
و قال ايه بيقولو الضرايب
دنا لو مسكوني مفتي ححلل التهرب من الضريب
سلامي و سلامتك و تقوملنا بألف خير و سلامة
اه
لو بتتكلمي علي سواق الأتوبيس
عندنا في اسكندرية لو عدو شهداء حرب 67 النكسة مش النصر 73 حيلاقوهم قربو علي التساوي من الي بيدغدغو علي الكرنيش
و ديت الميت و لا المدغدغ 100 حتة ما لا يزيد عن 90 جنيه غرامة و هو وشطرتة من نص ل 24 ساعة حد اقصي في النيابة هو وواسطته

اجندا حمرا said...

وحشتينا يااوسه

شدي حيلك كده بركه انك بخير و انشاء الله حتقومي بالسلامه من العمليه و تكوني احسن من الأول كمان

دعواتنا كلها معاكي ياجميل و ربنا يقومك بالسلامه و ترجعلنا بالسلامه

و يتمم شفاكي علي خير ياجميل

momken said...

الف سلامه عليكى
وان شاء الله لما تقومى بالسلامه
نشتريلك بوت بدل الى اتفرتك
او كوتش الى يعجبك بقى

وكمان مليتين سرير بدل بتوع المستشفى

وكمان ازازتين زيت وكليو سكر تظبطى بيهم نفسك

تحياتى

ساعد نسرين الايمن said...

الف سلامة عليكي
ويارب تكون العملية اتعملت وتقاومي لينا بالسلامة يا اميرة
شعبك كله في انتظارك

رجل من غمار الموالى said...

ربنا يشفيكى
وترجعلمشيك الطبيعتك
...........

شقاوة شعب said...

انتى هتقوليلى ع المستشفيات الحكومى والمهازل اللى بتحصل فيها

يا خباااااار

كنت مرة مع واحدة صحبتى فى عربية الاسعاف وعايزة اقولك ان ماكنش فيها اى حاجة تسعفها وماكنتش قادرة تاخد نفسها
لدرجة انى وقفت العربية فى نص السكة عشان انزل اشتريلها ماء من السوبر ماركت
يعنى حتى ابسط متطلبات المريض "الماء" ماكنش متوفر
حاجة مسخرة بصراحة

يالا الف الف سلامة عليكى

تحياتى
شيماء بشرى

Alexandrian far away said...

يا ويلي
كل ده يحصل وأنا ما أعرفش وما أعلمش
ألف مليون مليون سلامه
فعلا أفتقدناكي وأفتقدنا موضوعاتك
أتمنى أن الأزمه الصحيه دي تعدي وتتحول لذكرى اليمه من الماضي وتنوري عالم التدوين تاني
وربنا يحميكي من مستشفيات الحكومه المرعبه وعالمها الخفي

تحياتي

أُكتب بالرصاص said...

ألف الحمد لله على السلامة

صورة قاتمة جدا للحاصل في بلدي
وعليه العوض

سلامة رجليك
وإن شاء الله ستكونين بخير

ولكن البلد مش بخير أبدا

مش عارف نواسيكي والا نواسي انفسنا

لكن الموضوع دا لازم يوصل لكل المسئولين
وخصوصا
وزير الصحة
لذلك انا هأنشره عندي في حصاد المدونات
علشان عارف ان حاتم دايما بيجي عندي كتير

Arabic ID said...

ألف سلامة عليكى

وشى وحش عليكى ... أول مرة أدخل على البلوج بتاعك الأقيكى عملتى حادثة

طيب يعنى أستخبى فين؟؟ ، ماتبلغيش عنى بس . أنا والله طيب وجيت بالكليك اليمين حتى

يجعل قدمنا عليكى خفيف وتقومى بالسلامة
الإصابة فى القدم بتبقى صعبة ..

ربنا معاكى ويطمن أهلك ويطمنا عليكى


تحياتى "دوسه" ... قصدى أوسه

كوكو الضعيف said...

زميلتي العزيزة في التدوين
علي الرغم من انها المرة الاولي لي في مدونتك المحترمة
الا انني اشفق عليكي كثيرا مما مررت به من تجربه جد قاسية
اتمني لكي سرعة الشفاء وحياة مديدة ومليئة بالسعادة واالحب والهناء

Sherif said...

الف سلامة ليكى .. كيف نقوم بواجب .. واى مستشفى هى ؟

ارجو الافادة

همس الليل said...

حلمت بيكى يا اوسا
والله كنتى زى الفل يا اخوتشى ههههههههههههههه
والله مش هزار حلمت بيكى وكنت كويسه بجد الف سلامه عليكى من قلبى

عايزه احضنك والله واقولك الف سلامه عليكى عارفه الاحساس دا اختى حصلها حادثه وكنت هموت من الزعل
بس الحمد لله وزى الفل وعندها عمر كمان هههههههه
عقبالك ههههههههه
لاء عقبالك عمر مش الحادثه

انشاله تقومى بالف سلامه قريب يارب

Bedo_pasha said...

الف سلامة عليكى
كان نفسى اول تعليق ليا يكون احسن من كده
واكون بباركلك فيه
لكن ان شاء الله تقومى وتبقى زى الفل
تانى مرة الف الف سلامة
والمؤمن ديما منصاب
سلامتك وان شاء الله تكونى دلوقت بخير
سلاااااااام

Desert cat said...

ربنا معاكى وترجعى لنا بالف سلامة

مسلم مصري said...

أسأل الله لكي الشفاء والعافية وأن يجعل عذاباتك في دكاكين وزارة الصحة في ميزان حسناتك.
مع الأسف هذه هي مصر التي نخر الفساد عظمها. الغلا والكوا وكتر الهموم والآلام قسوا قلوب الناس. خلاص أغلب الناس من كتر ما شافت من ألم بقت ما بتحسش. لكي الله يا أوسة ولكي الله يا مصر.

سنابل قمح said...

إزيك يا أوسه الف سلامة عليكي ان شاء الله تكوني بقيتي احسن وربنا يتمم شفاكي علي خير

shimaa gbeal said...

والله مش عارفة اقولك ايه علي اللي حصل ده لكن قلبي معاك يا قمر وربنا اكيد مش هيسيبك لوحدك وان شاء الله هتاخدي حقك تالت متلت وربنا يشفيكي وترجعي لمدونتك بمليون الف سلامة اختك شيماء.

Soooo said...

كل سنه وانتي طيبه يا اوسه
وربنا يرجعك لينا بالسلامه يارب





سلامووووووووووووز

starfish said...

wish you speedy recovery
please post anything or reply to any comment, show any signs that you are well..
from my experience and from what you describe, i know what you have been through is not easy and what you will be through won't be easy
take care

shabfa2re said...

الف سلامة
فكرتينى بالحادثة والذى مضى
بس حادثتك ما تجيش جنب حادثتى حاجة
كله واحد ومقامه

Soooo said...

كل يومين اخش اتطمن عليكي اقول يمك ظهرت
الاقيني راجع بخفي حنين
=====
يا اخواننا اللي يعرف اي اخبار عنها يطمنا وليه الثواب




سلامووووووووووز

shreen said...

حمد لله على السلامه
وربنا يعديك من المرحله دى على خير

ما قولتليش جبتلى الورل من سوق السيده عائشه ولا لسه

saso said...

يا حبيبتي يا بنتي
ألف سلامة عليكي يا أوسة

يارب تكوني بقيتي احسن

ألف سلامة عليكي يا سكر

GWAD said...

الف سلامة يا اميرتنا ، يلا بقى قومى بالسلامة ،امال مين الى حيقود انتفاضة 4 مايو غيرك، مش فارقة معانا بعكاز او من غيرة دة انتى القائدة .
القعدة فى الجبس يمكن تكون احسن من القاعدة على البورش يا اميرتنا..
شفاكى الله وعفاكى وترجعلنا من غير العكاز
تحياتى

Soooo said...

ياترى انتي فين يا اوسه
والله ليكي وحشه


ربنا يرجعك بالسلامه يارب





سلامووووووووووز

على باب الله said...

الف سلامة عليكي

و إن شاء الله يتمم لك الله الشفاء

---

Soooo said...

النهارده باقلب في المواضيع القديمه بتاعتي لقيت موضوع القطط اللي كنت مربيهم ولقيت تعليقك
والله ليكي وحشه


ربنا يرجعك بالسلامه يا اوسه




سلاموووووووووووز

gannah said...

كده اول ما الواحد يزورك يلاقى مستشفيات وجبس ومسامير....المرة الجاية عايزة افراح وزغاريد

عمرو النوبى said...

لا حول ولا قوة الا بالله
الف سلامة عليكى يا اوســـــة
ان شاء الله ترجعلنا بألف سلامة
وازمة وتعدى ان شاء الله
انما حكاية المستشفيات والكلام الى قولتيه
فمعنديش اى رد غير
حسبنا الله ونعم الوكيل فى كل ظالم

ِِAdem El-Mahdy said...

شافاك الله و عافاك

Soooo said...

ياجدعان اللي يعرف اي معلومات عن اوسه يطمنا عليها

البنت مختفيه بقالها فتره
اي حد يعرف اي حاجه يقول

Mohamed Dawod said...

البنت دى دمها خفيف قوى يا جدعان حتى فى عز المها خساره ان انا مش دخلت مدونتها من بدرى خصوصا ان واضح انها نوبيه زيى .....ربنا يقومها بالسلامه وياريت حد يبقى يطمنا عليها لان واضح انها مش دخلت من بعد العمليه.....أخاف يكون وزير الصحه انتقم منها

Desert cat said...

الف حمد الله على سلامتك
انا مصدقتش نفسى لما شوفت تعليقك منور عندى
طمنينى عنك اخبارك ايه
مستنية بوست جديد اطمن فيه عليكى
محبتى يا احلى اميرة

USpace said...

.
FREE Kareem! God Bless you Kareem, you are a hero for freedom. Millions of people are with you in spirit.
You are not alone. Many people are working to get you out. You will get out. Someday there will be a movie about your story. Please stay safe. We love you!
.
absurd thought -
God of the Universe says
apologize to evil

religion is not at fault
all prophets' words are good

.
absurd thought -
God of the Universe says
surrender to jihad

sell out your great grandchildren
so theirs live Taliban life

.
absurd thought -
God of the Universe says
don't tell the truth

evil men will jail you
kill you to protect their lies

.
absurd thought -
God of the Universe says
don't destroy the new Nazis

exterminate their death cult
expose sick evil prophets

.
Campaign To FREE Kareem!
.
Mubarak Fears Islamist Nazis in Arabic
.
Hard To Swallow Blog in Arabic
.
Philosophy of Liberty Cartoon
.
Help Halt Terrorism Today!
.
USpace

:)
.

Soooo said...

اوووووووووووووسه
انتي فيييييييييييين يا اووووووووووسه

حدش شاف اوووسه ياجرعان
شفت اوووسه يا استاذ
شفتي اوووسه يا اختشي

اللي يعرف حاجه عنها يطمننا ياخواننا

ياترى انت فين يا مرزووووق

Soooo said...

انا بعتلك سلام حاير طاير مع احدى القطط
جالك ولا نصبت علي وما وصلتلكيش حاجه؟؟؟؟


ربنا يطمننا عليكي يارب
ويلا بقى ارجعي نوري المدونه ونوري النت كللو بكلامك وبمواضيعك




سلامووووووووووز

St0rM-MaN said...

اول مره ازور البلوج بتاعك
السكه كانت طويله ! بس بصراحه يارتني ماجيت
انا جالي شلل خماسي بعد ماخلصت البوست الي انت كتبتيه ! مفيش بني ادمين خلاص ؟

المهم انتي كويسه دلوقتي , تحياتي

will said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول


أفضل  ألف  مدونة