أفضل  مئة  مدونة

Tuesday, November 07, 2006

عن ثقافة التحرش وأنتهاك الأعراض نتحدث


غرفة الفئران

يعتقد البعض أن التحرش ظاهره حديثه على مجتمعنا بل وصل الأمر لألصاقها بالفقر و أن التحرش نتيجه منطقيه لما تبثه علينا وسائل الأعلام والفضائيات من عرى وأغراء وأيضآ أدعوا أن الفتيات هن سبب المشكله بملابسهن المثيره وأن التحجب والعوده الى زمن المشربيه هو الحل بل ربما طالب الأخرين بؤد البنات فهن عورة للرجال ورجث ودنس لا يطهر حتى بمية النار
رغم أن التحرش موجود من زمن والمتحرش موجود فى كل مكان وزمان
على سبيل المثال و ليس الحصر أذكر هنا بعض أمثلة المتحرشين ليعلم الجميع وخصوصآ البنات عن خطورة المتحرش وخطورة السكوت عليه بأسم الحياء و عدم القدره على أبلاغ الأهل لخوفهم من العقاب
1
غرفة الفئران
فى المرحله الأبتدائيه صادفنا مدرس العلوم وأسمه جمال وكان شديد القسوه فى التعامل مع التلاميذ خاصة الأولاد والبنات ألصغيرات الحجم اللاتى لم ترسم الأنوثه ملامحها عليهن فكان يعامل الفتيات الأكثر جمالآ و يمتلكن مايمكن تسميته مجازآ ثدي بشىء من اللين والرقه ومع الوقت يتطور الأمر لتقبيلهن على وجناتهن وأحتضانهن أمام التلاميذ داخل الفصول بدون أستحياءو كثير ما كان ينادى على فتاه أثناء الفسحه فتختفى ثم تعود مع نهاية الفسحه وهى باكيه وعينيها تدمعان
أو تعود واجمه لم نكن نتخيل مايحدث معهن ولم تجرأ أحداهن على التحدث فقط شعرنا كأطفال أن الموضوع يتعلق بقانون العيب الذى تحدثنا عنه امهاتنا على أستحيأ وانتهت المرحله الأبتدائيه ونسينا الموضوع لكن تذكرناه ونحن فى المرحله الثانويه عندما علمناأن الأستاذ جمال قام بالتحرش بفتاه داخل مخزن بالمدرسه وقام بتعريتها من جميع ملابسها وملامستها بشكل موجع مما أضطرها للبكاء بصوت عال ثم الصراخ حتى سمعها بعض التلاميذ فأبلوغوا أحدى المدرسات التى أقتحمت المكان ومعها لفيف من التلاميذ لمعرفة ماذا يحدث فى غرفة الفئران كما كانوا يطلقون عليهاوفؤجأ الجميع بالفتاه عاريه والمدرس يكشف عن ذكره فكانت فضيحه وتم عمل تحقيق وبدأت الفتيات فى التحدث حيث أتضح أن الأستاذ جمال أستحل ما يشتهى من الفتيات ولم يردعه صغر أعمارهن وقامت بعض زميلاتى بكشف المستور بألاعتراف لى بتعرضهن للتحرش فى غرفة الفئران قامت الأداره التعليميه بفصل الأستاذ جمال ورغم ذلك ماذلت أذكر هذه الواقعه التى راح ضحيتها فتيات صغيرات على مدار سنين طويله وأتذكر جملة أحدى زميلاتى عندما قالت لى أنه برغم مرور سنوات ألا أنهاماذالت تشعربالأستاذ جمال يتحرش بها فى غرفة نومها وهى نائمه فمن يعيد لهؤلاء الفتيات طفولتهن المغتصبه هذه أحدى االوقائع التى حدثت ربما حدثتكم عن مستر على و زملائه الذين تلاعبوا بفتيات أحدى مدارس التعليم المتوسط والتى ضمت بعض زميلاتى وأقرانى فقط أذا وجدت الكلمات المناسبه وهذه محاوله لتحطيم جدار الصمت الذى تقبع خلفه الكثيرات من الفتيات والنساء

54 comments:

Shower-Mirror said...

كلام مظبوط .... طبعا التحرش مش مرتبط بمستوى معين و لا مجتمع معين ... حتى فى الدول المتقدمه و المتحرره جنسيا هناك التحرش بكل صوره ...ضد الاطفال و النساء ..

بس انا عايز احكيلك عن تحرش مختلف ..احد زملائى الاكبر سنا حكى لى عن تجربه فظعه .. حينما دخل بعد منتصف الليل الى غرفه ابنه الصغير -12 سنه - ليجد خادمته و عمرها 35 سنه و هى عاريه تماما ...!! و ابنه - الطفل يمسك صدرها باحدى يديه و يديه الاخرى بين فخديها ...!!

لم يصدق عينيه و انطلق يكيل اللكمات للاثنين و الطفل يصرخ : هى اللى كل يوم بتخلينى اعملها كده ...!


اعتقد انى و صلت لمرحله من التناحه فى البلد دى ...!! لم يعد شئ يدهشنى على الاطلاق .......

***********************

فين يا أؤستى الصوره القديمه ام مهلبيه ؟؟ خلاص رمضان خلص ...:)

********
بطلتى تزورينى ليه ؟؟

Epitaph said...

موجعة اوي يا اوسة


و مازال التحرش مستمرا في الشارع و و سائل المواصلات وووو بس مين يتكلم يا اؤختشي :)

تحياتي

واحد من الناس said...

التحرش مرض وخروج عن الطريق الصحيح ولعلاجه يجب العوده للطريق السليم
الا وهو الدين

lastknight said...

ألأميره أوسه
ماوصفتيه هو نوع من الشذوذ الفردى .. المرض .ز و طبعا يحميه عيوب مجتمعنا التى تظلم الضحيه عادة قبل أن تحاسب الجانى .ز أما التحرش فى وسط البلد فهو نوع من الغوغائيه الجماعيه .ز نوع من فوضى القطيع الذى يتحرك بغريزه انتحاريه .. يظلم و يعتدى بكل جماعى .. ولا يفرق بين مستحق للعقاب أو مظلوم .. ماحدث كارثه أكبر بكثير من الحوادث الفرديه

film69 said...

أوافقك أن التحرش قديم قدم المجتمع
من قصص المدرسين إلى الباعة والجيران والأقارب وغيرهم
لكن ظل التحرش الجنسي لسنوات طويلة من التابوهات المسكوت عنها
ربما الفائدة الوحيدة لما حدث في وسط البلد هو فتح هذا الملف على مصرعيه ودراسته زالبحث عن حلول بعد كل سنوات الصمت
اختلف مع رأي واحد من الناس في أن الحل الوحيد هو الدين
يعني إيه ؟؟ا
أنه يشبه اللافتة التي يرفعهوها وقت الإنتخابات " الإسلام هو الحل "
برضه يعني إيه ؟؟ا

ody911 said...

حطمى يا أوسة ومالوا
هيه يعنى مشكلة
ماهو لو كل واحد متجوز مش هنشوف حاجة زى كدة
مع إنى فى ناس متجوزة وتفصة برضوا
بس أقولك إيه ؟؟
وأعيدلك إيه ؟؟
دور علية دور
أغنية
وعادى بقة
أودى

sendrlla said...

الاميره اوسه كلامك جميل اوى فعلا والتحرش مش جديد بدليل ان لو كنت بنت دورت فى حياتها من وهى صغيره هتلاقى نفسها كانت بتخاف وما زالت من اى ولد يعدى عليها وخاصه لو كان ولد من مستوى ثقافى معين او ولد مشهور انه مش كويس وتلاقى البنت دا تبعد عن المحلات اللى بيقف فيها ولاد او شوارع مشهور ان بيقف على نصيتها شباب وحاجات كتير من دى التحرش موجود من زمان واساسه انعدام العقائد الدينيه وغفله الناس عن الاسلام واهتمامهم بالماده والشهوه عن حاجات كتير

Barracuda said...

والله يا أخت أوسة لو فتحتى " غرفة الفئران " دي لتلاقي فيران كتييير قوي تطلع علينا ولاد وبنات.. رجالة وستات ..ماحدش بيفلت يا حبيببتي .. كل البني أدمين عدت عليهم بلاوي من دي أو على الأقل شاف أو سمع فار ولا اتنين من دول !! ... بس موضوع حلو وحساس وفكرنا بالذي مضى !!!( على طريقة ماري منيب أه هاهاااااا)

أما الأخ shower-mirror
طبعا أكيد البنت ال .... مسكينة دي طردوها .. شردوها .. أه يا جبابرة .. مع أنها بتثقف الولد بخبرة حياتيه مهمة جدا جدا بدل اصحابه ما يبوظوا دماغه بحاجات مش صح !!! ممكن تقولي هي فين !!! أصلي ..بصراحة... لازمني شغالة وخاصة إنها خبيرة فئران .. يعني تعرف تنظف كويس

حياكم الله حبايبي

Rasha said...

يا اوسة البوست موجع جدا وللاسف موجود بين كل شارع وفي كل منزل
المتحرش هو شخص مريض ولا يعرف مرضه
وللاسف السكوت هو التصرف الصحيح مع هذه المواقف في مجتمعاتنا فاذا قالت البنت لامها ان ابوها بتحرش فيها فالام بتسكت وبتخلي بنتها تسكت والحاجه دي موجوده والمتحرش هو شخص تم التحرش فيه من الصغر الامر اصبح
افه والمشكلة ان الموضوع دا ما حديش بيتكلم فيه موجود في الغرب بشكل كبير بس اتكلمو فيه كتير اما احنا فهو محظور من المحظورات يجب ان تتم معاقبة كل هؤلاء الحيوانات الذين يجردون الحياء والطفولة
ويجب ان يكون هناك حرية اكبر للتحدث بشكل علني

لان من منا لم تتعرض للتحرش بشكل او باخر خلال حياتها
المرض موجود ولم يقضى عليه والمرضى متخفين تحت اقنعه ومناصب قد تكون دينية او تعليمية وغيرها ويكون الستار الذي يمارس بها هذه الجرائم

اوسة البوست جامد
وكان لازم يتفتح

Aoossa said...

شاور ميرور
مراية الحمام
فعلآ أنا أسمع عن وجود متحرشات من النساء
لكن قلة والتحرش هو فعل قبيح ومؤلم
لما يتركه فى نفسية المتحرش به من رواسب قد تقضى عليه
الصوره الجديده مش حلوه ده نيولوك من باريس
==============
أبيتاف الرقيقه جدآ
على كل منا أن يطلق صفارات الأنذار عند رؤية المتحرش
لأن الخجل يشعر المتحرش بأن الضحيه مستمتعه
الخجل مرض
================
واحد من الناس
مش الدين لوحده
التربيه والمجتمع الصحى ليه دور
المصارحه بين الأبناءوالبنات من جهه وذويهم ليها دور كبير
===========
الفارس الاخير
صدقنى التحرش فى الغرف المغلقه وفى سنين مبكره أشد وطأه وألم
لأن بينزع البراءه من وشوش الأطفال
لكن التحرش بتاع وسط البلد ممكن السيطره عليه بعربية أمن مركزى
لكن تحرش الكبار بالأطفال يتعالج أزاااااى؟؟؟؟؟؟
=======================
film69
بصراحه تعليقك أكثر من رائع
فعلآ موضوع وسط البلد فتح تابوه
ويمكن أستغلاله بطريقة أجابيه
المتحرشين موجودين فى أكثر الشعوب تدينآ
=====================
ody911
هههههههههههههه
أنت بتغنى
تخيل المتجوزين هم المتحرشين الكبار
أستاذ جمال بتاع العلوم كان متجوز وبناته كبار
الظاهر الجواز بيفتح نفسهم على الكتاكيت الصغيره
أوعى تكون متحرش
كنت فين فى العيد
أعترف
=================
sendrlla
أهلآ بيكى فى مملكتى الصغيره
عندك حق كل بنت فى ذاكرتها متحرش
عارفه سكوتنا هو اللى بيطمع المتحرشين
تخيللى لو المتحرش وقع فى بنت لسانه طويل
وده بيحصل ، أعتقد أنه ممكن يحرم يضايق بنت مره تانيه
مرحب بيكى دايمآ
======================
Barracuda
التحرش بالبنت ممكن يضيعها
وفى بنات أتعرضوا لتعذيب أثناء التحرش
الوضع أصعب
بالنسبه للشغاله شاور خدها تشتغل عنده
أصله بيخاف ينام لوحده
===========
رشا الجميله
الرجاله كلهم فى مصر والشباب بيقولوا
رشا كانت فى مصر
وعاملين مظاهره
أنت سحرتيهم بعيونك يا جميله
تحرش ألمحارم ده أصعب أنواع التحرش
وللأسف موجود فى منطقتنا العربيه
الأسبوع اللى فات حدث جريمتين فى مصر لوحدها
اب وأبنه بيمارسوا مع الأبنه لدرجة حملها سفاحآ
و لا تعلم من أبو الطفل هل أخوها أم والدها
حادثة تانيه أخ يغتصب أخته الصغيره
فى المطبخ
طبعآ ما خفى كان أعظم
وده أغتصاب وممارسات محرمه
مابالك التحرش اللى فى الغرف المغلقه
أسكتى يا أختشى
أصوت

واحـــد مـــــن الـنـــاس said...

يا اوسة ده حالة شاذة
راجل مريض
لكن مينفعش نحكم على الناس ونقول ان التحرش منتشر عشان شفنا حالة شاذة

على فكرة انا بؤيدك ان التحرش غير مقتصر على فئة معينة او لاسباب معينة ...انا كتبت رد طويل اوي اوي في مدونة سوسة المفروسة ..ابقي شوفيه لو حبيتي

Reformer1976 said...

وجعتي قلبي يا برينسيس أووسة
أنا بقول ترجعي أحسن للبوستات المسخرة من تاني
أرحم من جرعة وجع القلب اللي أفجعتينا بيها دي

بس بالرغم من وجع القلب دا شكرا ليكي على فتحك هذا الخراج المقرف
لعل كل قيح وصديد في خراريج هذه الأمة تبدأ تنضف بقى

على فكرة يا أسئوستي
لقد غيرت اسم مدونتي من كفاية حرام إلى لسة فيه أمل
ليه بقى؟
مش عشان واخد شريط حبوب تفاؤل ولا حاجة
ولا هو هروب من الواقع ابن اللذينا اللي احنا عايشينه

بس بجد لأنه بالرغم من كل القرف ده لكن مازال لكلامنا وجهودنا فائدة
يمكن ما نشوفش التغيير بالكامل في حياتنا بس اللي واثق منه أنه أولادنا هيعيشوا حياة أفضل
(دا طبعا بفرض إننا مش هنيأس ونسيبها لهم مخضرة!) أنا مصر إن لازم يكون فيه أمل
مش باسمي دا تفاؤل وإنما باسميه إيجابية

المهم
سيبك م الحنجوري دا كله
فين قزازتين الكودافين يا بت انتي اللي قلتي هتجيبيهم لي؟
أنا خرمان جدا وبقالي كتير معملتش دماغ نديفة
الهباب دا الكلة مع شريط الفلورست على حبايتين السيردالود ما بقوش بيجيبوا نتيجة
ابعتي الطلب بسرعة حيات أبوكي يا شيخة

يلا باي

ROMIL said...

هو مجرد بدايه لسقوط قيم المجمتمع تليه سقوط مدوي للنظام القائم
ROMIL

زعرورة said...

بما ان الحاله بقت منتشرة بالشكل القاتل ده

يبقى قبل علاج الناس دى او قمعها او جمعها فى محرقه كبيرة تنضف المجتمع منها ومن قرفها

اقترح يبقى فيه توعيه للابنات


كل بنت من اول ماتبدأ تفهم كده لازم تتعلم تتصرف ازاى اذا حد حاول يقربلها

والتوعيه تبدأ فى التعمق مع كل سن بقى لحد توعيه المسنات !

جتهم القرف خلونا نشك فى كلام الست سعاد

فرحانين اننا اتولدنا بنات !!

ربنا ع المفترى

salateenoo said...

هذا اللينك لفيديو جديد عن أحداث وسط البلد .. أرسله إلى كل الغير مصدقين لما حدث ويقولون انه مبالغة من بعض الأفراد :

http://www.youtube.com/watch?v=B2SGamUeMec

salateenoo said...

هذا اللينك لفيديو جديد عن أحداث وسط البلد .. أرسله إلى كل الغير مصدقين لما حدث ويقولون انه مبالغة من بعض الأفراد :

http://www.youtube.com/watch?v=B2SGamUeMec

شــهــروزة said...

اسئووووووستى
حمدللة عالسلامة يا حبيبتى
نورتى مدونتك تانى يا حبيبة البى
-----
تعرفى؟
لو كل بنت فى مصر والدعلام الشرقى كله كسرت حاجز الخوف والخجل
وحكت عن تجربة تحرش اتعرضت لها
او شخص واحد تحرش بها
حتلاقى فيضااان من المتحرشين
والاغرب
انك حتلاقى الاقربون هم الاسبق
يعنى
ابن العم
البن الخال
العم او الخال ذات نفسه
ابن الجيران
او الجار الكبير
المهم
اى واحد ميخطرش على بال الاسرة السعيدة الغافلة
وبالطبع حياء البنت يمنعها من فتش السر
----
مدير العمل بيتحرش بالموظفات الصغيرات اللى محتاجات مرتباتهم للمعيشة المرة

صاحب العمل بيتحرش بالعاملات فى المحل عنده علشان البنية محتاجة لقمة العيش ومش حتقول لااااء

حتى الوزير تلاقيه بيتحرش باللى اقل منه والحماية
منصبه

واللى تتكلم تبقا هى اللى شجعته فى نظر المجتمع
ولاو راجل دفيان وواصل
يلفق لها قضية اّداب جاهزة علشان تسقط قضيتها
لانها اصبحت مومس
يعنى تستاااهل كل اللى يجرى لها وعلى راسها وراس اللى جابوها


مجتمع ذكورى قذر
حتى المومسات فى الدول الاوربية وامريكا
لا يمكن اجبارهن على التحرش
ولا الاغتصاب
حتى لو مومس
تاخد حقها من عين اتخن تخين فيهم
الا هنا
هى اللى تستاهل طالما هى بنت

---------
معلش طولت عليكى
بس الموضوع من يومه خانق الكل وفتح ابواب كتير ومن كل الاتجاهات
والغبى او الاحمق هو اللى ينكر كدة
او يدفن راسه فى الرمل
--------
وحشااانى اوى اوى
اموااااااة لعيونك يا حبيبة البى

صفصف لادي said...

اشكرك انك فقعتي دمل الوساخة و الخجل المسيطرين على كل كلمة بنقولها و كله تحت مسمى الدين و العيب و الحرام
و الدين والله برئ من كل الوساخة دي
المهم

التحرشات و الانتهاكات دي بتحصل بكذا شكل و بكذا طريقة
لا حصر لهم
لكن امتى نتكلم عليهم جهارا نهارا و الناس توعى

اشكرك تاني و احييكي

سلام

Aladdin said...

متفق معك تماما يا أميرة! الموضوع لازم يدرسه شيء منقرض في البلد اسمه "علماء الاجتماع" اللي ما قريتش ولا سمعتش ان "واحد" منهم اتشملل وطلع وقال تحليل لهذا الوضع المستفحل!!

Anonymous said...

هاي يا اوسه


عايزه اقول لك برافوا عليكي بجد انك ناقشتي الموضوع دا

الحقيقه انا نفسي اتعرضت للموضوع دا قبل كده
وعايزه اقول لك انه اتسبب لي في مشاكل نفسيه سيئه جدا
وخلاني افقد الثقه في نفسي وفكل اللي حواليه


الانسان اللي بيعمل كده مريض بكل معني الكلمه
بس الغريبه انه بيبقي طبيعي وناجح في شغله جدا
انا مش عارفه ليه الناس لغاية دلوقت بتعتبر البنت هي السبب

3rby said...

اول حاجة انا مش مقتنع بان الحجاب يقترن بالمشربية(اتفهمت قبل كده غلط)بس برضه حتي لو البنت لابسة من غير هدوم ده مايديش لحد الحق في اغتصابها
ثانيا:انا اللي بقيت باقشعر لما اسمع عن ناس مريضة زي كده...مش عارف ايه لزة الجنس مع واحدة خايفة وقرفانة وبتعيط..ايه لذة الاغتصاب اصلا...ده فعلا انسان مريض

tota said...

العزيزة اوسة
دائما يكون سرد الواقع بمراره مؤلم
وكعادتك بمنتهى السخرية التى تقطر الما فتحت التابوت المغلق

فتح التابوهات المغلقة كان لابد ان يحدث من زمن قبل ان يصبح الامر بهذه الصورة
قبل ان تتعرض كل انثى فى بهية لاى نوع من انواع التحرش سواء باللفظ او الفعل
غياب ثقافة الدفاع عن النفس تجاه اى اعتداء
الخجل الذى يحوم حول التابوهات
برغم التطور والانفتاح والاباحية الا ان فتح التابوه ظل لفترة طويلة من المحظورات والنتيجة هى غرفة فئران فى كل منطقة مع اختلافها

متصورة لو كل انثى تعرضت لهجوم اى كان نوعه واخذ الجانى عقابه لاصبحت الحالات تعد على الاصابع وليس العكس
اتصور لو كل رجل غيور ساند انثى تعرضت لموقف دون ان يلقى عليها تبيعة الموقف ما خجلت ان ترشد وتشير الى المعتدى
متصورة ان اصل الموضوع هو الذكر وليس الانثى
هو الذى يخطأ ويلقى بتبعية خطأه على الانثى فى مجتمع تسود فيه حرية الذكر وتقيد الانثى

يا سادة يا رجال ايقظو نخوة الرجولة فى انفسكم
يا سادة يا رجال الحلال بين والحرام بين
يا سادة يارجال لماذا تقاوم شهوة الخمر وشهوات اخرى كثيرة برغم ان البارات والخمارات متاحة ولا تلقى تبعية هذا على وجودها كما تلقى تبعية التحرش على الانثى المتبرجة
يا سادة يا رجال ارحموا المجتمع من سلبيتكم المفرطة اى ان كان موقعكم سواء امنى او اسرى او حتى كمجتمع
يا سادة يا رجال عودوا مرة اخرى رجالا بالفعل لا بالاسم

ولا عزاء لبهية بعد ان مات رجالها الا ما تبقى

واسفة على ما وصل اليه الحال

Aoossa said...

واحـــد مـــــن الـنـــاس
صدقنى لو قلتلك أن التحرش فى المدارس
يفوق التخيل خاصة أن المتحرشين يفضلون الأطفال وصغيرات السن
أنا عندى حكايات كتير وكل بنت عندها ألف حكايه من يوم ماتتولد لحد ماتكبر
أنا قريت تعليقك عند سوسه بنت خالتى
أشكرك

Aoossa said...

Reformer1976
أنا أخدت بالى من تغيير أسم المدونه
وأنا بحاول أطبقها أن الأمل موجود لو اتكلمنا
أنت واحد من الناس أشتغلت كطبيب فى مستشفى وأكيد فى تحرشات من جانب الأطباء على الممرضات أو العكس
لازم تشارك بفتح الملفات المقفوله
زى ماتكلمت قبل كده فى تعليق عن الأهمال فى المستشفيات
لازم الناس تفهم وتعرف
أتفضل شريط أبتريل على الماشى

Aoossa said...

ROMIL
ممكن التغلب على مشكلة التحرشات
بالمواجهه
نظام أيه اللى هايسقط يا راجل يا طيب
ده أحنا اللى خلاص سقطنا

Aoossa said...

زعرورة
التوعيه لوحدها مش كفايه
لازم نتكلم ونصرخ
لازم نلغى الحياء فى المواضيع دى
نتعلم أننا منخافش من المواجهه
المتحرش أنسان جبان ومن السهل التغلب عليه بأى وسيله
يا ست البنات

Aoossa said...

salateenoo
انا شفت بنفسى التحرشات دى فى العيد
من كام سنه وكانت أعدادهم كثيره
عشان كده مصدقه
ده تحرش موسمى
مبالك بالتحرشات اليوميه

Aoossa said...

شهروزة
أزيك يا عسل
طبعآ تحرش الاقارب موجود
أبتدأ من الجد لحد الأب والأخوات
وده الأخطر والأسؤ
والحمدلله أن مش كتير
أو حسب علمى
بس الأسبوع اللى فات كان حادثتين تحرش من العيار التقيل والضحايا البنات والمتحرشين أب وأخ والنتيجه وصلت لحمل سفاح
لازم نتكلم ونهدد المتحرشين أننا بطلنا نخاف ونتكسف
أنت عارفه أن المتحرش لما بتكون الضحيه ساكته بيعتبرها مستمتعه
أتكلمى وقوللى وأصرخى يا شهروز
يا لهوووووووووووووووووى
أيوه كده
أموه يا جميلة مصر

Aoossa said...

Hafsa
الجميله حافصه
السكوت علامة الرضا
أذن مانسكتش ونصرخ ونتكلم ونبطل خجل
لازم البنت تفهم وتعرف ولازم كمان رسالتنا توصل للرجاله المتحرشين
أننا بطلنا نخاف
تحياتى ليكى

Aoossa said...

Aladdin
عمرى ماسمعت عن أختراع فى مصر أسمه علماء أجتماع
أحنا كمدونين قادرين على المواجهه
صرختنا هاتوصل للناس
اللى بدأ الحمله دى مدونين
و مهم نستمر

Aoossa said...

Anonymous

كلنا أتعرضنا للتحرش
والمتحرش ممكن يكون أى أنسان بغض النظر عن ثقافته
المهم نتعلم نواجهه
والبنت مش مشكلتها أنها اتولدت بنت
ولا لها ذنب فى أى تحرشات بتتعرضلها
ذنبها لو سكتت أو خافت تتكلم

Aoossa said...

3rby
أنا مقصدتش الــحــجــاب
أنا قصدت ألــتـــحــجــب
والأحتــجــاب عن الناس
أكتر بنات معرضه للتحرش بيكونوا دون العاشره يعنى معندهمش أنوثه ولا أغراء
الأغراء الوحيد للمتحرش هو عدم قدرتهم على الكلام
مرحب عربى عامل أيه فى المذاكره

Aoossa said...

tota
أنا دايمآ فى أنتظار تعليقك سواء عندى او عند أى مدون ودايمآ وجهة نظرك فى محلها فاكره تعليقات الناريه أثناء حرب لبنان الأخيره ونظرتك الشموليه
اللى بتقربنا من الحقيقه
لازم التابوه يتحطم
وأى متحرش يفكر ألف مره قبل مايتحرش بفتاه خاصة أن التحرشات فى معظمها بتكون موجهه ضد بنات صغيرات السن لا حول لهن ولا قوه
عشان كده مهم أننا نبدأ أحنا
ونكشف الحقائق والمستور من سنين
ونحفز همم الرجال المحترمين فى الدفاع عن أى ضحيه
لازم الأم تسمع لبنتها وتصدقها ومتجيبش اللوم عليها لمجرد أنها بنت
تحياتى يا فيلسوفة التدوين

شــهــروزة said...

أيوة يا اوسا
لازم كل بنت فى المجتمع القذر دة تصرخ باللى حصل لها
على الاقل تحمى بناتها فى المستقبل
والا يبقا ندفن بناتنا احياء وقت الولادة احسن
وترجع عقيدة ان البنت عار على اهلها
لان الاهل غافلين عن حمايتها
ولو المسكينة اتأذت وغصب عنها تبقا برضة هى المذنبة
الحادثة الوسخة اللى حصلت دى
اغلب المدونين ارجعوها الى ان البنات تستاهل
شفتى؟
حتى الناس اللى قلنا انهم ممكن ينظروا للواقع نظرة حقيقية وموضوعية؟؟
يعنى فى كل الحالات الضحية هى المذنبة
ولو سكتت وانكتمت
تبقا مبسوطة ومستمتعة وسوق فى ام الهبل بتاعك وزود العيار
ياعم دى ساكتة ومبسوطة
دى بنت كلب فاجرة
يعنى فى الحالتين مجرمات
مذنبات
عالات على المجتمع
جوارى
اعتبرونا ملاكات الأيمان


لسة الغرغرينا فى الجرح
ولسة الجرح عاوز جراحة كتير يا اوسااا

ونزولا على رغبتك
حأصوت بالصوت الحياااانى
يا لهوووووووووووى
ألامن مجيب؟؟
ولا حد حيعبرنا يا بنتى

ام العيال said...

اوسا العزيزه
الموضوع اكبر من كده بكتير دائما بنقول فلان اتحرش بفلانه
طيب لما فلانه الكبيره العاقله تتحرش بفلانه تانيه ضغيره يا عيني مش فاهمه ده ايه؟؟؟
صديقتي حصل لها ذلك
تخيلي مش بس الرجاله الي قللات الادب و عايزين ربابه في بنات برضه
فين ايامك يا اميرتي
وحشتيني
بس ارجعي للبوستات القديمه ملناش غيرك

المٌهَــــاجِر المَصْـــــــرى said...

لو سمحتى يا اوسا انت كنب فى مدرسه ايه؟
علشان بعد عمر طويل لوخلفت ونزلت مصر اعيش هناك ما اوديش البنت ولا الواد المدرسه دى
ولو تعرفى عنوان الاستاذ جمال ده يبقى ميه ميه وانا هاطلع.................

wanna b a bride said...

للأسف في مليون حكاية زي دي و لأن البنات بيخافوا يتكلموا

الحيوانات دي بتسوق فيها ...بيبقوا متأكدين ان ماحدش بيجيلوا الشجاعه عشان يفضحهم

هي دي ثقافة الفضيحة

Aoossa said...

شهروزة
يختشى عليكى وأنتى بتصوتى
أيه ده كروان بيشدو
كده المتحرشين ممكن يتلموا عليكى
فعلآ السكوت علامة لما البنت تتنيل تسكت وتتكسف
الله يرحمها أنشراح كانت جميله بس مكنش فيه راجل يقدر يتحرش بيها
عشان كانت بتشخرله على طول
تحياتشى وتحرشاتى

Aoossa said...

ام العيال
المتحرشات النساء موجودين ولكن عددهن قليل وحوادثه منفرده
بعكس الرجاله المتحرشين موجودين فى كل شارع وحاره ضلمه
فى السينما وفى الأتوبيس
وكمان فى البيوت
وحشانى العيال عاملين أيه
والراجل مش كويس كده

Aoossa said...

المهاجر المصرى
المدرسه دى مجرد مثال
لكن التحرش موجود فى كل المدارس
أبشر يعنى
أحسن خليك بعيد لأن أى مكان بيحترم فيه أدمية الناس
هايكون أفضل من مصر بوضعها الحالى

Aoossa said...

wanna b a bride
أهلآ بيكى فى المملكه
عشان كده أحنا لازم نتكلم عشان الباقى يتكلموا
البنات لازم تبطل الخجل والسكوت
وتتعلم المواجهه
تحياتى وتحرشاتى يا حبيبتشى

eshteraky said...

في الحقيقة البوست بتاعك بييجي ع الجرح
لنا عرفت بالموضوع بتاع التحرش سألت نفسي زمان كان الاناث بيلبسوا ميني جيب و بلوزات كت و كدة بس مكنش في ولا تحرش ولا يحزنون . امال الوقت اللي قيه نقاب و حجاب و عمرو خالد وحاجات كدة ليه في تحرش السؤال ده جرني لاستنتاج يبدو ملفق بس مفيش الا هو وهو مالخصة زياد الرحباني , الجوع كافر ,
تحياتي لمدونتك وانت
عمر

انى راحلة said...

يااااااه يا أوسة

وجعتينى أوى يا شيخة..ربنا ياخد الناس المريضة دى..لا يمكن يستوعبوا أو يفهموا هما بيأثروا على الضحايا دول أد ايه

أُكتب بالرصاص said...

المشكلة لما الحكومة تبقى عارفة ان فيه تحرش وتسكت ،
لا ومش تسكت
تقول لا .. بكل بجاحة زي البلطجي

إيـــــه
محصالش

يعني عرض بناتها هان عليهاللدرجة دي

ده بيسموه ايه !؟؟

ايووووه
بالظبط

ولما الحكومة تبقى ...لامواخذة ....مـ...

يبقى
على الدنيا السلااام

الصحافة فين..... التعليم أهه

شــهــروزة said...

اوساا
انتى مختفية فين يا بنتى؟؟
فين الجديد؟
معقول مشغولة للدرجة دى؟؟

فييييين الجدييييييييييييييد؟؟؟

تمر حنه said...

أووسه
لأ جامدة عليا دى - حقيقى بتوجع
مش قادرة أقول حاجة - الكلام متحاش
المهم .. انتى عاملة ايه؟

ام العيال said...

اوسااااااااااا
انتي فين بلاش غياب بقلق
اكيد مخبيا بوست جامد من بتوع زمان
ان شاء الله خير

3rby said...

قصدك انا اوسا بقالها حبة بتكتب بوستات هبلة
وان البوستات الحلوة كانت بتكتبها زماان

احنا جايين نهدي النفوس

Sampateek said...

مش قادرة اصدق
انا مكنتش في مدرسة بقى
و اللي اسمه جمال ده اترفد بس اللهي يتشك في معميعه
ده انا لو من اهل البت دي كنت علقته من ديله
يا ساتر يا رب
بجد شئ مقزز
ربنا يستر علي المسلمات
---
اوسا وحشاني طحن يا بنت الايه
فينك مش باينة
البرد هجم و نزلتي تحت اللحاف؟
ابقي تعالي اشربك سحلب سخن و تحكيلي اكتر عن المنيل جمال
قطيعة تقطع الشمامين كلهم
قبلاتشي
اموه اموه

Aoossa said...

شكررآ لكل من علق
وأعتذر عن تأخرى لأنشغالى
انتوا عارفين بقا أكل العيش
محدش بيكولها بالساهل

maged stephen said...

كنت فاكر أن دماغك متكلفة وفاهمةأن الموضوع فيه تهويل
يا خسارة

Anonymous said...

tab3an mafish shak 2en mesh elbanat homa elmas2oulin 3an elta7arosh ,,laken bardo mafish da3i nekhllet el2omour we n2oul 2en el7egab takhalof ,,, ya3ni e7na ded elmota3assebin fe elda3wa lel7egab we eli beykafaro kol wa7da mesh mo7agaba ,,mayenfa3sh bardo e7na nata3assab ded el7egab ,,el7egab fard mafish shak ,,,elma3sseyah fih warddah la2enena mesh malayka we kol wa7ed 2ebtella2o fe 7aga , ,,laken 2enkkar fardeyeto gher ga2ez ,,mesh lazem nekoun kolena 2adrin 3ala kol elfada2el ,,, we rabena beyeghffer ,,laken mayenfa3sh 3alachan e7na mesh 2adrin 3ala fard nenkero we natahem kol eli 2adrin 3aleh beltakhalof ,,,belmonasba ana mesh mo7agaba ,,, laken 3adam 7eggabi mayeddilish el7a2 2alghi fard men deyanti 3alachan a7es eni motamayezzah ,,yagouz tamayozi we tamayozek yekoun fe 7aga tania ,,we yagouz mofta7 ganeti we ganetek fe 7aga tania bardo,,,,laken el7egab fard she2t ana 2am 2abayt wa she2ti anti 2am 2abayti ,,,ta7eyati ,,, sherry bahi

ياسمين said...

أوسة
قريت البوست .. وهو بجد رائع ويكشف عن حقيقة مرة
المهم اننا عرفنا دلوقتى ان المتحرشين والمتحرشات .. للأسف وأكثرهن من الخادمات وأنا شخصيا أعرف حكايات عن الموضوع دة .. يتحرشون بالصغار لأنهم يختارون لخستهم الأطفال لضعفهم
المهم الحل
أول حاجة اننا نعلم ولادنا انهم يكونوا صرحا معانا
ثانيا نفهم الإشارات اللى بيرسلها الطفل عن أحد الأشخاص ونركز فيها مثل أن يقول دة وحش .. مش بحبه .. برغم أن هذا الشخص قد يبدو كشخص مثالى لنا نحن الكبار .. وقد يتشدق بالمثل العليا أو بالدين
ثالثا .. يجب أن نلاحظ الآثار السلبية للتحرش بطفلة وكيف يؤثر على شخصيتها فى المستقبل .. فتلك الطفلة غالبا تستسلم لأى ممارسة جنسية بسهولة من منطلق شعورها بأنها قيمة جنسية .. ودة كلام علم النفس .. فتكون عرضة للإنحراف

arab girlscool said...

This is such a nice addition thanks!!!
عرب كول
شات صوتيشات
شات مغربي
دردشه صوتيه
إنحراف كام
شات عرب كول
صوتيشات كول
دردشه صوتيه
سعودي كول

أفضل  ألف  مدونة