أفضل  مئة  مدونة

Wednesday, January 03, 2007

أولاد الشوارع 2

نفسى أبقا مدون
يا خروف العيد
نفسى أكل منك حته
أو فروة صوفك أعملها جاكته
نفسى أقول ماءءءءءءءءءءءءءء
زيك مش عارف
أصل أنا زيك أضحيه
نفسى أركب قطر الصبحيه
وأدخل مدرسة فى الحلميه
و ابقا زميل للطالب عربى
أيدى فى أيده و كتفى فى كتفه
واقفين فى طابور الثانويه
يا خروووف
نفسى أفطر كيك الصبحيه
و أروح من نفسى على الجامعه
وأقابل أبيتاف ونوران
ويحيونى أحلى تحيه
أصلى زميلهم فى الكليه
هههههههههه
يا خروف أسمع أرجوك منى
من تانى
نفسى فى كلبوزه تأكلنى
مهى زى أمى
و تدلعنى وتهننى
أنشاءالله تضربنى روصيه
أأأه يا دماغى
يا خروف يا ملك الأضحيه
ممكن تسمع منى شويه
من تانى
نفسى أبقا أشد مدون
ههههههههههههه
نفسى فى فارس بيه ينصحنى
أو جرجس ينادينى بصاحبى
كان نفسى شقير يبقا أبويا
أيوه أحمد باشا شقير
و أودى يندهلى بأخويا
هههههههههه
كان نفسى أبقا مدون
مش عارف ليه
يمكن علشان لو حد أذانى
دماغ ماك يعمل منها قضيه
نفسى أبو الليل ينادينى
أو سمراء النيل تدعينى
يا خروف
نفس لما أخاف أو أمرض
توته الدكتوره الزين تداوينى
ولما البرد يلفح بدنى
حفوصتشا الغاليه تغطينى
ياخروف
نفسى وأملى أبقا مدون
نفسى أشوف مكسوفه بعينى
وأتصاحب مع همس الليل
عاوز أزور سلامترو كافيه
أشرب كباية حلبسه
مع ساسو وأعمل بقا بيه
يا خروف نفسى اللف الدنيا
يا سلام مع سوسه المفروسه
أو شهروزه الحلوه النغشه
نتقابل ويا أم أحمد حلم
ونسمع لحكاوى فريده
والله يا جماعه أنا أنسان
أوعا حد يقول حيوان
ماااااااااااء
يا خروف بطل نطح شويه
أسمع أسمع بلاويه
نفسى أبطل شم الكله
واشم ريحة التقليه
أو حتى صوابع رجليا
نفسى فى بكره يحن شويه
مبقاش واد صايع كده وهافيا
ده أنا أنسان محتاج حنيه
نفسى فى بابا وماما
نفسى أما أغلط
بابايقولى عيب يا حبيبى
ويشخط فيا
ماما تحضنى وتصححلى الغلطه داهيه
أأه يا خروف منفوخ على الفاضى
أسمع بقا
هاتللى ودانك ألعب فيهم
نفسى أتعلم أبجد هوس
وأشترى كي بورد مع الماوس
وأقعد أدون أدون أدون
والناس تقرا كلامى وتضحك
هههههه هاهاها
أو تقراه فتبكى عليا
أهىء أهىء
نفسى أتعلم أبقا نياتى
وأعزف سيكا و مره بياتى
نفسى أرقص مع مايكل جاكسون
و أركب مرشيدس و دهاتسون
طيب أتعلم جمباز
أهو أرقص رقص أيقاعى
لو مخى من التعليم باز
أعمل أيه يا خروف
نفسى أبطل طبع الخوف
لما بنام على الأرض الناشفه
يجى البيه الباشا الظابط
و يروح هابد بالنبوت
طاخ طيخ طوخ
أأه يا جسمى
يناولنى مية علقة موووت
أعمل أيه يا خروف العيد
لما الدمع فى عينى يفيض
أعمل عيشه
طبعآ لا أشرب طبعآ كله
أأأه من الكله
أشرب منها أبقا وزير
تومين أو صحه
أبقا أى حد كبير
ممكن أبقا معلم
حلوه معلم دى
أو حتى أمير
يا خروف جرب تشرب كوله
بتخلى دماغى كده فله
وأنام وأحلم
وأعرف ستات وبنات قمرات
وأصحا على رجلين بدوسنى
أتلفت يا خروف فى البرد
مفيش غير الواد زاحبى
أباظا والواد ظاظا
على يمينى بشله وبزازه
وعلى شمالى
قطط نايمه كتيييييييير
والكل بيحضن فى أزازه
أأه يا خروف أضحيه
أحنا ضحيه
التوقيع طفل الشارع

118 comments:

Anonymous said...

it made me cry, Aossa!

we're real criminals..we did wrong to those young kids! I look at their eyes and remember the cosy atmosphere I enjoy at home with my sisters .. I see Heba going to school..whereas this little child is sleeping in rags in the streets!

Wallahy..I've seen a bunch of them will "Kulla",, I hated myself when I feared their attack on me and had to run away from them.. But I know..we had a hand in creating from a 8-year-old boy a monster!

we're the monsters,Aossa!!

Anonymous said...

sorry...forget to tell you
I only get my songs from here

www.6arab.com

that's the one i know!! :)

الأميره أوسه said...

how have a tendar heart as you not a criminal or monster.so don,t blame your self blame how have bower and authority and avoid to help them.we all victims.
im greatfull to read your comment

smraa alnil said...

اولا انا بجد مش قادرة اوصفلك اد ايه انا سعيدة انك ذكرتي اسمي في القصيدة الرائعه دي
بجد عجبتني اوي
ثانيا اللي ورا القصيدة دي مش عارفة بقي العيب في مين فينا ولا في اهلهم ولا ظروفهم ولا الحكومة ولا مين
مش عارفة مين فينا المجرم
بس ربنا يتولانا يا اوسا
وبجد مش قادرة اقولك اد ايه حسيت بالفخر انك ذكرتيني

الأميره أوسه said...

smraa alnil
أنا اللى فخوره أنك صديقه
أنت عارفه أن الجرايد حولت أطفال الشوارع لماده صحفيه خاليه من الرحمه
لكن كتير من المدونين تناولوا الموضوع بموضوعيه وشىء من الرحمه
بيقولوا عددهم بقا فوق المليون
تخيللى العدد ده
كل دول ضحايا النظام اللى عايشين فيه
تحياتى يا غاليه

... said...

كلامك جميل يا أوسا بجد
أثر فيا جدا
حقيقى مش عارفة اعلق عليه لأنه بيوجع جدا

تحياتى لك

الأميره أوسه said...

حــــــلــم

المهم أنك بخير
كنت قلقانه عليكى
حلقى يا حلم فأنت فراشه جميله
وأنتظر كتاباتك دائمآ

tota said...

اوسة اميرتى
عارفة لما وصلت لاخر البوست كان جسمى قشعر
عارفة بالضحكة المخبية وراها المعانى قولتى حلم ابن الشارع
عيدتى علينا كلنا ورسمتى بسمة جميلة بس فى كل بسمة طعنتى خنجر فينا وانت بتصحينا وبتقولى لازم كل واحد يقول لنفسه مش انا بس اللى فى الكون فى غيرى انا مش محور الكون علشان اعيش ما شوفش غير نفسى واحتيجاتى
فى حد عايز ايدى تتمد ليه
همدها بس خايفة يمكن لو ايدين كتير تانى ما اخفش اكون لوحدى
ميرسى انك بتصحينا

تحياتى

Ahmoss said...

أأأه من الكله
أشرب منها أبقا وزير

hahahahhha... gamda el 7etta di

Nouran said...

حرام عليك انا هعيط كنت لسه انا وواحدة صحبتي -دودي- بنتكلم ف موضوع اطفال الشوارع دهبجد ونفسي اكتب عنه بوست بس بعد الامتحانات ان شاء الله
انا اسمي اتقال يا سلام بس ازاي انا وابيتاف مع بعض ف الكلية انا القاهرة وهي عين شمس يالا هنعديها يا اويا هانم
تحياتي

مراقب مصري said...

للأسف توتا سبقتني وقالت كل اللي كان نفسي أقوله

أحلى حاجة في كتابتك يا أميرتنا الغالية مقدرتك المرعبة في لمس أوتار القلوب بحنية ورقة متناهية والشد عليها واللعب عليها بذات اليمين وذات اليسار إلى أن تتهري تماما وتبقى مهلهلة للغاية فنفيق من سباتنا على هذا الوجع القلبي الذي تفاجئينا به على حين غرة والواحد يا سلام ولا كأن قلبه اتقطع ولا حاجة

فاكرة رباعية جاهين بتاعة
أنا قلبي كان شخشيخة أصبح جرس
جلجلت به سمعوا الخدم والحرس
إيه قمتوا ليه خفتوا ليه
لا ف إيدي سيف ولا تحت مني فرس
وعجبي

عجبي يا أحلى أووسة بين أووسات الكون
عارفة ما أسمعك بتقولي الهراء بتاع أبطل تدوين دا

أقطعك بجد
اكتبي وياكش الناس اللي قلوبها قربت تموت من البلادة ف يوم تحس
وعجبي

على فكرة
ورود اسمي ف تدوينتك شرف ليا بجد
كدة ما بقاش ناقص عليا حاجة في الدنيا غير إن اشوف اسمي على القايمة بتاعة فتوات حارتك... ساعتها يبقى أموت وانا مرتاح





استني...
أغنية الشيخ إمام كارثية ومزيد من تقطيع نياط القلب ومرمطته
اختيار موفق جدا جدا

^ H@fSS@^ said...

اوووسا السكرة
المعطرة المدونات باحلى كلام
من غير فشخرة

مش عارفة اقلك ايه
قد ما فرحت اني لقيتك كاتبة اسمي
قد ما انبسط من كلماتك البسيطة
قد ما بكيت لما وصلت لاخر الكلام على حال العيال دي

بجد بقوا عاملين زي الدمل في وشنا
لا احنا بنداويهم و لا هما بيقلوا بالعكس بيكتروا و ده طبعا بسبب السياسة الرشيدة للحكومةو مهرجانات القراءة للي ضمن انه اتعشى و نام شبعان و امه وابوه مامنين له احتياجاته و ان عنده بيت و مدرسة و نادي و كل المستلزمات

لو كان الفقر رجلا لقتلته

سيدنا علي بن ابي طالب

تحياتي

بجد بجد مكنتش مصدقة انك بتعتقدي فيا كده
انا حنينةو بغطيكي من البرد؟؟؟؟
دي حاجة كبيرة اوي عندي يا اوووسا السكرة
رفعتي من معنوياتي

بوسة من هنا و بوسة من هنا

Ahmed Shokeir said...

أوسا

البوست السابق الخاص بأطفال الشوارع كان تحفة من خلال موضوع ساخر قدرتي تقولي كل اللي عايزاه وتلفتي النظر لاكثر من نقطة واكثر من تساؤل بطريقة السهل الممتنع

والبوست ده برده نفس القضية بطريقة مختلفة تماما ، بصراحة اهنيكي على افكارك المتجددة دائما والصادمة في جمالها غالبا
كما اضحكتينا بالبوست السابق عن اطفال الشوارع كم أثر فينا هذا البوست ولاشك ان ذكر اسامي المدونيني والمدونات كان له تأثير اقوى في وصول المعنى المطلوب
ذكر اسمي بلاشك اثر فيا كثيرا
ودايما مبدعة ومتجددة ياأوسا

Anonymous said...

وحشتينى يا اوسا
معلش اتأخرت فى التعليق كنت مسافرة
مش كنتى حاطة اغنية ابكى لمنير؟
بقيتى تغيرى وتلونى الاغانى يا شقية اهوو
مبرووك الاغنية

حلوة جدا جدا بجد

الموضوع بصراحة مش عارفة أقول عليه اية
لكن لو حد من اللى فوق بيفهم بجد وربنا رزقه بنص نعل...أقصد بنص عقل فى راسه

كان طخ نفسه عيارين من الكسوف وريحنا منه

متتصوريش فرحتينى أد اية وانا باشوف اسمى وسط الناس كدة
الله يجبر بخاطرك يا شابة كدة
ونجاملك فى الأرفراح

أمواااااااة يا جميلة
حبيبتى انتى يا اسئؤووووس

ody911 said...

هههههههههه
ماشى يا أوسة

يارب يحققلوا إللى نفسوا فيه بقة

ولو متحققش

مفيش مشكلة

خلية عايش فى الدنيا دى كدة

هوة زينا وأحنا زيوا
مع أختلاف المكان بس

وعادى صدقينى
وأقل من العادى

أودى رجل الشارع
هههههه

دماغ ماك said...

aoosa el gamela
shokran keteeeeeeeeeeer 3ala zeker esmy 3andek.. kanet lafta gamela menek
mawdo3 ba2a atfal el shaware3 da moseba tanya
baladna ba2et 3ebara 3an nas 3aysha fe shaware3 we 7'alas
we el nas elly momken tekne3hom be ay moseba ye3meloha ba2o motawaferen
we el 3eyal de aslan 3andaha este3dad tabe3y lel garema fe mokabel ay 7aga
law el me3alemen elly maskena yefhamoa enohom law 7alo mashakel el 3eyal de haykon ar7'aslohom meeeeeeeeeeeeeeeet mara men law sabohom yewala3o fe el balad law ay 7ad edalhom geneh haye3melo elly homa 3ayzeno
bas enty betkalemy fe 7ekoma habla
walahy ana ba2et 7ases en 7ata law sha3bena da mat7arakash we fata7 bo2o heya hate7'reb 3ala nafsaha men 3'aba2ha
thanx again

محمد عبد الغفار said...

ربنا يتولاهم برحمته

Racha Khoury said...

اوسا بجد البوست ده وكل كتاباتك فيها الاسلوب الساخر المضحك بس الي بيبكي
انا شفت اطفال شوارع كتير في مصر بس الموقف الاصعب ..لا اعلم كيف اصف الحزن الذي انتابني وانا ارى طفل نائم على الرصيف في يوم بارد جدا
شيء مؤسف ومحزن هذه مسؤولية الجميع في مساعدت هؤلاء الاطفال
من اخطار عديدة لازم حل..

مع كل حزني
مقدرش اقولك غير ان الكلام جامد قوي
موهبة يا بنت

;)

تحياتي

همس الليل said...

تعرفى يا اوسا انا مزعلتش على موضوع اولاد الشوارع عارفه ليه لان العيال دى بيعرفو يشوفو حالهم ويدافعو عن نفسهم على اد ما يقدرو واتعودوز على كدا
زعلنى اولاد البيوت المخروبه اللى الاولاد بيكونو ضحيه لقسوه اهاليهم دول يستحقو العطف اكتر وبردو ضحيه مجتمع وماديات وحياه قاسيه وظلم
شكرا بجد ليكى انك افتكرتينى دا خلانى ادمع عشان حسيت انى ليا مكان وسط حد
اسفه على النكد معلش بس اهو فى طبعى بئا نعمل ايه
بحبك يا اختى من قلبى بجد انتو اخواتى دلوقتى

farida said...

حبيبتي أوسه

أولا اسمحي لي أعتذر لك لأني مكنتش أتخيل انك ممكن تكتبي زجل عامي بالجمال ده نظرا لأن كتاباتك خفيفه و دمها خفيف

لكن البوست ده عميق جدا و جميل جدا

و بعتذر كمان لأني لأول مره أشوف
friends
ايه يا بنتي الجمال ده

أنا دايما اقرا لك بس بدخل على الاميره أوسا على طول

المهم
أحييكي بشده

كنتي واحشاني فعلا
مبعلقش عندك لأني الفتره الاخيره كنت مشغوله شويه و غبت شويه

و بعدين القمر مش محتاج تعليقي نمسك الخشب خطابك قصدي زوارك كتير و قالوا لي عدد التعليقات في اللولي قصدي في اللمون

ههههه

جميل جدا البوست يا أوسه تسلم ايدك
و شكرا انك عديتي و سلمتي
و شكرا انك ذكرتيني في البوست

موه موه
ببوسك

مراقب مصري said...

أوووووسااااا

الواد دماغ ماك لفت انتباهي لفكرة ما كاتش ف بالي... بس غالبا كانت في بالك وانتي بتكتبي البوست المضحك دا
(ما هو دا يا اختي شر البلية)
المصيبة اللي دماغ في تعليقه خلاني آخد بالي منها هي أننا كلنا أناس شوارع

يا لهويييييييي
كلنا متشردين
كلنا قنابل موقوتة
يا خبر ازرق
أي واحد فينا هو طفل شوارع أو إنسان شوارع للدقة
كلنا صرنا ساكني عشوائيات
(حتى لو كان بعضنا في مصر الجديدة أو المهندسين)
إنتي مدركة الخطر بقى حجمه إيه بجد؟؟؟
مش باقلل من المشكلة الحرفية بتاعة أطفال الشوارع بس كمان تحولنا جميعا إلى النحو الشديد الشبه بأولاد الشوارع دا كارثي جدا

دا احنا لو فضلنا كدة كام شهر يبقى الليلة بتجيب ضرفها
يا سنة سوخا يا اولاد!!!

albida said...

كلامك جميل وسلس... بس يقطع القلب
والله على قد ما بيعملوه العيال دول على قد مابيصعبوا عليا
اللى عايزين ضرب النبابيت والشلاليت فعلا هما اللى سايبنهم كده فى الشوارع


manal

saso said...

هيييييية
يوم جمعة بقي وفاضية هاقضية عندك
:P
ميرسي يا بنوتة يا سكر انتي علي البوست ، وجع قلبي شوية في الاخر بس صح .. قبل ما اقلبها نكد هاعزمك الاول علي الحلبسة
بقالها كام يوم علي بالي اصلا

أسوور said...

جميلة قوى كأن طفلا الشارع نفسه هو اللى كتبها
بس انا هأستنى اسمى فى القصيدة اللى جاية ههههه

الأميره أوسه said...

tota
عشان نساعد أطفال الشوارع
لازم الناس اللى معاها فلوس وبتصيف فى مارينا تتكاتف مع بعض ويبنوا مشروع
عشان يشتغلوا فيه الأطفال ويتعلموا
وساعتها نقدر نساعدهم لأننا هنعرف مكانهم
لكن أى مؤسسه تبع الحكومه فلا أثق فيها
ممكن نتبرع بالمجهود
المهم نحاول
سنه جديده سعيده

الأميره أوسه said...

Ahmoss
الكله هى الطريق لكرسى الوزاره
والحشيش ده يوديك البرلمان
حاجه سهله مش كده
تحياتى لك

الأميره أوسه said...

Nouran
أنت فى القاهره
هى فى عين شمس
طيب عادى مش كلها جامعه
المهم متنسيش تاخدى شلاطه معاكى الكليه
ينوبك ثواب كبير
مستنيه البوست بتاعك يا نوران
على فكره أنا ضيفتك عندى
عشان شمعتك تنور البلوج
باى يا عسل

الأميره أوسه said...

Reformer1976
أهلآ بيك فى عالم سمسم
أنا حاطيط روابط أول مافتحت البلوج
بعد كده كسلت وأبتديت أحتفظ بأسماء مدوناتكم فى المفضله الفافريت يعنى
بس طبعآ بعد طلبك ده
ضيفتك وضيفت كل الحبايب
أنت حافظ ربعيات جاهين برافو عليك
أنا مش أعرف أحفظ
أنت أول واحد ياخد باله من الشيخ أمام أيه رأيك
حاول تسمع أغنية جيفارا مات
بس هو الشيخ أمام عايش ولا توفى
و هل هو مصرى أم شامى
لأنى سمعته بيتكلم بلهجة شاميه
لو عندك أجابه أسمحلى أعرفها
توحشاتى

الأميره أوسه said...

حفصوتشا ام مصطفيتش
أنت عارفه أنى بحس أنك عايشه فى وسطينا فى مصر وفى قلب الأحداث كمان
و رغم تواجدك فى بلاد الاحلام
لكنك لم تفقدى هويتك العربيه
عجبنى موقفك من موضوع صدام
و توضيحك أمور عن الشيعه أجهلها
بصراحه لم أقابل شيعه لأتعرف على أفكارهم
على فكره أنتى خلاص بقيتى من الأحرار
تحياتى
أمــــــــوه

الأميره أوسه said...

Ahmed Shokeir
أحرجتنى بكلامك ده
ببساطه أن بكتب الموضوع وبقعد أفكر أنشره ولا بلاش
أنا بفضفض مش أكتر
كان نفسى أكون لسان المظلومين
بس مقدرتش
بصراحه المدونين أصبح لهم وزن فى المجتمع
خاصة أن عندهم مصداقيه و بينشروا أفكارهم من غير ماينتظروا شكر
و فيهم مبدعين زيك كده
تحياتى

الأميره أوسه said...

شهروزة
طبعآ أنت اول أسم فكرت أحطه
بعد كده قولت أحط أسماء بعض الزملاء
يعنى الفكره نبعت من تفكيرى فى أسمك
حاسه أنك مش مبسوطه
و أنت بتصلى أتوجهى لربنا
و كلميه وأشتكيله
بعد كده هاتشعرى براحه
سلامى يا جمرايه

الأميره أوسه said...

ody911
عندك حق فى بعض كلامك
كلنا ممكن نبقا فى الشارع
أنا فاكرا اما كنت أمشى فى الشارع طول النهار أدور على شغل وأرجع وأنا محبطه من الشارع
الشارع غابه
ربنا يرحمهم ويرحمنا
وعادى بقا

الأميره أوسه said...

دماغ ماك
بجد سعيده بيك بعد نشرك للفيديو
أعتقد أن ناس كتير كانت تخاف تنشره
وبسببك ودعم المدونين صوت عماد وصل
مش مهم النتيجه المهم أنك حاولت
وسمعوك غصب عنهم
ناس كتير مظلومه نفسها صوتها يوصل
زى أطفال الشوارع
بجد أنا فخوره بيك
أطفال الشوارع قنبله موقوته
شايفين ناس عايشه وراكبه عربيات
و بتبصلهم من ورا زجاج العربيات
كأنهم أشباح
عشان كده بيحقدوا على المجتمع وعندهم حق وأعدادهم بتزيد كل يوم
و الحكومه مش بتتصرف
ماتعرفش حد مهم فى الحكومه نشتكيله
ههههههه
كل سنه وأنت ماك المصرى المحب لبلده

الأميره أوسه said...

Mohamed A. Ghaffar
أمين يا رب
شرفت يا محمد

الأميره أوسه said...

Rasha
عام سعيد رشا عليكى
كلك رقه وذوق
مره شوفت بنوته فى العشرين
فى وسط البلد واد من اولاد الشوارع قربلها فجأه
البنوته سلمت عليه وطلعتله شكولاته
و وزعت على زمايله
الأطفال كانوا مبسوطين جدآ
والناس فى الشارع كانوا مندهشين من جرأتها بس كلهم بصوا نحيتها بأحترام
وعرفت أن فيهم أولاد بيدورا على الحنيه وحسن المعامله
كلنا بشر
أعياد سعيده عليكى
وماتقطعيش الجوبات

الأميره أوسه said...

cat_eyes(همس الليل
أنت ليكى مكانه كبيره فى قلبى
مش شرط أننا نكون فى مدينه واحده
المهم أننا نكون قريبين بمشاعرنا
فعلآ الاولاد اللى بيخرجوا من بيوتهم نتيجة أزمة الأنفصال بين الأب والأم
بتكون مشكلتهم أكبر
لأنهم مش متعودين على البهدله
و من السهل أنهم يضيعوا فى الزحمه
و بعدين مش تدمعى أنت حقك تفرحى
حبيايبك كتييييير
أمووووه ليكى

الأميره أوسه said...

farida
أهلآ بيكى
عارفه أنك أختفيتى شويه
وكنت متابعاكى
أنا قريت كل مواضيعك
وكلها فريده سواء فى الفكره أو الأسلوب
أنا بكتب زجل وفصحا وعاميه
ده أنا مصيبه
هههههههههههه
و كاتبة رويات بوليسيه
انا معايا دكنوراه فى الأدب و دكتوراه فى السياسه
أنا سعيده بزيارتك جدآ
وأتمنى ليكى السعاده
و تفضلى تكتبى على طول وتمتعينا بموهبتك
أمووووه ليكى

الأميره أوسه said...

Reformer1976
الحاج جرجس
أنا كنت ساكنه فى العمرانيه الغربيه
و كانوا الولاد اللى بيلعبوا فى الشارع
والشباب أسؤ من أولاد الشوارع
الفرق أنهم فى نهاية اليوم بيناموا فى بيوتهم لكن بيعملوا كل حاجه
و خناقات طول اليوم
وده مش فى العمرانيه بس
أ نزل فى أى حى هتلاقى نفس الصوره
ومع الوقت أعداد أولاد الشوارع
و الشباب الفاسد هتكون أعلى من الشباب الكويس
كلها عشر سنين أحتلال كمان وأتفرج
أنا خلاص ضيفتك وبقيت فتوه فى الحاره

الأميره أوسه said...

albida
منال
ربك بالمرصاد
هو المنتقم من أصحاب القلوب الصلبه
اللى بيعذبوا أطفال وبيعاملوهم كالمجرمين
هى المدونه بتاعتك أسمها البيداء
مش عارفه أنطقها صح
تحياتى يا منال

الأميره أوسه said...

aymen.farouk
القصه اللى حاكيتها دى مؤلمه
أكبر غلط ان الشرطه تتدخل
لأنهم ببساطه أعداء للشعب
وأسهل حاجه عندهم الضرب والشتيمه
وللأسف الكله بتحتاج أكتر من يوم عشان الشخص يفوق منها يعنى صعب تساعدوهم فى الحاله دى
المفروض يعملوا جهه مخصصه للحالات دى
كل الارقام للأسف اللى بينشروها
ويقولوا عليها خط ساخن بتكون عقيمه
كفايه أنكوا حاولتوا تساعدوهم
يا ريت الناس كلها تساعد
تحياتى ليك ولأصدقائك

الأميره أوسه said...

saso
شكرآ على الحلبسه
بس مشطشطه أوى
هههههههههه
عاوزه أنزل بوست مخصوص عن القطط
عشانك أنتى

أنا لسه مأخدتش أجازه
عشان السياح اللى بيجوا لحد يوم سبعه يناير بتوع أوربا الشرقيه
شوفتى بقا الحظ
مش مهم المهم الناس دى تتبسط فى مصر
أحنا بنحترق من أجل الآخرين
سلام يا قطقوطه

الأميره أوسه said...

ياسمين
أسمك كنت فاكرأ أكتبه
بس المهم الوزن
المره الجايه أكتب أسمك
ده شرف ليا
وحشانى يا قمر

Tamer Nabil Moussa said...

الحل فين طيب

ولا العيال هتفضل كدة فى الشوارع

Anonymous said...

معلش يا أسئوس
اديكى شايفة
فيه اية فى الدنيا بقا يبسط دلوقتى؟
يمكن زهقى وقهرى طغى على كلامى والله انتى أول واحدة تحسى انى مش مبسوطة
يعنى الضحكة على الوش والسكينة فى القلب
رغم كدة باحاول أضحك وأنسى اللى بيحصل حوالينا لكن مفيش فايدة
لازق فينا زى لزقة الجلد على اللحم

ربنا يعدى الايام دى على خير يا اوساا
وينجينا منها

والله بحبك فى الله
متعرفيش انتى غالية عليا أد اية
أموااااااة ليكى يا غالية
ومش مهم اسمى فى الاول ولا الآخر


الكل واحد والله يا اوسا متفرقش المهم انك فاكرانى وخلاص
كفاية يا جميلة عليا
تحياتى

بين الأمل و اليأس said...

اسلوب جميل وعجيب
ورزين دنا حتى اول مره انادي اختي عشان تقراه وعاجبها مووت
يارب تتحل المشكله الازليه دي
والعالم يتحرك داحنا لو شفناهم في البرد ده نايمين ازاي قلبنا هايقف اذا كنا احنا في بيوتنا ومتلجين
يارب يعينهم ويعيبن كل انسان اصبح وحيد ولوحده
يارب
وربنا يسترها

الأميره أوسه said...

tamer
سؤالك صعب
بس لازم عمل جماعى
ولحد ده مايحصل ممكن كا واحد يقدم مساعده بطريقته
أن الموضوع محتاج تنظيم كبير و مساعدة من رجال الأعمال الله يأطعهم كلهم

الأميره أوسه said...

بين الأمل و اليأس
شكرآ ليك
ولأختك
بجد كل مايجى الليل والبرد
وأنا مشغله الدفايه وبرضه حاسه بالبرد
بفتكر المساكين اللى نايمين من غير غطا
وسط الحيوانات الضاله
كأنهم مجرمين مع أن ذنبهم الوحيد أنهم أتولدوا فى ظروف صعبه ونظام بلد مش بيرحم
تحياتى

الأميره أوسه said...

شهروزة
طبعآ حاسه بيكى من العيد
خليها على الله
خلى عندك أمل وعمر
ونرجس فاكراهم
ههههههههههه
كنا فى أبتدائى بندرسهم
شفتى أنتى كبرتى أزاى وبقيتى حلوه
و نغشه
وناس كتير بتحبك يا قمر
أخبار اخوكى أيه
مش بتجيبى سيرته
قريتى أخر بوست لسمراء النيل
هايعجبك أوى
خدى الرابط بتاعه
الى حبيبى سمراء النيل

ذو النون المصري said...

اسلوبك السهل بيفكرني باشعار بيرم التونسي السياسيه و الاجتماعيه علي غرار ياخواتي مرحتش لندن وللا باريس
المهم الاسلوب جيد و سهل و بلا عوائق ممكن توقف عملية الفهم لطرح اسئله حول المعني المقصود و هذا يجعل الاسئله موجهه ناحية القضيه المطروحه
هذه اول زياره اي هنا
لكي مني خالص التحيات
و كل سنه و انتي طيبه

الأميره أوسه said...

ذو النون المصري
شكرآ على التعليق ده
فكرتنى بعمنا بيرم التونسى
هو اللى مربينى
أيام بقا
كنا نقعد بالساعات نسمع الأستاذ سيد درويش فى قهوة بحرى فى أسكندريه
زمن جميل
يا ريت تكرر الزياره
بس أنا عارفاك وبقرا تعليقاتك عند الزملاء وده خلانى أزورك
ربنا يوقفك

ذو النون المصري said...

باذن الله هاكرر الزياره
و كل سنه و انتي طيبه

الأميره أوسه said...

dinahliang
التعليق بتاعك طويل جدآ
ومن اجمل التعليقات اللى وصلتلى
ومليان أفكار

الأميره أوسه said...

ذو النون
فى أنتظارك دائمآ
أهلآ بيك

شجره الدر said...

جميل خالص خالص يااوسا
حلو صحيح
عارفه انا هاكتب بوست عن تجربه شخصيه مع الموضوع ده
بس حقيقى حلو اوى انك دخلتى اسماء المدونين فى الشعر الحر ده-هو مش حر برضه- ولا انا بيهيألى
بجد نفسى حد يشوف حل للموضوع ده
ومحدش حاسس يااوسا محدش حاسس
تحياتى للاميره

zordeak said...

الله عليكى


علمتى على قلبى من جوه


خليتينى ادمع


انا بشوف ولاد الشوارع كل يوم


بس حسيت بيهم اكتر ..معاكى هنا


تحياتى

الأميره أوسه said...

شيكولاتايه
أزيك يا جميله
الشعر بتاعى مش حر
ده مقبوض عليه
هههههههههههه
أكتبى بوست عن الموضوع ده
كلنا عندنا تجارب معاهم
فعلآ أطفال مساكين
أحيانآ بحس بيهم فى البرد بينادونا
عبيطه أنا مش كده
سنه سعيده عليكى يا شوكلت

الأميره أوسه said...

zordeak
شكرآ لكلامك الرقيق
الشعور نعمه
بس بلاش دموع عشان أنا كمان ممكن ادمع
سنه سعيده عليك

جبهة التهييس الشعبية said...

الله يا اوسة

دي برضه مدونة حلوة قوييييييييييييييي

انا ح اخدها دي بتاعتي هاتيها

عندي ع اللنك

انت بتتكلمي عن عيالي

lastknight said...

الأميره أوسه
بكل صراحه .. وجعتينى .. ببساطه و عمق و سلاسه .. سربتى ألم حاد لنفسى .. و أعتقد نفس أى أب أو أم .. فعلا بتثبتى عبقرية بنت البلد المصريه جدا .. دمك خفيف فى أوقات .. و مؤلمه لحد البكاء فى أوقات أخرى .. زجلك هو تقسيمه على نفس فكرة الفلاح الفصيح .. المصرى الصميم اللى اشتكى الظلم للفرعون بأبيات شعر و فوازير و كوميديا .. ألمت الفرعون وردته عن ظلمه
شرفنى ذكرك لأسمى ضمن المدونين ..

albida said...

اسوسة

والله اسم المدونة بتاعتى ده أنا خت بسببه تريقة أول ما جيت ما يعلم بيها الا ربنا.. حتى اسألى حفصوصة
ههههههههه

اللى يقولى قلبى ده, واللى يقولى البيضه وحاجات عجيبة كده
:)

هو من الا خر البيدا.. ملوش معنى, بس اللى يتمحص ويتفحص هيعرف أنها اسم شجرة... ما علينا, هو البيدا وخلاص
هههههههه

manal

3rby said...

انتي فاهمة المدرسة غلط
يا بنتي انا بقالي 2 ماوقفتش في طابور
ومن 3 سنين كنت باقف في الطابور كل كام اسبوع


بس البوست ده مؤثر جدا
حسيت ان انا اللي باكتبه
وانا اللي نايم في الشارع وفيه ظابط ابن جزمة بيضرب فيا

الأميره أوسه said...

جبهة التهييس الشعبية
اتفضلى البلوج كله ملكك
جميل منك أنك تقولى عليهم أولادك
أشكرك على المشاركه
و فى أنتظار مزيد من التهيــيس
لأنى على طول مهيسه

وشعارى
هيس هيس تبقا كويس
ميرسى يا قمر على أضافتى عندك

الأميره أوسه said...

lastknight
أيه التعليق الجامد ده
أنا يدوب بحاول أفكر بصوت عالى
أسمك نور البوست والبلوج
أشوفك عريس يارب

الأميره أوسه said...

albida
المشكله أن كنت هاكتب البيضا فعلآ
الأسم غريب مفكرتيش تغيريه
كتير غيروا الأسماء عشان الناس تقدر تستوعبها
أيه رأيك فى أسم شجرة الأقحوان المتشابكه
أسم سهل على اللسان
هههههههههههههه
منال أسم حلو
أناديكى بأسمك أحسن

يا مراكبي said...

عدنا

رحت وجيت لقيت فايتني 4 بوستس كلهم أحلى من بعض .. برافو عليكي إن عندك إبداع كتير وفيه تركيز عالي في الفترة الصغيرة دي .. كل سنة وإنتي وجميع إخواننا المعلقين والقراء بخير

الأميره أوسه said...

عربى
طول فترة دراستى مش بحب طابور الصبح
لكن كنا بنلاحظ أن الأولاد اللى بيبيعوا مناديل فى الشارع كانوا يقفوا على السور
ويتفرجوا ويغنوا معانا
كان حلمهم يقفوا طابور الصبحيه
أنشاءلله المديره تمدهم
مين الضابط ده اللى يضربك
ده كان دماغ ماك يفضحه
ونتلم عيه نحدفه بالطوب
هههههههههه
سنه سعيده عليك

الأميره أوسه said...

يامراكبى
أزيك
شكرآ ليك على الأطراء الجميل
سنه سعيده عليك
و دايمآ تمر ونشوفك

orthos said...

بادىء ذى بدء

العصيده رائعه

جااامده

ثايا الموضوع نفسه..اطفال الشوارع

محتاجين كتييير...مش بس شغل جمعيات و خير بأه و كده لا الموضوع كبير

كفايه اللى حصلهم من التوربينى و عصابات الشوارع اللى بقت ماليه البلد و أقنعت الاطفال ان مفيش امل منهم وان ملهمش سكه غير عندهم

معلش طولت عليكى الموضوع صعب و كنت تايه عنه او لنقل إنى كنت عامل نفسى مش و اخد بالى ومكنتش لامم أبعاده

بس ربنا يكرمك فوقتينى لييه

بس ايه الجمال ده

لا بجد اميرة المدونين

:)

bastokka طهقانة said...

:(


:)

اوروفوار

أسوور said...

انتى فين يا أوسة .. وحشتينى
بقالك كتير مختفية

-_- said...

احنا السبب
سايبنهم و كأنهم مش بشر زينا
و منظمات حقوق الانسان و لا للتشرد بتلهف التبرعات و يبقى الحال على ما هو عليه

الأميره أوسه said...

soul

مرحب بيك
لازم الجهود تتكاتف فى حل المشكله
لأن عددهم يفوق قدرة الجمعيات الحاليه
على أستيعابها
أشكرك على تعليقك

الأميره أوسه said...

bastokka



؟؟؟؟؟؟؟؟؟؟

الأميره أوسه said...

ياسمين
أزيك
أنتى عارفه البرد
أنا جيالك حالآ على بساط الريح

الأميره أوسه said...

Sharm

السبب هو النظام اللى ناسيهم
وسايب البلد تغرق
شرفتنى

الحصان الأسود said...

مش عارف انتم معترضين لية

ماما سوزان حاتعمل اية بس

حاتقطع نفسها يا جدعان وللا اية, الست شغالة تفتح مكتبات للاطفال و مش ملاحقة وخدت بدل الجايزة تلاتاشر جايزة قومية وعربية ودولية على مجهوداتها"الغير عادية" في مجال "الأمومة والطفولة" ربنا يكون في عونها وعون بابا حسني اللي مش ملاحق وشايل هموم الوطن والقضايا القومية على دماغة ومقطع نفسة بالفعل في كل الاتجاهات

لية نبص لنص الكوباية الفاضي

اية يعني مجرم لامؤاخذة "بتاع عيال" و بيقتلهم و قتل بالفعل 40 طفل

واية يعني 2 مليون طفل من مشردي الشوارع

مش انتم يا اهل مصر اللي رميتوهم في الشوارع "بطلوا رمي زبالة ياللي فوق" ولا انتو تخلفوا وترموا وعاوزين الحكومة تربيهملم

بصوا للجانب المشرق

كام مكتبة فتحتها "ماما شوزان" خلال 25 سنة و المكتبات دي بتخدم كام طفل

وشوفوا اتصرف كام من ميزانية الدولة عالمكتبات دي

المكتبات الي بتخدم الاطفال الحلوين ولاد الناس

الاطفال اللي بيتعلموا وبيروحوا مدارس و ريحتهم حلوة

انما الاطفال الوحشين اللي بيشموا كلة و بيناموا تحت الكباري و بيستنوا زيارات المطرب الشهير بتاع شبرانجم افلام سلسلة "العيال" اللي بييجي ياخدهم في عربيتة ويوديهم بيتة ويأكلهم ويحميهم ويديهم فلوس و يرجعهم تحت الكوبري تاني

و التوربيني اللي اكيد فية زية كذا الف بيساهموا في تنضيف البلد من الاطفال الوحشين دول ويأما بيقتلهم يا أما بيقتل البراءة فيهم ومسيرهم يا يطلعوا حرامية وتجار مخدرات أو زية ياأما أرهابيين

انا مش عارف انتم يا مصريين غاويين تعترضوا وخلاص

اية يعني لما وزير "السقافة" يقول ان الحجاب وحش وان الستات حلوين بشعرهم وزي الورد ينشموا وينباسوا

ماعندة حق

اة طبعا عندة حق

شوفوا البنات اللي تفتح النفس في المولات على القنوات الفضائية

مش شوية خيم لابسين حجاب وبتاع

مالة البنطلون الجينز المحزق ابو وسط ساقط وعلية بودي ضيق عاللحم و هاف ستوماك
اية يعني البودي خفيف و شفافا ومبين حلمات البنت

خللي البنات يبقى شكلها حلو و تجذب الشباب

خلليهم يفتحوا النفس

لو البنات اللي "متغطيين" ومتحجبين كلهم لبسوا كدا وبحبحوها شوية مش حانشتكي من ارتفاع نسبة العنوسة وعزوف الشباب عن الزواج

وخللي كلة يهيص وينبسط

Anonymous said...

اسئووس
انا قريت البوست اللى عند سمرا
فعلا مشاعر بتلقائية وعفوية جدا
========
الأيام دى الواد مشغول فى شغله
راح حضر جلستين فى الجزب
ورجع وشه موطى فى الأرض من الكسوف
انه مسمعش كلامى

كنت ركبت راسى وقررت افقعه بوست عن خيبة الأمل اللى شافها ولاقاها هناك
لكن بقا بعد ما اتوسل لى وطلب منى انى استر عليه
قررت السماح واكتفيت بقرصة فى ودانه

قاللى يا شهروو كانوا بيقولوا كلام اى واحد جاهل يضحك عليهم لو سمعه
عاوزين كل عضو جديد يستقطب على الاقل خمستاشر عضو تانى
حاجة كدة يا اسئوس زى الانشطار النووى والتفاعل المتسلسل
فاكراه
الواحد يجيب خمستاشر وكل واحد منهم يجيب خمستاشر تانيين وهكذا
لحد ما البلد كلها باذنك يا رب فى ظرف شهرين بس تبقا فى الحزب

ولاّ كلام امين الجزب
يووووووووووة
وربنا فطست من الضحك لما سمعته
كلام واحد حتى ماتحصلش على محو الأمية بعيد عنك
ولا حتى بيحترم عقول اللى بيسمعوه
فعلا
لا يحكمنا الا مجموعة لا تستطيع ان تحكم فصل سنة اولى ابتدائى فى مدرسة لطفى السيد
قطشيعة يا اؤختشى
خرجونى عن شعورياتشى

أمووااااة يا حبيبتشى
خلينا نشوفك

بس الحمد لله
كانت غمة وراحت

الحصان الأسود said...

وأية يعني لما العيال يجروا ورا البنات في العيد و يقلعوهم هدومهم
امال يعيدوا ازاي؟؟؟ مش عيد بقى وكلة لازم ينبسط؟؟ وبلاش تمثيل بقى الحكومة عارفة كويس ان البنات كانوا مبسوطين و مش معترضين
بس الموضوع انهم خافوا يتفضحوا بسبب ان بعضهم اتصور بالموبايلات و كان لازم يعيطوا ويقولوا ان دة مش على مزاجهم و غصب عنهم علشان لو اهلهم شافوهم متصورين مايزعقوش للبنات



واية يعني لما الظباط بيضربوا المتظاهرين اللي مش مؤدبين ويسمعوا الكلام بتاع بابا حسني و بيهددوا الامن


واية يعني لما الظباط بيحطوا العصاية في مؤخرات المتهمين في الاقسام
مش لازم يتعلوا الادب علشان مايعملوش كدة تاني

ولازم يتصوروا بالموبايل ويتفضحوا علشان يبقوا عبرة لكل من تسول لة نفسة الخروج على النظام والادب و يهددوا"الأمن القومي" وللا يعني نسيب البلد تبقى ميغه

ومالها العصاية مانتوا يادا اتضربتوا بالعصيان في المدارس في الصغر

ومن انضرب بالعصاية على ايدة في الصغر لا يجب ان يجد غضاضة ان توضع العصا ولامؤاخذة في "مؤخرتة" واكيد الظباط كمان كانوا بيتضربوا بالعصاية وهما صغيرين علشان كدة بينتقموا منها وبيحطوها في حتة ريحتها وحشة

مش عارف الناس دي اية مش عاجبكم حاجة ابدا

جابولكم الشاويش عبد الجبار زي فيلم الكرنك مش عاجب

بلاش الشاويش و عملوا بالعصاية اللي بيعملة الشاويش برضة مش عاجب

نعمل لكم اية بس يا جدعان نصرف لكل مواطن "اللبوس" عالبطاقة؟؟

عشتار said...

تدوينة رائعة يا أوسا نخرج منها بدمعة وابتسامة
كل عام وانت بخير

hebaz said...

EPI Dear, i am speechless,u touched my heart and i felt the world stopped round me while reading your tender words acompanied by the angelic fairouz, by the way its not depressing at all, on the contrary it ended by a happy start with chocolates and a note;)
begad Allah 3aliki
More than happy to run into your blog
and plz keep it up:)

hebaz said...

أنا أسفة علقت على حاجة تانية خالص
فعلا أسفة
المهم بالنسبة لموضوع أولاد الشوارع الناس بتتكلم عنهم و بصالهم من برج عاجى كأنهم لا يرقوا لدرجة البشر
على الرغم من أنهم ضحيتنا بجد ضحيتنا كلنا لأن لو مجتمعنا فية تكافل و رحمة مكنش ده بأه حالنا
عارفة أن فى حديث شريف عن الرسول الكريم بما معناه أن ليس منا من ينام الليل و له جار جوعان
مش لازم جار ساكن فى نفس العمارة الجار التى قصدها الرسول هم من حولنا فى الشارع و المنطقى
بجد أنا موجوعة
تحياتى

الأميره أوسه said...

الحصان الأسود
التوصيات بتاعتك محل دراسه
وأحتمال الشعب كله ينحرف
بس مين المطرب ده
يااااه قلبه حنين بشكل
لسه الدنيا فيها ناس قلبها كبير

الحصان الأسود said...

أوسا

يظهر انك فهمتي غلط او ان انا ماعرفتش اوصللك الرسالة
بس انا سمعت كتير عن حماده هلال و انة لة تاريخ طويل في نفس الموضوع

وأنة مايفرقش كتير عن التوربيني بس هوة اسلوبة مختلف مش بيقتل ولا بعنف

تحياتي

الأميره أوسه said...

شهروزة
أزيك كده وحشانى
أنا فى أجازه من الشغل
لأول مره منذ شهر
بنضف الشقه وأحتمال أضرب شعرى فى الخلاط
وأعمل تسريحه جديده
كويس أن أخوكى ساب الحزب
طيب و يجيب خماشر واحد أزاى
ده عشان تقنعى واحد بس مشكله
الناس كلها أتنورت وفهمت اللعبه
أهم حاجه خلى بالك الشتاء بيجيب أكتئاب عشان كده كبرى دماغك
وأعملى نفسك مش واخده بالك من أى حاجه الى أن يأتى الصيف
تحياتى وقبلاتشى

الأميره أوسه said...

الحصان الأسود
على رأيك شعب عايز الحرق
مش عاجبه حاجه
لا عجبه تحرش ولا أغتصاب
طيب أنتهاك برضه مش بيعجبهم
كان الله فى عون عبد الجبار

الأميره أوسه said...

عشتار
أهلآ بيكى فاتنة العرب
شكرآ على التعليق
ودايمآ فى أنتظارك يا غاليه

الأميره أوسه said...

hebaz
ولا يهمك أنا وأيبى واحد
فى عهد عمر رضى الله عنه لم يجدوا محتاج
يعنى المشكله فى النظام اللى بيحكم مش فينا وبجد الناس كلها موجوعه سواء على أطفال الشوارع أو على نفسهم
تحياتى

الأميره أوسه said...

الحصان الأسود
يا عزيزى اللورد
أنا فهمت قصدك
بس كنت بسخر من نوعية هولاء
ممن يستغلوا حاجة الفقراء وجهلهم
لممارسة الرذيله
وشكرآ لعودتك

Unknown said...

أوسة ايه اللى انتى كتباه ده
إبدااااااااااااااااااع بس بيوجع أوى ، بس تعرفى حاجة مع ألمى الشديد على اطفال الشوارع واللى محدش عارف يحل مشكلتهم لحد دلوقتى وحزنى عليهم بس حاسة إن كلنا اطفال شوارع

كلنا محبوسين فى سجن كبير اسمه مصر ومهمومين ولا حتى لاقين شغل ولا تعليم عدل ولا حتى نسمة هوا عدلة نتنفسهاولا شوارع نضيفة نمشى فيها ولا مواصلة تحترم إنسانيتنا نركبها ولا مرتب عدل يكفينا ولا كرامة بين شعوب العالم نرفع بيها راسنا
ايوة كلنا اطفال شوارع
اللى ليه دهر يبقى باشا والمواطن العادى يبقى طفل شوارع
وأطلب منك طلب ملح جداااااا ، ياريت تسمعى أغنية اسمها 145 جنيه ، وهتعرفى ان اللى بيشحت بيجيب فلوس اكتر من الموظف العادى ... المواطن المصرى الصميم
وزى ما قال منير .. حبيبى عايزله سكر ، منين اجيبله سكر ، باب الحكومة مسكر وحابسونى وحابسوه
سلام يا أحلى أوسا

الأميره أوسه said...

Human
تعليقك بيلمس الحقيقه
كلنا عايشين مهمشين
بنتدارى ورا بلوج عشان نبكى بصوت عالى
طبعآ سمعت الأغنيه
فيه ناس بتشتغل بــ 60 جنيه فى الوزارت بعقود عمل
السؤال الناس دى تعمل أيه بالراتب ده
حاجه تحرق الدم
ربنا معانا فى البلد دى
تحياتى

admelmasry said...

الاميرة اوسا

اهلا اهلا ياجميل

واحشاني جدا جدا جدا جدا

تعرفي ان كلامك دا عاجبني جدا جدا جدا

واكتر حاجة انك كاتبتيه في تلاته واحد .. يوم عيد ميلادي


هههههههههههههههه

دي اكتر حاجة حلوة بصراحه

هههههههههههههههههههه


لا بس بجد انتي حد موهوب ورائع ودايما بيتحفني بجديده


تحياتي

الأميره أوسه said...

أدم
كل سنه وأنت طيب
فينك من زمان
طبعآ بتذاكر
شكرآ يا باشا بعض مما عندكم
وتحياتى ليك

الحصان الأسود said...

لو تعرفي يا أوسة هما أمتى حايفتحوا باب التعيين لوظيفة عبد الجبار في السجون المصرية واية الشروط الواجب توافرها ابقى بلغيني

عاوز اقدم واشتغل عبد الجبار

شغلانة كويسة وفيها قيمة وسيمة و ضمان اجتماعي

tamer afify said...

جميل ان احنا نعبر عن مشاكلنا بأسلوب
ساخر خفيف زي ده
تحياتي

i love you said...

اوووووووووووووووسة
شكرا
على
البوست


مجتمع
عربي
اسلامي
و
فيه
ظاهرة
كظاهرة
اولاد
الشوارع
!!!!!!!!!!!!!!!!!!!!

الأميره أوسه said...

الحصان الأسود
خلاص عينوا الناس
من غير أعلان
بلد كوسه

الأميره أوسه said...

tamer afify
شكرآ على التعليق
خلينا نشوفك

الأميره أوسه said...

cigara

أحنا مجتمع ضآل بدون هويه
ونظام جاهل بيدوس على رقابنا من غير رحمه
والحريه فى بلادنا عباره عن ترف سياسي يتغنى به السياسين
لذلك أدعوك يا سيجاره لتنظيم مظاهره من أجل الحريه
الله الوطن أم فاروق

Memo said...

مصر فيها اكتر من اربعه مليون طفل مشرد و مقيدين بان ليس لهم زوي في الملاجء فقط حوالي متين الف طفل و الباقي فريسه للجوع و المرض و الشارع والتوربيني ومش عرفة وزاره الشئون موقفها ايه من الوضع دة و فين الاصلاح الي ورا الوضع او الخطه او اي حاجه مسمعناش غير سرد و يعني كانت جنازة و الناس شبعت فيها لطم

الأميره أوسه said...

Memo
الأعلام لايهمه أطفال الشوارع
ولا يهمه غير السبق الأعلامى
وهكذا شأن الأعلاميين والأعلاميات بباقى القضايا
والوزيره راحت تشترى ورقة بوسته ومرجعتش

Memo said...

انا خايفه بعد كده نبقا شباب الشوارع ... و بعدين يعملو ليها وزاره و تبقا وزاره الشوارع
و نجوع كلنا

smraa alnil said...

ايه يا سيتي
انتي كتبتي البوست دة ونمتي ولا ايه
صباح الخير بليل بقي يا اوخنشي
مش عارفة وحشتيني فقلت اخش اسلم عليكي
مع اني كل مرة بشوف بوستك مش اتغير فبخرج تاني
بس قررت اني اعلق واقولك جيتي في بالي اوي وبقولك وحشتيني

الأميره أوسه said...

ميمو
أحنا كلنا أولاد شوارع
وكمان لينا حكومه
أنت مش أخد بالك

الأميره أوسه said...

سمراء النيل
أزيك فى البرد
أنا بس معنديش حاجه أكتبها
أنا بكتب دايمآ وأنا مهيسه
أو عامله دماغ
معكيش جوان
سيجاره يعنى

تمر حنه said...

آه يا أوسة لما تحطى صوابعك عالجراح و تضغطى .. بينز دم و ينز هم
.. رايحة أشم شوية كولّه ياكش أنسى - بتعمل دماغ كده و أحلى تهييس و أحلى بوستات : بوس ..تات
كل سنة و انتى طيبة

i love you said...

نعمل
مظاهرة
نعمل
ثورة
نعمل
انقلاب
نعمل
انتفاظة
نعمل
عملة
و
نرتااااااااااااااااح

albida said...

ايه يا بنتى الغيبة دى؟ يارب تكونى كويسة

على فكرة أنا عنوان البلوج بتاعى اتغير
albidalife.blospot.com

manal

الأميره أوسه said...

تمر حنه
وأنت طيبه
الموضه دلوقت شم الأستيون
سلامتك من الهم
يا تمر حنه يا جميله

الأميره أوسه said...

cigara
أزيك
فعلآ المهم نتحرك
تيجى نتقابل فوق كوبرى قصرالنيل ونقفز من فوق
أهى تجربه جديده
أحتمال تكون أفضل من العيشه دى
صحيح مفكرتيش تنتحرى قبل كده
وكام مره ؟
سؤال بجد مش هزار

الأميره أوسه said...

albida
أدينى عايشه ماذلت
شكرأ على سؤالك
وكتابة العنوان الجديد
أخبار الشتاء أيه عندك

كلبوزة لكن سمباتيك said...

فين الجديد يا جميل
وحشتينا
من ساعة البرد ما هجم لا عارفين نجعمز على السطوح و نرغي زي زمان
و لا عارفين ننشر

ماتيجي تشربي سحلب بالمكسرات و ننم شوية
قبلاتشي

soosa el-mafroosa said...

أوسة يا حبيبتشي وحشتيني جدا

انتي طولتي في الغيبة ليه المرة دي؟

بلوجر مش هو بلوجر من غيرك

تحياتشي يا قمر

أمممواة

الأميره أوسه said...

Sampateek
فاكره أيام الجعمزه على السطوح
أحلى أيام
ليه مش علقتى على البوست ده
على العموم هاكتب غيره

==============
سوسه المفروسه
أزيك
عزلتى خلاص فى البيت الجديد
مش عارفه أكتب حاجه
الورشه واخده كل وقتى

مراقب مصري said...

الأمية أووسة

115 تعليق
مرة واحدة
ماشي يا عم الناس الجامدة اللي التعليقات عندها كدة

الموضوع مش بكتر التعليقات طبعا لكن بقيمة ما نكتبه... وانتي كتاباتك كلها قيمة وجمال... بركاتك يا ست

نيااههاههااا

-- said...

لا جامده

بجد جامده

الأميره أوسه said...

Reformer1976
تانى أنت
عينك وحشه
النهارده الخميس

الأميره أوسه said...

زعروره
شكرآ
أخبارك أيه

abdullah-blogs said...

This is such a nice addition thanks!!!
عرب كول
شات صوتيشات
شات مغربي
دردشه صوتيه
إنحراف كام
شات عرب كول
صوتيشات كول
دردشه صوتيه
سعودي كول

أفضل  ألف  مدونة