أفضل  مئة  مدونة

Sunday, September 09, 2007

رمضانيات

عزيزى المدون عزيزتى المدونه الأخوه الزائرين كل عام وأنتم بخير بمناسبة حلول شهر رمضان المبارك أعاده الله عليكم باليمن والبركات و بالمناسبة دى أنا قررت أوزع لفة قمر الدين ونص كيلو بلح مع شوية بمب وصواريخ لكل مدون جرىء لايعرف الخوف وبمناسبة البمب أنا النهارده أنضرب فيا بمب طبعآ زى كل سنه الأولاد الشاطرين بيعدوا على الشقق يلموا فلوس عشان الزينه والفانوس اللى هاينور أم الشارع
طبعآ أفتكرونى وعدى عليا عيل طفل عنده ست سنين كمندوب عن أولاد شارعنا وطلب منى عشره جنيه
طبعآ أنا بكل سذاجه جريت على الشنطه على غير عادتى وطلعت حته بعشره بس أيه بتــــدبــــح
أتفضل يا حبيبى بس الكلام على أيه عشان الشرط نور
أيوه يا طنط هانوصلك فرعين زينه واحد أحمر والتانى فوشيا وكمان بكرانيش والفانوس فى النص
شاطر يا مازن أتفضل الفلوس أهيه وخد كمان سيجاره كليوباترا حلى بقك الصغنون
متنساش تسلم على مامتك دى حبيبتشى
طبعآ جريت على البلكونه ونورتها وجبت حبل غسيل بطول العماره عشان أسحب الزينه من الشارع
الى الشرفه اللى هى البلكونه عشان الناس المثكــفـــه وشويه كده وبدأت الناس تخرج فى البلكونات فى أنتظار تعليق الزينه وهاتك يا سلامات وكل عام وأنتم كويسبن و وأنا برد السلام بمنتهى الموده
و الحكمه و شويه كمان والزينه وصلت وشباب ورجاله و أولاد وبنات وهيـــــــــــه زيطه بقا
وأنا هايصه وجارتى فوق بتسألنى هم بيعلقوا زينه طيب مين دفع
رديت عليها كلنا دفعنا كل واحد عشره جنيه فرعين زينه وفانوس ونص كيلو كنافه
طيب يا أوسه خدى خمسه جنيه وأدينى فرع
أسفه مش أقدر عشان سمعتى فى المنطقه
طبعآ الشارع طويل بدأوا تعليق الزينه من جهة اليمين بالتحديد من عمارة أم مازن ثم عمارة الواد شهاب اللى فى خامسه أول ونصب عليا فى رمضان اللى فات فى خمسه جنيه يأأأأه ذكريات
بعد ساعتين بدأت الزينه تقرب فى أتجاهى وبدأت أهلل و أشاور للجيران فى فرح
وفجأة الساعه عشرة مساء بتوقيت الحاره بدأت فلول الشعب فى الأختفاء معلنه عن التوقف لحين شراءالمزيد من الزينه ومرت دقائق الأنتظار مريره ولم يعد هناك فى الشرفات الخاويه سوايا أنا وأحدى جاراتى
فى المنزل المقابل نتبادل النظرات فى صمت والألم يعتصر شنطتى على العشره جنيه
قررت أن أستجمع شجاعتى وأسألها فى صوت لا يخلو من التردد
ههههى الساعه كام معاكى يا أم العربى
أم العربى ترد فى أنكسار ورائحة الممبار تطل من فمها رغم عرض الشارع الذى يبلغ ست أمتار
خلاص داخلين على نص الليل يا أوسه
كل عام وأنت طيبه يا أم العربى رمضان على الأبواب
تعيشى وتفتكرى يا حبيبتــــشى أزي مامتك والنبى ماحد بيسأل عليا غيرك
أن شاء االله تكونى السنه الجايه فوق جبل المقطم بتشوى دره يا أم العربى
وذلك بعد أن أكتشفت أن أم العربى مش سمعانى
دقائق ممله بطيئه مرت قبل أن أسمع وقع أقدام تدق على الطريق
حاولت الوقوف على أطراف أصابعى والنظر فى أتجاه الصوت القادم فوق أرض الشارع المكسر عشان بيوصلوا الغاز عقبال عندكو
وأذا به عم حنفى زوج أم العربى قادم من على القهوه يا فرحت مصر بيه
فابتسمت أم العربى و لوحت بيدها فى الهواء على أستحياء ورياح الليل تداعب خصلات شعرها الداكن
أبتسم لها حنفى كاشفآ عن ظقم أسنانه ملوحآ بقدمه ورياح الليل تداعب شعر صدرة
يا واقعه سوده يعنى أنا الوحيده اللى فى أنتظار الزينه
بصراحه أنتابتنى حاله من الغليان والزهق
وبصوت عالى أقسمت على أسترداد أموالى
لمحت أحد الصبيه يمر أسفل المنزل فناديته
واد يا عادل أنت مش كنت مع مازن وهو بيلم الفلوس فين الزينه ياض
أيوه يا طنط بس الفلوس مع تامر وصلاح
تامر مين ياض
صدقينى يا طنط بكره الصبح هاروح لتامر ونعدى على صلاح نجيب الفلوس منه
أوكى يا عادل بس أوعا ماتجييش
وهكذا يا أعزائى كانت قصتى مع الزينه وطبعآ مر يومان ولم أحصل على أموالى وأيضآ لم يتم تعليق الفانوس بل أنتشرت أشاعه فى الحى كله أنى أنا كسرت الفانوس
أسأله كثيره تبحث عن أجابه
هل ذهبت العشرة جنيهات بغير رجعه هيهات
اين الفانوس ومن الذين أطلقوا الشائعه فى ظل غياب الفانوس
هل هو مازن هل هو الأعلام هل الحكومه أم هى جريدة الدستور
و على كل وبرغم غياب الفانوس فسيأتى رمضان فى موعده ليحتضن الجميع
ونستمتع بالشهر الكريم ونتقرب الى الله ونخشع له وندعوه أن تزول همومنا وهموم هذا الوطن
و كل عام وأنتم بخير



الأميره أوسا
أميرة الكونغو وبيروت وميدان لبنان
الطبعه الرابعه
مطابع الحوارتجيه
السادس من آيار سحلول الأول

23 comments:

أُكتب بالرصاص said...

ألف مبرووك على الفانوس

أقصد على رمضان
ومعلهش تتعوض السنة الجاية
اقصد الفانوس

حاولي انت تهتمي به
قصدي رمضان

وربنا يبلغنا اياه

اقصد الفانوس او الفلوس

وتحية للبواسل الاشامي تامر وعيضة المنهالي و أبو مازن


وابو عمار

Layla said...

معلش يا اوسة..واضح ان العيال اتعودت ان رمضان مايبقاش رمضان من غير ما يخدوا منك الفلوس ويضربوا على الزينة

هههه...كل سنة وانت طيبة

Anonymous said...

خخخخخخخخخخخخخخخخ

يا مجرمةةةةةةة
مش تزمرى انك هنا؟؟
ربنا يكرمه الريدر اللى عرفنى انك ظهرتى


وحشتينى جداااااااااا

رمضان كريم
وكل سنةوانتى طيبة وبألف خير
وجميلة ومتألقة وعسولة زى ما أنتى كدة يا رب


==============

خخخخخخخخخخخخخخ

رصاص

هو عيضة المنهالى دة اسمه مش غريب عليا

شبابيك عربية said...

معلش يا أوسة تعيشى وتاخدى غيرها
وكل سنة وانت طيبة ورمضان كريم

^ H@fSS@^ said...

لووووووووووووووووووووووولذيخرب بيت شيطانك يا اوستي ذموتيني من الضحك على الفانوس و العشرة جنية و كل الهلمة دي
معلش ربنا يعوض عليكي خير و كل فانوس و انتي بخير

الربان said...

تحياتي

كل سنه و انت طيبة...أعاده الله علينا و عليكم و علي الجميع أزمنة مديدة و أعواما عديدة...في ثوب الصحة و العافية...و تقبل منا صيامنا و قيامنا و سائر طاعاتنا.

تحياتي

جميله بو حريد said...

شاركونا بأراءكم فى أرضنا

أرض النساء لا مكان لدينا للتعصب و القبليه

مجتمع النساء كما حلمنا به

http://landofwomen.blogspot.com/

جبهة التهييس الشعبية said...

ههههههههههههههههههههههه
انت يا بت يا نصابة
انت بتغطسي فين
اعترفي
لاخدك القسم ويكتبوا عنك في الجرايد: وانهارت واعترفت

soosa el-mafroosa said...

يا حييييييييييييييييييني

و أخدوا منك الفلوس يا أوختشي؟؟

و ماجابوش الفانوس

العيال دول ايه ..يكونش أهاليهم في الحزن الوطني؟؟

عموما يا أوسة انتي اللي غلطانة

حد برضه يآمن لواحد اسمه مازن و مصاحب واحد اسمه صلاح

صلاح؟؟

صلاح ده انقرض من زمان ...دول شكلهم عصابة يا ماما

بس انتي طيبة أوي يا أوسة ..و قلبك حنين

ماتشوفيلي معاكي 50 جنيه

كل سنة وانتي طيبة يا قمر

بس اوعي في العيد ياخدوا منك العيدية

أممممواه

الأميره أوسه said...

أُكتب بالرصاص
عزيزى وأخى كل عام وأنت فى أحسن حال
ياترى أنت فين دلوقت
لسه سواح فى العالم
ترجع بالسلامه

الأميره أوسه said...

Marvel

طبعآ أنا بقيت زى ياميش رمضان
فى الحى بتاعى
كل سنه وأنت طيب

الأميره أوسه said...

شـــــهــــروزة
أزيك يا جميله
تانى رمضان يمر علينا
ربنا يجعل أيامك كلها سعاده
بس أيه حكاية التفعيص فى المواصلات ده
أهو بالمره أجى أفعص فى الجيلى
أمواااااااه

الأميره أوسه said...

شبابيك عربية

شكرآ ليك
و رمضان كريم يا شباك

الأميره أوسه said...

HafSSa
أنتى فين وحشانى
أنتى هنا ولا هناك
وياترى رمضان عندك أخباره أيه
الناس عندنا عندهم صدمه ماديه
رمضان جه مع المدارس مع غلاء الأسعار
وحبس الصحفيين
أشاعات أشاعات

الأميره أوسه said...

الربان
شكرآ على مرورك
وكل رمضان وأنت بخير

الأميره أوسه said...

جميله بو حريد
أنت جيتى من الجزائر
حمدالله على السلامه
أنتى بتعملى أعلان عن أيه

الأميره أوسه said...

جبهة التهييس الشعبية

لوووووووووووووول

لسه الدى أس أل واصل أمبارح
ضحيت بأموالى من أجل العوده
الى عالم التدوين
رمضان كريم عليكى وعلى الأسره
هاتى بوسه هاتى

الأميره أوسه said...

soosa el-mafroosa
أهلآ بنت عمى العزيزه
أخبارك أيه
شوفت العيال بيعملوا أيه
بس لعلمك فلوسى والله رجعتللى
عشان حلال
أنت محتاجه خمسون جنيه
طيب مش لما ترجعى السبعين جنيه القديمه
على العموم أتفضلى الناس لبعضيها
و كمان لفة قمر الدين مغشوش
كل سنه وأنت طيبه
أموااااااااااااااااااه

3abdo me7tas said...

انا اول مرة أدخل المدونة وان شاء الله مش هتبقى آخر مرة
بجد الموضوع روعه روعه
وكل سنه وانتى طيبة ورمضان كريم

اللى اقدر اقوله
انك بجد زى العسل وربنا يحميكى يا رب ويوفقك
كفاية شوية الضحك اللى انا ضحكتهم والله
جزاكى الله كل خير يا رب
بالنسبة للعشرة جنيه بقى انا بقول انسيها واعتبريها زكاه رمضان بقى وخلاص

Desert cat said...

انا لو منك كنت وقفت للواد مازن فى قلب الشارع ومش خليته يعدى الا لما يجيب لى العشرة جنيه
دى عشرة جنيه يا ماما مش اى حاجه
رمضان كريم
وكل سنة وانتى بالف خير

الأميره أوسه said...

3abdo me7tas
كل رمضان وأنت بخير
أنساها ده أنت طيب
أنا الفلوس والله جات لحد عندى
الزكاه دى فرض لابد منه
شرفتنى وربنا يكرمك فى الشهر الفضيل

الأميره أوسه said...

Desert cat
مازن سلم نفسه مع الفلوس
أختار الحل السلمى بدل ماجرسه فى الشارع
فين بقا الخمسه جنيه اللى عليكى

abdullah-blogs said...

This is such a nice addition thanks!!!
عرب كول
شات صوتيشات
شات مغربي
دردشه صوتيه
إنحراف كام
شات عرب كول
صوتيشات كول
دردشه صوتيه
سعودي كول

أفضل  ألف  مدونة