أفضل  مئة  مدونة

Thursday, September 13, 2007

مهـــرجان الســــجن للجمــــيع


بدأت فاعليات مهرجان السجن للجميع بسجن أربع من رموز الصحافه المستقله الحره فى مصر بعد صدور تقرير من قبل المجلس الأعلى للصحافه بأدانتهم و التخلص منهم كبدايه للتخلص من الصحف المستقله والمعارضه بعد زيادة حجم مبيعاتها وأزدياد أعداد قرائها مقارنة بالصحف الحكوميه التى أنخفضت مبيعاتها بشكل ملحوظ بل أكاد أزعم أن من يقدم على شراء هذه الصحف يكون بغرض الأستفادة من كثرة عدد صفحاتها التى تتعدد أستخدامتها سواء لفرشها على الأرض أستعدادآ لأكلة سمك مشوى على كيفك مع وجود عدد من الأكيله يتعذر معه أستخدام ترابيزه السفره المسكينه ومنها تأتى أهمية هذه الصحف وأن كانت الشكوى العامه من مستخدميها هو نوعية الحبر الردىء الذى يطبع
على ملابسنا كما أشتكى بعض البسطاء فى المناطق المقطوع عنها المياه
منذ فتره طويله من أن أستخدام أوراق هذه الصحف بعد قضاء حاجتهم فى
دورات المياه ينتج عنه تلوث مؤخراتهم باللون الأسود المهبب
مش عارفه أيه حكاية الحكومه بمؤخرات الشعب هم ليه صحيح مهتمين أوى بيها كده المهم من أجل مؤخرات نظيفة ناصعة البياض ننادى بصحافة بيضاء أى خاليه من الكتابه والأحبار فلا داعى لتحمل عناء الكتابه فياريت يشتروا دماغهم ويصدروا صحفهم بيضاء وتخيلوا مدى أقبال الشعب على شراء الصحف القوميه الخاليه من الأحبار حيث سنستفيد منها بشكل أوسع فيمكن للتلاميذ كتابة فروضهم و واجباتهم المدرسيه عليها كما يمكن تصديرها للخارج كورق تواليت أمن ونظيف
بالأضافه للأستخدامات المعتاده اللى أتعودنا عليها عمل القراطيس الخاصة بالب والترمس وتلميع الزجاج ولف الشندويشتات الى أخره مما يزيد من الأقبال عليها بدلآ من أنتهاز الفرص للقضاء على الصحافه الحره و القاء اللوم على رؤساء مجالس أدارتها فى كل مصيبه تحدث ومنها أنخفاض أل حجم الأستثمارات أل نتيجة أوشاعه مغرضه للدرجه دى وصل الأستخفاف بعقولنا والى هذا الحد وصل الأمر أن يتخلى المجلس الأعلى للصحافة ونقابة الصحفيين عن مبدأ حرية الصحافه مقابل النيل من الصحف المستقله حتى لو كان الثمن هو الأرتداد مره أخرى
الى الخلف حيث لاحريه ولا رأى سوى للصحف الأمنيه وحيث محاكم التفتيش
أن الحكم على هؤلاء الصحفيين بالسجن والغرامه هو حكم علينا جميعآ بالخرس الجماعى وعدم محاولة التعبير او حتى التفكير
أنها رسالة حاده موجهة للجميع من النظام وليس للصحف المستقله وحدها الرساله التى بدأت مع ضرب الصحفيات والأعتداء عليهن وضرب قاض وسجن بعض الناشطين والمدونين و التربص بأى أنسان يستطيع أن يستخدم قلمه أو لسانه فى التعبير مع وجود كم من التهم جاهز وتفصيل تحت شعار السجون تتسع للجميع وبذلك ستحتفظ بلدنا بمكانتها فى قائمة أسوء الدول تعاملآ مع الحريات وأيضأ ستحتفظ بوضعها كدولة فقيره ناميه حيث لا أرتقاء ولا تقدم بدون الكلمة الحره
والفكر الحر المستنير الذى يولد الأبداع



41 comments:

أوشه said...

هيييييييييييييه....
أول تعلييييييق....

ايه البوست الجامد ده يا أوسه
على فكره انا حاسه ان بكره هنحصلهم احنا كمان وكل ما نفتح بلوج نظيف
هنلاقي
this page is not found
never try again later

كل سنه وانتي طيبه يا قمر

مراقب مصري said...

هههههههههههه

بصي يا مزة المدونات
إحنا لازم نشوف نفسنا بقى
ومن هنا ورايح نشتم في الصحافة الصفرا
ونبوس "..." الزعيم في الرايحة وفي الجاية
أيوة لازم نبوس رجليه في الرايحة وفي الجاية
لأ ولازم نكفر بالله ونعبد الرئيس
وحرم الرئيس
واولاد الرئيس
وأحفاد الرئيس
والبيه اللي بيمسح جزم عيلة الرئيس
ولازم المسلمين يبطلوا يصوموا رمضان ويصوموا مبارك
ولازم كل الشوارع تبقى اتجاه واحد ويبقى اسمها كلها شارع سوزان
وتبقى السمنة الوحيدة في كل بيت - وبالأمر - هي يمنة "الهانم"

وبعدين المثل بيقول إذا لقيت نفسك في بلد بتعبد العجل اعمل إيه؟
اسم الله عليكي وع العجل... حشي يا أوختشي وارمي له

وبعدين المدارس داخلة بكرة ولازم من دلوقت تجهزي جبنة لا فاش كيري
جبنة لذيذة ومغذية لا فاش كيري

ورمضان مبارك عليكي يا أوختشي ويا جمال رمضان!!

الأميره أوسه said...

أوشه
التشابه بين أسمى وأسمك واضح
عشان كده ياريت لو حصلى أى مشكله مع الأمن أنك تسلمى نفسك بدالى عشان مش فاضيه والناس لبعضيها
هو فى الغالب هيلغوا المدونات
All the bloggers are detainees and beaten by the state security
شرفتى أوشأش

الأميره أوسه said...

مينا ذكرى
الشهير بالحاج جرجس
الأمور أتضحت خلاص
من حقك تكتب فى أى موضوع فيما عدا الحكم والنظام
يعنى نكتب بقا عن الطبيخ و مسلسلات رمضان
نحن أمة ضحكت من جهلها الأمم
الصحافه وقفت فى صف القضاه
ثم قام القضاه بحبسهم
الظاهر أنها كلها مصالح
وشعارات بيرددوها وقت الشده
الخلاصة أحنا دولة ممزقه ومحتله
وشعبها عامل دماغ بنج عاليه
سلامات يا مينا

أحمد العربي said...

الحمد لله انا فطرت خلاص
اصلي انا دخلت بدري وقريت الموضوع وكنت صايم
فبصراحة مقدرتش ارد
لحسن صيامي يضيع اونطة
لكن الحمد لله
انا فطرت وصليت العشا والتراويح وفضيتلهم خلاص
بصي يا عزيزتي
النظام عامل زي الطفل الصغير
اللي مش لاقي حاجة يعملها طول النهار قوم يحدف الناس بالطوب في الشوارع ويكب عليهم ماية من فوق
نظام استخدم منهج التفاهة وللاسف لقينا كشعب اقتنع بتفاهاته قام عاش في الدور وهات يا تفاهات
للاسف النظام وكلابة سواء صحفيين او امن دولة او غيرهم مش لاقين تهم مقنعة يلفقوها للصحفيين
سب رئيس الجمهورية
في نفسة كلمي اقولها بس مش قادر الدنيا رمضان برضة
طيب يا سيدي هو سب قال اية
قال ابن الكلب
ولا ابن الغسالة مثلا زي ماقالة صدام حسين
لا النقد كان بشكل موضوعي وحنا زي مابتصدعونا ليل نها احنا دولة ديمواقراطية احنا دولة ديمواقراطية
والله محصلناش مهلبية حتي
وبعدين مش شب رئيس الجمهورية بس لا ده سب نجل رئيس الجمهورية
حلاوتك يا جيمي يا ابو شنة ورنة
بقيت حاجة ياد مهمة وبقوا بيسبوك وبيشتموك في جرايد صفرا
اه يا بلد ماشية لورا
عارفة يا عزيزتي احيانا بيصعب عليا النظام
اه والله احيانا بحسة تاية في ملكوت ربة
مش عارف بيعمل اية
ومش عارف يخترع اية
ياعيني ع الحنية
كلمتين حبيب قلبي ابراهيم عيسي خسرت ع البلد 350 مليون دولار
ياولدي
الله يخرب بيتك يا استاذ ابراهيم
وانا بقول مرتب ابويا شغال يخصموا فية لية والاسعار عمالة بتزيد
اتريك انت السبب
اخيييييييية عليك
لا لا يا هيما
انت وحش خالص مالص
350 مليون دولار يا مفتري علشان كتبلتك كلمتين لاراحوا ولا جم
ههههههههههههههههه
تحسيهم بيكلموا هبل
وعبط وناس ساذجيين هايصدقوه علي طول
ع العموم اكيد الكلام لية باقي بس مش دلوقتي
ههههه
واسمحيلي اسجل المدونة عندي
تحياتي

مراقب مصري said...

بصي يا ستي

الداخلية دول اولاد أبالسة
من ساعة ما خلوا الظباط يتاخدوا ويبقوال وكلاء نيابة وقد تم اختراق النيابة ومن ثم القضاء وخصوصا قضاء الدرجة الأولى من قبل جهاز الشرطة وعقلية ونفسية ظباط الشرطة فيما أطلق عليه البعض عسكرة النيابة والقضاء

أنا بحزن جدا لما ألاقي حد من زمايلنا يقول لي لأ بلاش نفتح في نقد القضاة حاليا عشان دول في صفنا!!

يا سلاااااام إيه المبادئ العظيمة دي؟
نقدي للقضاء وفضحي لتجاوزات القضاء هو أكبر دفاع عن استقلال القضاء وهيبته إلخ والسكوت عن ما آل إليه القضاء في بلادنا من هوان هو جريمة أخلاقية ستدفع ثمنها أجيال عديدة

أوشه said...

بس كده يا أوسه ياختشي..
دانتشي تؤمري....


بس هو انا ماقولتلكيش؟!؟..
دانا بفكر أسمي نفسي :

DIGA??!!
عشان آخد حصانه وابقى تبع الحكومه
ساعتها أعرف أخدمك صح..

سلاااااام يا أسوس

بيجاسوس المصرى said...

و الله انا قاعد ادام المدونة ربع ساعة ما مصدق ان اوسه رجعت تانى

حمد الله على السلامة على يا ست الكل
و الله وحشتنا

و كل سنة و انتى بالف خير و سعادة دايما و رمضان كريم

الأميره أوسه said...

أحمد العربى
شرفت المدونه وكل رمضان وأنت طيب
فعلآ المشكله فى أستخفاف الحكومه بعقول الشعب

شرفت يا مان

الأميره أوسه said...

مينا زكري

وقوف المدونين مع القضاة
أو أنهم فى صفنا ده كلام غير صحيح
القضاة بحكم مراكزهم مشغولين بحاجات أهم
وأعتقد أن أخر همهم هو أحداث الوطن مش تقول المدونين
فى ناس بتقول علينا ناس فاضيه عشان كده بنكتب
مش عارفين أن ده أفضل من الخرس الذى يودى بصاحبه للجنون
أكتب يا مينا براحتك
أديك بتعبر عن رأيك
تحياتى

الأميره أوسه said...

أوشه
أيه ديجه دى تقصدى خديجه
لا خلاص بح
بصراحه هى أموره أينعم أنت أجمل
بس اللى حصل حصل
هو الخسران
سلاموز

الأميره أوسه said...

بيجاسوس المصرى
صديقى العزيز
رمضان كريم يا باشا
أخبارك أيه
أتفضل كنافه بالمكسرات والجبنه الرومى

admin said...

رمضان كريم
سلام

الأميره أوسه said...

4xmisr
وأنت طيب
سلام

Anonymous said...

باراهيم عيسى خسر البلد 350ميون دولار
يا ترى حساب باراهيم نافع من اختلاساته من مؤسسة الأهرام وصل لكام لحد دلوقتى ومازال بيكتب فى الاهرام ومازال حرا طليقا"؟؟

يا ترى حساب سمير رجب من اختلاسات مؤسسةالجمهورية أد اية ومازال رئيس للتحرير؟؟؟؟

أعتقد حيعدى ضعف الـ350مليون دولار وكله من جيب الحكومة

ولا التعر...لامؤاخذة يعنى
حزقهم فى دول لما هددوا انهم لو اتكلموا حيفتحوا دفاتر قديمة ويسحبوا رجل ناس كبيرة وتقيلة ؟؟

نورتى بلوجر تانى يا حبيبة ألبى يا وحشانى
ومبروك النيولوك

رمضان كريم

حاول تفتكرنى said...

المشكلة ان قائمة المخالفات اللى تودي فى داهية دائما فى أنتظار المغضوب عليهم

والمصيبة أنها كلها قانونية

ترى لو كان القانون ينطق ماذا سيقول؟

3abdo me7tas said...

لا تعليق
لاكن اريد صفحة بيضاء عشان المية قطعت عندى
:D

ibn nasser - ابن ناصر said...

موضوع جميل جدا
فعلاً السحن اللجميع !
.
و
رمــضان كريــم
وكل عـام وأنتـم
بخيـر
..

Desert cat said...

تعيش الحكومة ويموت الشعب
هو ابراهيم عيسى اللى غلطان يا اوختى
ازاى تسول له نفسه انه يجيب يسرة ريسنا وابنه ريسنا المستقبلى
مش كفاية مستحميلنا فى التكية بتاعتهم يقوم كمان نطنطط عليهم ونطلع اوشاعات والبلد قصدى التكية تخسر والاسهم تتراجع والتخلف يعم البلد والفساد ينتشر
والرشوة والمحسوبية فى كل مكان
ولو فكرتى تخلصى ورقة من اى مصلحة حكومة يبقا ابجنى تجدنى
لالالالالالالالالالالالا
ده افرتا بصراحة الناس ماهم مريحينا على الاخر اهوه
كل سنة وانتى طيبة يا جميل

كلبوزة لكن سمباتيك said...

ازيك يا اوسا ليكي وحشة ابقي تعالي خديها
انا مش عايزة اشارك في المهرجان ده يا اختشي لانهم مش بيقدموا قمر الدين في السجن و سمعت ان الفطار ناشف قوي

السجن كان للجدعان
دلوقت السجن للجميع

عجبي

كلبوزة لكن سمباتيك said...

فاكرة فؤاد المهندس في مسرحية حواء الساعة 12 لما قالها انت متي
قالتله الملافظ سعد
قول
انتقلتي الى الرفيق الاعلي

و هكذا ثبت ان كلمة مات كلمة ابيحة اياه لكسكلياه و
رمضان كريم

صاحب البوابــة said...

بوست أكثر من رائع

وكل عام وانتِ بخير

تحياتى

بنت القمر said...

السجن جماعه زى الصلاة جماعه
والبركه في الجماعه يابنتى اهو يونسوا بعض في اراميدان وبعدين ما هما يستاهلوا
التطاول والاساءه لرموز الحزب الوطنى دي تهمه مش سهله با اسئوسه
عيب بجد برضه الناس مقامات والسقا كمان مات
العين ما تترفعش عن المناخير
طب امال اسمها صحافه معارضه ليه؟؟ ممكن حد يفهمنى عشان تعارض مين ؟؟
عم برعي الكمسري
بلد العجب يا مصر

فارس عبدالفتاح said...

السلام عليكم


اصحح مقولت


الشعب فى خدمة الشرطة

الصحيح


الشعب والشرطة في خدمة الوطن


هذا الشعار رفعه ( العدل ) فى اول تولية رئاسة وزارة الداخلية

والمقصود من هذا الشعار هو الشعب والشرطة فى خدمة الوطن والمقصود هنا بالوطن ليس الموقع الجغرافي والتاريخي لهذه الارض او تاريخ شعوبها ومجتمعاتهم

انما المقصود بالوطن هواختذال الوطن فى شخصية ( القائد الرمذ )

GWAD said...

اولا احب احى الاميرة اوسةواقدم لها فروض الولاء والطاعة لانها اميرة البلوجرية
انتى عارفة ان الواحد مش بيحب يتسجن لوحدة
وانا شخصيا بحب الونسة
المهم هى جت على ابراهيم عيسى وعادل حمودة ووائل الابراشر وعبدالحليم قنديل
كان من قبلهم كتير واحنا قاعدين ساكتين
فى واحد اتخطف من سنين اسمة رضا هلال حد فاكرة طبعا لا
فيى خيرت الشاطر واخوانة قال اية هما الاخوان فاضين يجيبوا فلوس ويكلفوا نفسهم بغسيلها وانتى عارفة ان الاريال والاومو مش رخاص قوى
تحياتى اميرتى

خيرالدين said...

بس تقربا هم جادين فى تنفيذ فاعليات المهرجان ده مش زى مهرجان الاعلانات للجميع


سيبك
احلى حاجه فى الجرائد الحكوميه انها بتشرب الزيت

الأميره أوسه said...

شـــــهــــروزة
أنتى اللى نورتى المدونه
يا جميل أنت يا قمر

الأميره أوسه said...

حاول تفتكرنى
لو القانون نطق أكيد هايقول كلمه وحشه بس خليها بعد رمضان
تشاو

الأميره أوسه said...

3abdo me7tas
شيلالك كمية جرايد كتير
هابعتهملك وأديها أنت بقا راحتك

الأميره أوسه said...

ibn nasser - ابن ناصر
أسمك جميل
عشان بحب عبد الناصر
وأنت طيب

الأميره أوسه said...

Desert cat
قطتى الحلوه
وأنت طيبه
هو أبراهيم عيسى كده
غاوى سجن
يعيش الريس

الأميره أوسه said...

Sampateek
أزيك وحشـــــــــــــــــــانى
هو السجن يكون حلو من غيرك
طيب دى فرصه نتفك شويه من روتين الحياه
وكمان بيقولوا فى تحرشات فى السجن
أحنا حنتروق يعنى
هههههههههههههه

الأميره أوسه said...

صاحب البوابــة
وأنت بخير وطيب
أنا سمعت أنك طويل جدآ
سلفنى شوية طول الله يكرمك

الأميره أوسه said...

بنت القمر
النيل بيمسى على المالح
وبيقوله النجمه أخت القمر
و فى السجن يحلى السهر
معانا ولا مش ناويه

الأميره أوسه said...

فارس عبدالفتاح
الزعيم عبد الناصر بنفسه هنا
شفت حضرتك عملوا أيه فينا
و كمات الدول العربيه بتتبجح علينا
أحنا أتبهدلنا من بعدك
وشكرآ لتوضيح معنى الوطن
ضاع الوطن

الأميره أوسه said...

GWAD
شكرآ يا باشا على الكلام الشديد
و مش تقلق أنا هادخل للأفراج عن الجميع والقبض على المدونين كلهم
عاوزين نتقابل كلنا فى سجن مختلط
معرفة الناس كنوز
ليك فى الكنوز

الأميره أوسه said...

e7na
أنت بتقول فيها
هو فى حد يعرف يقلى بطاطس من غير الأهرام
أو يقلى طعميه من غير الأخبار
الجمهوريه بقا شايفه نفسها
يتعملها قراطبس يا بلاش

LAMIA MAHMOUD said...

miss u

kol sana w 2enty tayba

lesaky nawya twadena fe dahya :)

moooooh

الأميره أوسه said...

LAMIA MAHMOUD
I miss you too
السجن للأحرار وأنت حره
حوشى بس شوية علب سجايلر كليوباترا
لزوم التظبيط فى السجن النسائى
وياريت لو تعرفى واحده عزيزه عليكى
أدينى أسمها عشان أورطها معانا
ده أحنا هانسوى الهوايل فى السجن

He and She said...

wallahi enti 3agabani awi. Serious. specially after I read your comment at shahroosa blog. I am sorry I didnt find your personal email to send you this personal complement. You have the right not to post it anyway but at least I know you read it

abdullah-blogs said...

This is such a nice addition thanks!!!
عرب كول
شات صوتيشات
شات مغربي
دردشه صوتيه
إنحراف كام
شات عرب كول
صوتيشات كول
دردشه صوتيه
سعودي كول

أفضل  ألف  مدونة