أفضل  مئة  مدونة

Friday, September 21, 2007

طااااطى طاااااطى طاااااااااااطى

أبويااااااا


المشهد ده رغم حدوثه من شهر لكنه دائمآ مايقفز أمامى ويلاحقنى وكلما حاولت نسيانه كلما عاد ليزعجنى بتفاصيله المؤلمه
مكان الحدث شارع الهرم بالتحديد أمام أحد معارض البرديات والذهب الذى يزوره السياح يوميآ لشراء هدايا تذكاريه
الزمان يوم جمعه وأثناء خروج المصلين من صلاة الجمعه و مرورهم على نفس الرصيف الذى تراصت بجواره خمس أتوبيسات سياحيه فى أنتظار أشاره من مشرفى شركة السياحه للنزول لزيارة الجاليرى وفى نفس التوقيت على الجهه المقابله يتوقف ميكروباس فجأه من نوع الفلوكس
ثم يلحق بيه ميكروباس أخر ليتوقف معترضآ طريق الأول واضح أنها كانت مطارده وأنتهت فى تلك البقعه فى لمح البصر نزل كل سائق مسرعآ للأنقضاض على السائق الآخر مدججان بقطع حديديه وهاتك ياضرب والركاب طبعآ لأستكمال المشهد نزلوا من الميكروبسات وأديها
صويت وصراخ اللى جرى يمين واللى راح شمال والأجانب بتتفرج من نوافذ الأتوبيسات السياحيه وأنطباعات متعدده بتوضح أن الموضوع مش ساسبنس بالنسبه ليهم وأنهم واخدين فى بلادهم على كده

واحد منهم بولندى واقف بيتفرج وهو بيصرخ بوليس بوليس وفجأه وكأن أبواب السما كانت سمعاه توقفت سيارة دوريه بيضاء قاطعه الطريق على الميكروباست بطريقة هوليوديه وفيها ثلاثه من أمناء الشرطه لابسين أبيض وكل امين منهم طول بعرض طبعآ الأجانب أطمنوا وبدأت تصقف للشرطه و أنتابتهم حاله من الحماسه وأنا بدأت أغنى أغنية أولاد بلادنا أولاد بلادنا للمطرب العظيم شكوكو
طبعآ ثوانى وصوت التصفيق توقف وتم أستبداله بنظرة ذهول وأستنكار
الساده أمناء الشرطه نزلوا ضرب على السائقين بدأو البدايه الطبيعيه وهى أصطياد قفاهم تلى ذلك شلاليط من تحت لفوق مع شتيمه نقاوه من اللى وصى عليها السيد حنفى بلطجه
طبعآ المشهد فزززززززززززززززيع صعب وصفه فى بعض السطور
الأجانب بتتفرج والأخوه المصلين توقفوا لمتابعة فاعليات التعذيب بأهتمام بالغ مما أثر على سيولة المرور
فى شارع الهرم فتوقف الطريق من الجانبين سؤال لكل قارىء هل توقف الموضوع عند ذلك
أبدآ بكل أسف بدأت أحداث أكثر ألمآ
أثناء علقة الموت كان واقف أخر راكب وهو عباره عن راجل غلبان حاضن أبنه تقريبآ عنده أربع سنين و فى أنتظار أنتهاء الخناقه لركوب الميكروباااااز مجدآآ ليه طبعآ عشان دافع أجره و ممكن مايكونش معاه فلوس
مع سيل الضرب اللى شغال ومحاولة السواقين التملص من الضرب أختبأ أحدهما خلف الراجل الغلبان تقريبآ الراجل الغلبان أعترض كأى مواطن مصرى شجيع وقال ممممممممعلهــــش والنـــبى يا باشا
الأمين أستجاب لنداء الغريزه وبدأ فى ضرب الراجل الغلبان بينما الراجل يحاول ألتقاط أكبر عدد ممكن من الصفعات والركلات لكى يحمى أبنه الصغير مما أعتبره الأمين أهانه فقرر أصطحابه الى سيارة الدوريه
فى مشهد غايه فى الساديه الأمين يسحب الراجل الى داخل السياره والطفل يصرخ ويحاول التعلق بوالده حتى نجح الأب فى أحتضان طفله تحت وابل من الضرب البشع وركب السياره فقام أمين أخر بشد الطفل بقسوه
وأخراجه بالقوه وسط دموع أبوه وتوسله بعدم ترك أبنه فى الشارع وحيد
أمين الشرطه بيصرخ فى الطفل أبن السنوات الأربع تعررررررررررررررررف ترروح ياض
طيب أقف هنا مكانك لحد منرجع أبوك
الطفل يخالف الأوامر ويجرى فى أتجاه سيارة نقل الموتى أقصد الدوريه وينادى أبوياااااااا فيعاود الأمين الكره ببساله كما لو كان فى حربه المقدسه فى شد الطفل وحمله وألقاءه بجوار الحائط
ردود الأفعال
أنا واقفه فى حالة خرس وخوف على الطفل و جسمى كله بيترعش من الغضب لكن مش بتحرك الشعب اللى لسه خارج من مسجد الصباح واقف يمصمص فى شفايفه ومعظمهم بيضرب كف على كف أحتمال الأرض تتشق و تطلع من جوفها تنين بيطلع نار من بقه يساعد الطفل وأبوه
الأجانب فى حالة غضب ودهشه وأستنكار بس مش النوع المحلى عدد كبير مخرج أيده من الأتوبيسات وبيشاور بطريقه أستنكاريه رافضه
العربيات اللى واقفه فى الزحمه بسبب الأختناق المرورى بيتابعوا الحدث وهم فى أنتظار أنفراجه فى
السيوله المروريه والطفل لسه بيصرخ أبويااااااااااااااااااااااااااااااااا
راجل لابس بدله شيك يوطى على ألأمناء يقولهم حاجه طبعآ مش سمعاها لأنى فى الجهه المقابله يقوم الأمين بأنزال المواطن الغلبان و ركوب سيارة الدوريه مع زمايله مع سرينه عاليه لأفساح الطريق
المواطن بيحضن أبنه ويشيله ويمشى فى طريقه

الشعب يتفرق وتعود السيوله المروريه
والسياح فى حالة ذهول وأنا وشى فى الأرض
الموقف ده لم يتعدى بضعة دقائق قليله لكنه كفيل بأظهار حقيقة أمرى أنا وكثيرين
أكتشفت أن الخوف والجبن والتردد و الأنبطاح ليست مشاعر أو ردود أفعال بقدر ماهى صفات جينيه نتوارثها جيل بعد جيل ونهديها لأطفالنا من بعدنا

لو حد ضربك يا حماده قوله الله يسامحك
الشتيمه مش بتلزق والضرب كمان
وأذا ضربوك على خدك اليمين ناولهم الشمال بمحبه وأن مكفاش متبخلش بقفاك حبه
وأن ذاد عليك الضرب تعمل أيه

طاطى

طاطى

56 comments:

أوشه said...

احنا اللي عملنا في نفسنا كده؟
ولا همــّا اللي زرعوا جوانا الخوف والجبن وعلمونا ازاي نطاطي؟

قتلوا النخوه اللي فينا
اغتصبوا حريتنا
نهبوا خيرنا
مرمغوا بكرامتنا الوحل
كسرونا ..
الواطيين خللونا نطاطي..

حسبنا الله ونعم الوكيل
الواحد عقله شت من كتر اللي بيشوفه ويسمعه

bluestone said...

انا قلبي اتوجع بجد ..
الفكرة مش في البهدلة واللا منظرنا اللي بقى عرة قدام طوب الارض وكل الشعوب دلوقتي (الشقيقة) منها وغير الشقيقة بتقولك ما هما بيطحنوا في بلدهم .. هنكون احن عليهم من المصريين اللي زيهم ..
انا بيصعب عليا قوي كرامة البني آدم ..
البني آدم في مصر مابقاش ليه تمن .. حاجة ببلاش كده .. وماعدش لينا كرامة . والمصيبة انها بقت حاجة عادية جدا ومفيش مشاكل والناس بتقف تتفرج وتستنى لما الخناقة تخلص عشان تروح .. ومش بعيد يلوموا الراكب الغلبان ..
هو كان لازم يقرفنا .. ما يروح يركب اي حاجة تانية .. لازم الميكروباص ده يعني ؟؟؟
دايما في الخوف والعجز بنعرف نلوم الضحية كويس قوي .. ويظهر انه سلوك مصري صميم ..
الحاجات دي يا اوسة بتتحفر جوانا وكل ما المهانة بتزيد والكرامة بتقل هنفضل نرجع لورا لما نبقى عبيد ..

صفات الانسان المصري بتتغير .. مابقيناش احنا اصلا .. الانسان المصري اللي كان بيختار الهه وشايف انه عنده اعظم حضارات الارض

موقف المصلين ده نرفزني جدا .. وده اكبر دليل على الخطاب الديني المهلهل اللي موجود في بلدنا

لا تربية ولا دين .. طيب ناقص ايه
ويقولك الشعب المؤمن والرئيس المؤمن ..
يا اخي ...

ولا بلاش ع الصبح ..
انا بس نفسي يكون فيه حل من اي نوع .. اي حد يقترح اي حل واحنا نكون معاه .. يعني الجمعيات والمبادرات وحتى كلام الصحافة مش نافع .. طيب فاضل ايه ؟؟؟؟؟
نلم فلوس من بعض ونأجر طقم محامين ونرفع قواضي .. ولا نلجأ للقضاء الدولي ولا ايه ؟؟؟

Anonymous said...

رغم حالة الفوران اللى حسيت بيها وانا باقرا
بل تجاوزت لذلك وعشت المشهد فى عقلى

محسيتش الا غصب عنى
برغبة عارمة فى البكاء

ولكن بكاء الذليل الكسير الحسير
بكاء الولاااياا
أول مرة أحس أن المصريين ولااياا
وواجب السترة عليهم

ولازم نطاطى نطاطى
أصلى عايشة فى وطن ديموقراطي

===============

وعندك حق يا أوسا
نحن نتوارث الجبن والغبن والمطاطية
كإرث الدم

Desert cat said...

ابكتينى على الطفل لانى بجد تعايشت معاه الموقف
طيب الناس اللى كانت بتصلى وبين ايدين ربنا حدش فيهم قال دينا كرم الانسان على سائر المخلوقات ليه
ودموع الطفل او صغر سنه مشفعش ليه عند امين الشرطة اللى جت له حاله هيستريا ده ليه
للدرجة دى الخوف والجبن خلاهم يركبوا على الشعب ويدلدلوا رجليهم
حسبنا الله ونعم الوكيل

soosa el-mafroosa said...

تصدقي و تؤمني بالله

انا دمي اتحرق من القراية بس

الله يكون في عون اللي كانوا بيتفرجوا

و الأجانب اللي كانوا بيتفرجوا زمانهم جاتلهم صدمة عصبية هيتعالجوا بسببها لسنين و سنين قدام


آه و الله يا أوسة صعبوا عليا السياح دول قوي

كده ..كده نعمل في السياح كده؟؟

الواد الصغير ده ماحدش علمه الإحساس بالمسؤولية وانه مش لازم يعيط قدام الأجانب

شعب غريب

أسوور said...

لا حول ولا قوة الا بالله

لا يمكن كنت هأسكت لو فى موقف زى دة

انا عندى اطفال وقلبى وجعنى من اهانة الراجل امام ابنه بل وتركه فى الشارع وحيدا

الأميره أوسه said...

أحنا بتعلم الخوف من نعومة أظافرنا
أول يوم فى المدرسه فاكراه يا أوشه
أسمعى الكلام و متتخنقيش مع حد
واللى يضرب قوليله الله يسامحك
وبعد عشر سنين
يأوشه لو شاب عكسك أو مد أيده عليكى
أو ضرب سكينه أوعى تردى عليه أوعى
تاخدى حقك لانك ملكيش حق
من حق أخوكى يضربك خافى
هاقول لبابا خافى
وحكايات العفريت وأمنا الغوله
و غرفة الفيران فى المدرسه
لحد الحرس الجامعى
لحد الخرس الجماعى
عادتشى عادتشى
و من خاف سلم
والجرى نص الجدعنه
الجبن سيد الأخلاق
الخوف مستحوز علينا من الصغر للكبر
علمونا أزاى نطاطى

الأميره أوسه said...

أوشه
التعليق اللى فات رد على تعليقك
و عادتشى

الأميره أوسه said...

bluestone
عادى أننا نتهان فى بلاد الجرب
اللى هم العرب
أنا فى مجال عملى فى السياحه
عرفت أن العرب هم أقل شعوب العالم أنسانيه ورحمه وعدل
أن لا أعتقد كثيرآ فى التاريخ و مدى صدق من كتبه
أنا أسفه أنا كمان الظاهر بقيت عنصريه ضد العرب
وأنا أقصد العرب كشعوب وحكومات حاليه
عشان الأخوه المتصيدين اللى رافعين راية العرب أفضل شعوب الأرض
رجوعآ للموضوع الأصلى
وأنا صغيره كنت بسمع جمله
أن الشعب بتاعنا سهل تجمعه بصفاره
وسهل تفرقه بعصايه
و لما كبرت لقيت العصايه خدت أشكال كتير
من نظرة التهديد للشتيمه
لحد الغاز والرصاص المطاطى
لكن الشعب فضل زى مهوه
نفس ملامحه القديمه اللى مليانه خوف
اللى بيخاف من بكره و من العسكرى
و بيخاف أوى من كلام الناس
وبيخاف يخلف بنات وأن خلفهم يخاف أكتر
ويخاف من المطر والضلمه
أحنا بنخاف من خيالنا
أما بالنسبه للمصليين فهم أيه غير الشعب اللى بيخاف
وبعدين هى مش الناس اللى بتصلى
برضه هى نفسها الناس اللى بتسرق
و بتقبل رشوه وبتدفع رشوه وهى نفسها
اللى بتحكم البلد
الناس كلها بتصلى متنسيش أننا شعب متدين بطبيعته هم بيقولوا كده
زى جارى اللى يرجع من الصلاه أو الشغل
يقعد فى البلكونه على أمل يشوف دراع
واحده بتنشر أو بنات الجيران يطلعوا البلكونات
و زميلى فى الشغل اللى بيخطب الجمعه
فى أحد المساجد لكنه بيكسل يشتغل
وبيزوغ أحيانآ ويروح ينام فى أى مكان
الكلام ده يبنطبق على أغلبية الشعب
هو أنا برضه خرجت عن الموضوع
أنت ليكى أسئله صعب أووووى
على العموم أنا شايفه الرجاله هى اللى مبوظه البلد
عشان كده لازم نسفرهم لكوكب المشترى
ونستورد رجال من الزهره
لسه هنرفع قواضى
طيب نحاكم مين ولا مين
لا أعتقد بوجود العدل على الأرض

الأميره أوسه said...

شـــــهــــروزة
كنت متأكده من ردة فعلك
أنت حساسه أوى
والله ياشهرو أنا مقدرتش أوصف بنفس
الطريقه اللى حصلت لان الموضوع كان أعنف
والناس فعلآ طيبين وهاديين ومطاطيين وعلى كيفك
الرجاله بتمصمص شفايفها طيب أحنا نعمل أيه
نديها صويت بقا
يالهوووووووووووووووووووووووووووى

الأميره أوسه said...

Desert caف
أنا كمان يا قطتى مستغربه
أيه اللى خلى قلوب الشرطه تكون بالقساوه دى
وياترى بيعرفوا يناموا ولا ضميرهم بيعذبهم
أو أيه المبررات اللى بيدوها لنفسهم
أن الشعب يستاهل
أو أن الطفل يستاهل
طيب الناس ليه دايمآ بتتفرج
وأنا ليه كنت بتفرج وليه جاللى شلل فكرى وقتها وليه بكتب البوست ده
أحتمال أنى بعترف أنى جبانه
عشان أخفف عن نفسى
يخربيت الظلم

الأميره أوسه said...

soosa el-mafroosa
مصدقاكى من غير حلفان
ههههههههههههههه
التعليق بتاعك ده مفروض ينشروه
على صفحة السياحه فى جريدة بعد الشر الأهرام
صحيح الواد بيعيط ليه
مفيش وعى سياحى
تخيلى لو علمنا أولادنا فى المدارس أنهم مش يعيطوا أمام السياح
يبقوا يشربوا حشيش أحسن
هههههههههههه
روحى ياسوسه يا بنت الأيه أنتشى

الأميره أوسه said...

ياسمين
أزيك هو أنتشى ياسمين بتاعت زمان صاحبتشى ولا أنتى وجه جديد
على العموم هاروح وأشوف
صدقينى صوت الصفعه على القفا
و حجم أيد السيد الأمين يجيبوا سكته قلبيه مش خرس
أنا أتسمرت فى مكانى
أنا جبانه يا ياسمين
أنا جبااااااااااااااااااااا

Enbee said...

في الواقع أنا شفت مواقف ظلم زي دي كتييير من قريب ومن بعيد ..شيء مرعب وفي الواقع ماكنتش لاقي كلمة أعلق بيها على الموضوع .. لغاية ماشفت ردك على
Desert cat
وانتي بتتساءلي عن أيه اللي قسى قلب الشرطة قوي كدة على الشعب
والرد على استفسارك بيسط ... الأفراد دول هم نفسيهم بتهدر آدميتهم من اليوم الأول لدخولهم المؤسسات الشرطية ويبيتعمل لهم غسيل مخ كامل يهيأولهم فيه أن لولا الشرطة البلد تخرب وانهم المسؤول الاول والاخير .. وكل ده علشان يكونوا مخلب قط للرتب الأكبر علشان يقوموا بالأعمال القذرة بدلاً عنهم .. ده بالاضافة إلى أن معظمهم بيكونوا من الطبقات الواطية إللي بتدور على المجد والشهرة بانتسابهم للشرطة

كل ده في ظل انعدام القانون لما الواحد يتصور انه هو القانون .. ولازم طول النهار يجيب شغل للقسم ولا الضابط اللي فوقه يبهدله ويجازيه لأنه بالشكل ده يكون مش شغااااال ومش شايف شغله ويتعرض للجزاءات التعسفية اللي تقطم
الوسط

هي دي ببساطة

والله انا عايش بره مصر... ومن كتر اللي بشوفه وبسمعه وبقراه ..ماليش حتى نفس اني انزل البلد في اجازة ولو قصيرة


تحياتي العطرة

فى القلب said...

عارفه يا أوسه
أنتى حكيتى الحكايه بطريقه مصريه خولاصه

وهى حكى الوجع بطريقه النكته

عارفه يا أوسه دى أول زياره و مش الأخيره أنا هرابط هنا دماغك عجبتنى و حسيت بكونتاكت عجيب معاكى

صحيح أول زياره و و جعتينى صلحينى بقه
و قوليلى أزاى أعمل صفحه التعليقات عاديه عندى

فى القلب said...

سمعنا و أطعنا
ومنتحرمش منك يا قمر و ربنا يريح قلبك
جعلك الله زخراً لجميع الأوطان العربيه
و الأوربيه عشان محدش يزعل
خلاص صفحه الكومنت بقت حلااااااوه

حاول تفتكرنى said...

السيطرة

عشان يكون فيه سيطرة
لازم يكون فيه ظلم

لاننا متعودناش على العدل ، هيبقى العدل بعيد اوي

تحياتي

الأميره أوسه said...

راجى
أنا حاحذف تعليقك
وأكتفى بكده
روح يا راجى ربنا يهديك
أستخدام كلمة بنت دى رغم عدم معرفتك بيه بيخلينى أفضل عدم التحدث اليك

أحمد العربي said...

قطعا الامر لا يحتاج مني لتعليق
يكفيني كمية الغيظ والحنقة التي بداخلي
طاطي
طاطي
خير ما اخترتي عزيزتي
شوية امناء شرطة سقطوا في ثانوي لغاية مااتعموا وحولوا مسار صناعة ولا زراعة وسقطوا برضة
وكملوا بالعافية معهد امناء شرطة
بيعملوا كدة
منعول ابو الشرطة والداخلية اذا كانوا غيروا شعارهم من خدمة الشعب الا ضرب الشعب واهانتة و و و و
اعزريني يا عزيزتي لن استطيع ان اكمل ردي الان ما انا فية من حالة من الاستفزاز لا تسعفي لان ارد
ساعود مرة اخري باذن الله

الأميره أوسه said...

Barracuda
أذن التعذيب منهج بعكس تصريحاتهم الكاذبه أنها مجرد حوادث فرديه
الظاهر الرحيل عن مصر أفضل من البقاء
فيها وهى بالشكل السىء ده
تحياتى

الأميره أوسه said...

فى القلب
تشرفينى دايمآ
و مبروك على الصفحه بالشكل الجديد
أنا عديت و شفتها
أى خدمه يا فندم

الأميره أوسه said...

حاول تفتكرنى
لا وجود للعدل على الأرض
فقط الظلم
تحياتى

الأميره أوسه said...

أحمد العربي
أهلآ بيك
الناس الفاشله دى لما تتحكم ويكون معاها سلطه بتفترى على الخلق
لأنهم فى الأساس معاييرهم مش سليمه
و لا يملكوا الحد الأدنى من الأنسانيه
فى أنتظارك

Alexandrian far away said...

أولا: أزاي أنا أتعميت عن المدونه المميزه دي- رغم أنه الأصفر عمى عنيا-وثانيا أنا فعلا أتشديت وأنا باقرا البوست
أمناء الشرطة فعلا بلطجية لابسين بيجامات بيضا، لصوص وبلطجيه ونصابين ومرتشين، ومتروك لهم الشارع وأقسامه والأخوه بطابيط الداخليه الظبابيط بيربوا كروش
المصريين عانوا من قمع رهيب لقرون طويله
لكن بجد غضبتهم والقبر
وما حدش عارف يمكن تتكحل عيونا قريب بمنظر الأمناء مشنوقين بالأيشات الميري قدام الأقسام

تحياتي وبوست جميل

بنت القمر said...

هاي اوسه العزيزه
احساس ممزوج بين الحسره والضحك وانا بقرا الحسره علي الضحايا والاب والطفل اللي ممكن المشهد ينطبع في ذاكرته ضد الشرطه للابد ويبقي مشروع حعلوني مجرما صغير وتنتهكه كلاب السكك وهو وحيد في الشارع وبين الضحك علي طريقتك في الحكي اللي علي راي في القلب خولاصه مصريه خالصه
وبعدين انتى عمالا تفرسي فينا طب امال فين الشهامه ؟؟
مشركتيش ليه في الحدث ؟؟
كنتى اديتيله مقص
ولا حركه اتنين اربعه اتنين عشان يعرف ان الله حق ولا فقعتي سوطين حياتى
الحقوني يا ناس
اتحرشوا بيا
سرقوني
وعملتي ننظام تمويه لحد ما الراجل يفك تحياتي
يا اميرتي

جوستيـن said...
This comment has been removed by the author.
جوستيـن said...

الاغنيه اللي ع البلوج

إختيارها حلو اوي ولايق ع البلوج

وصوت احمد منيب ماشي اوي

الأميره أوسه said...

شرفت يا باشا البلوج المتواضع
أنا زيك متغاظه منهم
وكل أملى أنهم يتقوا الله فينا
صدقنى لو أتشنقوا ادام الأقسام
أو أتعذبوا أنت أول واحد هاتحزن
عليهم لأننا قلوبنا مفطوره على الرحمه وألأنسانيه
محتاجين خطاب موجه لهم ليعودوا الى رشدهم
أحتمال ربنا يغفر ليهم

الأميره أوسه said...

بنت القمر
أزيك يا جميله
أخبار النونات أيه
صدقينى صوت الضرب رغم أنى كنت على الأتجاه التانى كان واصل
وبعدين هم معندهمش مشكله أنهم يضربونى أنا كمان أنا شفت أمناء شرطة
فى مترو الجيزه بيضربوا واحده ست
أمام مئات الركاب بوحشيه
لمجرد أنها حاولت تدافع عن جوزها أو أخوها مش عارفه
أخدوه تحرى فحبت تستفسر فداسوها بجزمهم
وشدوا الحجاب و شعرها بقا و اقف زى المكرونه الأسبكتى
والرجاله بصراحه مسكتوش بالعكس
فضلوا يكرروا
لا حول ولاقوة الا بالله
عشرين مره
بعد كده عمو الأمين شخط فيهم فتفرقوا
لا يا حبيبتشى أحنا عندنا الرجاله
وحوش كاسره طيور جارحه بس فى البيت بس

الأميره أوسه said...

جوستيـن
ميرسى
أتفضل الأغنيه

Esmat said...

السلام عليكم يا عزيزتى
الدنيا فى مصر ماشية بالمقلوب
الشرطة مجموعة ناس بلطجية- فاكرة الحرافيش لنجيب محفوظ و البلطجية المجرمين الظلمة اللى كانوا بيمسكوا الحوارى ويفرضوا سيطرتهم عليها
لغاية مايجى واحد طيب عفى وقوى بيخاف من ربنا ويقف لهم ويبقى هوه مسؤل الامن البلطجى الطيب اللى يأخد حق المظلوم ويوقف الظالم عند حده
ويبقى بلطجى بس على الظالمين
نفسنا فى واحد كده
وأعتقد إن المصريين خلقهم ضاق خلاص
وإن قريب قوى المظاليم كلهم حيهيجوا على اللى بيحصل
لان خلاص حنخسر ايه اكتر من اللى كل يوم بنخسره
الموت افضل من هدر الكرامة

The Eagles said...

احيكى على الموضوع الجمييييييييييل دة
والوصف الرائع دة


والسلام..........

مدحت محمد said...

والله الموضوع جميل وكمان انا عايز اقلك يااوسا احنا الللى عملنا فى نفسنا كدة
احنا اللى قبلنا نطاطى
وقبلنا يكون حسنا واطى

الأميره أوسه said...

Esmat
أزيك عصمت
كل سنه وأنت طيبه
طبعآ قرأت الحرافيش
و عائلة الناجى
بس فى الحقيقه مفيش غير بلطجيه
و أحنا الحرافيش
أحنا عايشين أذهى عصور البلطجه
بلطجة الشرطه وبلطجة رجال الأعمال
حتى الأطباء أصبح عدد كبير منهم
بيمارسوا البلطجه بطريقتهم
لو الشعب قرر أنه يرفض الظلم
حاجات كتير ممكن تتغير
بس أى شعب وأمتى
شرفتى عصمت

الأميره أوسه said...

The Eagles
شكرآ ليك ولمرورك
أسعدتنى حقآ

الأميره أوسه said...

MOSLIM
عندك حق
السكوت علامة الرضا
بس حتى لما بنتكلم بيحصل أيه
أحنا مساكين
واااااااااء

^ H@fSS@^ said...

والله قطعت قلبي يا اوستي و نكدتيني و انا مش ناقصة منين ما ادير وشي الاقي اخبار تغم على جميع المستويات و بالجملة عارفة
انا فضلت اتخيل لو الولد ابوه اتاخد فعلا القسم و البوليس الجزمة سابوه لوحده مخضوض و مسروع على ابوه و خايف انه لوحده و مش عارف يروح و لا عارف يقول عنوانه حتى ايه للناس
عيطت و اتعكننت اوي
اصل كله الا الاطفال دي عيشة تقصف العمر
منهم لله
الهي و انت جاهي ربنا يرزقهم باللي يخضهم و يسرعهم و يعكنن عليهم عيشتهم قادر يا كريم
حسبي الله و نعم الوكيل
حسبي الله و نعم الوكيل

Unknown said...

مهي طاااطي دي اللي موديانا في داهية
انا منكرش اني بطاطي برضه بس لما اكون على حق شبة بكون عادي و ياما رخمت مع امناء شرطة لأني مدام على حق صعب حد يكلمك الا لو عاوز يلبسك تهمه
بس الزمن ده اكيد هيولى و مش هيتمر الاهانة دي كتير

Mustafa Şenalp said...

very nice a blog.:)

الأميره أوسه said...

HafSSa
حبيبتى الغاليه
سلامتك من العياط
بس فعلآ أن كمان فكرت وقتها الطفل ده
ممكن يعمل أيه
بس منظر أبوه هو اللى زعلنى أكتر
كان هايتجنن على ضناه
يارب دعوتك دى تكون مستجابه
و الظالمين يتهدوا شويه
أتخنقنااااااااااا

الأميره أوسه said...

Mohamed_sobhy84

ممكن تكون تعرف فلان باشا أو علان بيه
لكن عامة الشعب يعمل أيه
وأنت نفسك لو وقعت مع ناس مبترحمش
هاتتصرف أزاى
هتتحول الى سوبرمان
أحنا محتاجين نشعر بالعدل والأحترام
مش هى دى المواطنه اللى بيقولوا عليها

الأميره أوسه said...

Mustafa Şenalp
fine nice thank you
prep school

He and She said...

wallahi khalletini a33ayat ya sheka. 7aram 3aliki

القلم السكندري said...

والله انتي جيبتي من الاخر

جين الجبن المتوارث

زي الارض البور بالضبط متنبتش بذرة ولو كانت البذرة من النوع الممتاز

مشهد للاسف بيتكرر كتيير

وبنشوفه اكتر

يمكن من ايام كان مشهد قريب من ده

بس المرة دي الضابط كان بيضرب واحدة ست بعد ما زنق عليها بالعربية وشتمها لما معجبهاش انه يزنق عليها بعربية شرطة

جمهور المشاهدين من ابناء المحروسة بيتفرجو علي واحدة ممكن تكون امهم اتزقت ووقعت علي الارض وانضربت




كل سنة وانتي طيبة

إسلام الحساني said...

السسسلام عليكم
انا عن نفسى عندى زهول مش عارف ليه يمكن لانى صعيدى وعمرى ما شفت كده ولا سمعت الامثال الى بتقوليها بس صدقينى دى مش غلطة الشعب دى غلطة العيله الكبيره الى اسمها عيلت النسر والنجمه ( الهلال والنجمه)انا بقولها انا عن نفسى معاكى وبنتقد الموقف بس انا بشوف رتبه كبيره بتكون محترمه بس الامناء تصدقى مع انو مش رتبه اساسا بيفتكر نفسو مثلا مدير امن وكل الى تحتو اى كلام نقول العيب ممكن تقولى نقص كبت الموضوع عاوز تحليل نفسى للساده الامناء انهم يعرفو حدهم فين وفين يقفو وامتى يتصرفو غير كده يبقا عقاب وصارم
الظاهر تن بلدنا بقت تتبع سياسيه حلوه قوى
هيه
( جوع الشعب ميفكرش فى السلطه هيفكر فى بطنو) ويلا تعال ياعرب اتفرجو المصريين ظباطهم بيعملو فيهم ايه
يلا استغفر الله العظيم من كل ذنب عظيم
رجاله اخر زمن وربنا
عليه النعمهلو الموقف حصل قدامى ليكون اخر يوم فى عمر امين الشرطه
رجاله اخر زمن

shady said...

http://www.who-is-wael-abbas.blogspot.com/
اعرف حقيقة وائل عباس ده لو كنت بتفكر
وتعال وشارك معانا وقوا رايك في وائل عباس

shady said...

http://www.who-is-wael-abbas.blogspot.com/
اعرف حقيقة وائل عباس ده لو كنت بتفكر
وتعال وشارك معانا وقوا رايك في وائل عباس

Unknown said...

حرام عليكى يا اوسه
انا حسيت ان القفا نزل عليا انا
حسبى الله ونعم الوكيل
فكرتينى بموقف قريب منه حصلى بس مضربتش الحمد لله
حسيت ساعتها ان الناس دى ملهاش كبير وان فعلا اللى ملوش ظهر يضرب على بطنه
هنقول حسبى الله ونعم الوكيل لحد ما ربنا يقدرنا

الأميره أوسه said...

He & She
سلامتك من البكاء
ده عشان احساسك عالى وراقى
شرفتى

الأميره أوسه said...

القلم السكندري
مرحب بأسكندريه
وشباب الأنفوشى
أحنا أحسن ناس تتفرج
حاجه تحزن

الأميره أوسه said...

إسلام الحساني

واضح أن عقد النقص زى ماقولت
عند الأمناء وصغار الضباط
بدليل أنك ممكن تتعامل مع لواء شرطه
وتتكلم معاه ولا تستطيع الأقتراب من ملازم أو حتى صف ضابط
بس الصغيرين هؤلاء هم المتعاملين بشكل مباشر مع الشعب
أعتقد أنهم محتاجين يتعلموا من جديد
شرفت يا أبن الجنوب

الأميره أوسه said...

لماضة
مين ده اللى زعلك
وأنا أهبده دعوه أجيب أجله
هههههههههه

yousef said...

اذا رأيتم شرطيا نائما عن الصلاة فلا توقظوه لها ؛ فانه يقوم يؤذي الناس

أجزاخانجيه said...

miss 2ossa el eslobha kol mada by3gbni aktar
danty tel3ty sakny ganby ya bnt el eh
msh 3and masgd el saba7
bas ana masm3tsh be mawdo3 el 5ena2a de akeed kont nayma sa3etha
wala ana el mab2tsh a7b asma3 wala a2ra wala ashof
saddo nfsna 3an kol 7aga fel balad de
ba2en 3awgeez we7na lesa atfal
a2ool 7aga bel-nsba le sawa2een el microbus
besara7a
99% mayt3mlsh ma3ahom gher keda
50% mn el masrieen ll2asaf mabymshosh gher bel korbag
mahoma el 7afro el kanal wala nseety
hanfokna mn el sha3b el mastool el ghalban
we n5len fel sawaen
wala bera3o kber wala soghyr wala 3arbiat mashia fel shar3 wala 7orma
we mo3zmhom 7ashashen
we ma3ndhomsh a5la2 wala deen wala tarbia
nas akal ma yokal 3anohom enohom watyeen
2ama be monasbt el zobat fa de 7aga tankasm le etnen -ana hna ma ba3mmsh 3ala fekra fe zobat kema fel a5la2 wel e7teram we feh sawa2een keda bardo bas 3ala ra2y el masl el say2a be ta3om >
e7na motafeken abl keda 3ala en e7na sha3b ga3an sha3b makhor
wa7ed kan byderb 3ala 2afah mn abooh we mn so7abo we mn el modarsen wa7ed tal3 mo3akad we ma7rom
edelo solta fe 2edo
shofeeh hay3ml eh
hayntashy be badlt el zabat we ybhdel el nas
bas fe 7aga tania ba2a may3rfhash gher el zobat nafshom
homa bytl3ohom keda
homa byd5lo el kolia 3alashan ytl3o keda
momkn el ensan el byd5ol koliet el shorta ykon mo7tarm da she2 momkn bas el akeed eno bytla3 mnha 3arbgi
de siasa ya ged3an we7na mabntklmsh fel siasa e7na 3awzen nakol cinnabon we neshrab pepsi diet 5alena ganb el 7eet a7san
and btw ya 2ossa ha2ool 7aga ana awl mara ha7keha fe 7ayati le7ad el nahrda be monsabt el mawdo3 da
wana soghyra shoft 5 zobat metlameen 3ala wa7ed we bydrabooh
le7ad delwa2ty el mashad da matbo3 fe mo5y bel kalam be soot el ragl we howa by3yt be shakl seneto we hia beter mn bo2o we maliana dam
we manzr 2ameso el et2ata3 mn kotr el darb be shaklohom we homa 7ateno ta7t reglehom we bydraboh bel gezam
ana fedlt 3 ayam ba3d ma shoft el manzr da msh mgm3a 2a3at fatra tawela gedan a7lam beeh 3alatol
we fatra tawela mabkolsh we mabnmsh
hia de massr fa2er hata5od 3ala afak mn ay 7ad we msh hat2dar tefta7 bo2ak we te2ool bem
bas 3ala el baghy tador el dawa2r
rabna by5als mnhom donia we a5ra
lama el zobat dol yom el 2eyama keda teshof manzrhom we homa byt3azbo fe gohanm
we y2olo llmalika ed3o rabna y5ff 3ann yom wa7ed mn el 3azab
3awzen rest mn el 3azab
er7amona
hay2olohom howa enta konto betr7amo el nas
da el 7abst 2otta le7ad ma matet we hia kant kewisa da5lt el nar
shofo e7na bn3ml eh
day3eeen
walahy day3een
we msh 7aseen
we msh sam3en wala shayfen

أجزاخانجيه said...

lol 5alst we doset publish mn gher ma a3la2 3ala manzr el aganb
besara7 keda
mabyf23nesh 7aga fel donia
aktar mn el e7na bn3mlo da
we no3od nmsl
we ygebolak e3lan wa7ed byndaf el taxi beta3o 3alashan yban 7elw we abiadany we senano ndeefa 2odam el aganb el by2kelona lo2met el 3esh el by2akelona el mum
ba2a norfos el ne3ma
da el sia7a 5er lena we ll arials mn ba3dna weladna
da7na nb2a we7shen we mama we baba suzan we mubarak we oncle 3ala2 wel 5awaga yz3alo ke5 keda
5ayfeen 3ala manzrna odam shewit kafra byrtakebo kol mahowa monkar odamana we7na erials we msh 5ayfeen 3ala manzrna odam rabna
fakro keda 7aba we shaghlo el mo5 el sadda we 3ashesh feeh 3anakeb we watawet
manzarak eh odam el 5ala2ak
ya gama3a da7na mabntksfsh mn rabna estghfor Allah
we bntksf mn el nas
tela2y el wa7da fel beet betsaly be esdal ma2to3 wala ay 7aga 7ataha 3aliha 7etet 2omasha msh 3awzaha we te2abl rabna beha
we to5rog fel shar3 3ala senget 10
msh maksofa teb2a been eden rabna be 7aga ttksf tnzl beha odam el nas
welcome en egypt ah bas be mazagna e7na
welcome in egypt ah mn gher 5amra we 2elt adab we safala
welcome in egypt be 7aytna we takaledna
msh be takaledhom homa
msh handaf nafsena mn barra we7na wakelna el sos mn gowa 3alashan shewit nas wala by7termok wala be2adarok dol bygo hna bas 3alashan ytfrgo 3ala 2asarko
ytfrgo 3ala el fara3na el ento fa5oreen we bettfash5ro awy en ento fara3ana
we estghfor Allah dol mal3onen fel kor2an
ana ba2oloko aho
mn haza el comment
Amnt be Allah raban
we bel eslam denan
we be nabena MOHAMMED as3ad 5alk Allah nabian wa rasolan < 3alih el salah wal salam>
Allahom ma e7shrna ma3oh
Allahom ma awredna 7awdah
we eskena mn yadeh el 7abebah sharba hane2a la nazma2 ba3dha abdan
ameen ya rab

abdullah-blogs said...

This is such a nice addition thanks!!!
عرب كول
شات صوتيشات
شات مغربي
دردشه صوتيه
إنحراف كام
شات عرب كول
صوتيشات كول
دردشه صوتيه
سعودي كول

أفضل  ألف  مدونة