من صدام الى العرب هى دى المرجله

لم يبكى ولم يزحف ولم يطلب الرحمة

هكذا يموت الرجال

مثير للجدل فى حياته ومماته

أصرت أمريكا على أن تشنق صدام فجر العيد وأن ترسل ببرقية معايده الى المسلمين فى أول أيام العيد أمعانآ منها فى التنكيل بالمسلمين و قامت بدفنه فجرآ فى مكان بعينه دون أرادة عائلته فكانت رسالتهم واضحه لكل العرب فى عيدهم الأضحى وسط صمت عربى لم يسبق له مثيل لكن صدام لم يبكى حاله ولم يستعطف أعداءه ولم يتوسل بل طرح سؤال على الحضور أعتقد أنه سؤال وجهه لكل الحكام العرب هى دى المرجله ثم شنقوه وهو يردد الشهادتين لم ينتظروا منه أن يكمل النطق بهما فقد كانوا على عجله من امرهم فلابد من أن ينتهوا من فعلتهم ليبثوا مقطع الفيديو والخبر مع صباح العيد ليضيعوا على المسلمين فرحتهم لكنهم وبغبائهم المعهود جعلوا موته مثيرآ للجدل كحياته وربما تحول من دكتاتور الى فقيد العيد أو شهيد العيد من وجهة نظر البعض

شنقوه فمات كما يموت الرجال فى أنتصاب وشموخ ولم يظهر عليه أى خوف مات كما يموت الأبطال فى الأفلام الأمريكيه رغمآ عن أمريكا وكل العملاء فهل تحول العرب الى حملان أم هم مجرد عرائس خشبيه فى نظام عالمى تديره أمريكا بأستخدام الخيوط

للفقيد الرحمه و العزاء فى الجامعه العربيه يرجا من المعزيين رجال ونساء أرتداء الجونلات والجيبات ام كرانيش والأتشاح بالأعلام الأمريكيه الملونه مع ضرورة لبس الطارطور

مشمش والمهمه المستحيله

عيون الأمن سهرانه مبتنمشى

مع الأعتذار لكوكب الشرق الست أم فاروق

مشمـــش والمهــمه المستحيله

قصه بوليسيه للأطفال

مــــشمــــش

سفـــاح القرن

حبايبى الحلوين دى حكاية قبل النوم اللى متعوده أحكيها للأطفال الحلوين حكايتنا النهارده عن الواد القشاش اللى كان و هو صغير مدوخ مامته وباباه وكان مش بيشرب اللبن عارفين ليه يا أطفال عشان كان بيشرب سجاير وبيشم كوله وده مشروب وحش بتاع الأولاد الوحشيين الواد قشاش كبر وهو مختلف عن باقى الأطفال شقى ومش بيسمع الكلام خالص واحتمال مكنش بيفهمه
مامته زعلت يا حرام خدته وراحت أشتكت للدكتور وقالتله انه كمان بيعمل بيــبى على نفسه ودايمآ دايمآ بيــريل على نفسه الدكتور كشف عليه و قال لمامته ده مسكين عنده تــخلف عقلى عبيط يعنى
بعد كده الواد الشقى هرب من البيت ونام فى الشارع مسكوه وأخدوه على بيت كبير كله زرع ونباتات حلوه (خشخاش) ومشرفات ومشرفين طيبين والأكل كتير وأبله أنشراح هناك هى وأونكل قلفط بيعاملوا الأطفال بحنيه ( بالكرباج)المكان أسمه الأصلاحيه وعاملوه كأنه أبنهم والعيال كانت بتضربه ويقلوله يا عبيط يا عبيط و هناك أتعرف على أصدقاء وحشه قالوا نهرب فهربوا وبره أتعرف على ولاد تانيه زى الواد بزازه والواد حمكوشه وطبعآ بيشموا كوله وبنزين وبيشربوا دوا كحه ومفيش بابا ولا ماما عشان يقولوا كخه .... بالصدفه وهم ماشيين فى الليل قابلوا الساحر العجوز صعبوا عليه فخدهم فى حضنه وأكلهم وشربهم لبن بخيره (كامل الدسم) أيه رأيكم يا حلوين فى جدو الساحر بعد كده أغتصبهم واحد واحد وبعدين سألهم نفسكم فى أيه قال الوادالقشاش نفسى أبقا شجيع ومحدش يضربنى ويقول يا عبيط وأبطل أعمل بيبى على نفسى عشان يوم مارجع لمامتى تفرح بيه قاله خلاص أنت هتكون أقوى واحد فى الدنيا وقام تافف عليه تفه كبيره زى دى أتفففففففف

وقاله روح يا جاتل يا أبن الجاتل و من ساعتها و القشاش العجيب كل يوم يضرب ويموت تلاته أربعه لحد موصل العدد أربعين وأحتمال مع أخرالسنه يوصل ألفين راح العسكرى اللى أسمه مشمش لبس النضاره الشمس بتاعته وتنكر و قرر أنه يقبض عليه متلبس وكان معاه كلب بوليسى من نوع الكنيش أسمه توتو هم الأتنين عملوا تحريات كتير وفى الأخر تعبوا أم أيه مشمش جاتله فكره أنه يستخدم فانوس علاء الدين السحرى راح داعك الفانوس طلعله منه مارد طوووويل أسمه حنفى قاله شمبيك لمبيك حنفنف بين أيديك عاوز أيه يا مشمش ..مشمش وهو مخضوض قاله عاوز أمسك السفاح ...المارد حنفى قاله السفاح هتلاقيه جوه عربية قطر بضاعه مرتاح و كلمة السر مفتاح مشمش جرى وراح عند القطر وشاف السفاح وفــ ايده مفتاح مشمش أمر الكلب توتو أنه يهجم عليه ويكتف القشاش من أيديه أم أيه مشمش قبض عليه مسكه وبعد كده كشفوا عليه و أتضح أن معدل ذكائه بعد التفه الأولى وصل تمانين فى الميه دلوقت يا كتاكيت مين يجاوب السؤال الصعب ده وياخد سيجارة بانجو

هل التوربينى ضحيه أم قاتل

وأذا كان ضحيه فمين السبب

هل هى الأسره

أم تخلفه العقلى

أم الساحر العجوز

أم المجتمع

أم رفقاء السوء

أم اللبن كامل الدسم

اللى يعرف الأجابه يا شعب يوفرها لنفسه عشان البوست ده خنيق أساسآ وكتباه عشان أتخنقت ونفسى أخنقكم معايه وده من تخاريف نهاية العام نتيجة لظروف المراره والبنكرياس ودواعى الهرتله وأحتمال الموضوع ده يبقا مقرر على تانيه أول وأولى خامس

أى حد هيسيب تعليق هبلغ عنه فورآ وكل عام وأنتم شعب طيب

وبتحبوا قصص قبل النوم... المره الجيه نحكى حكاية مين يا ولاد

حكاية الشاطر أبن بنى مذار ويا بخت من خفف بعد ما زار

أوسه أجاثا كيرستى

مؤلفة رويات بوليسيه

مؤخرتك يا وطن

لا للعبث بمقدرات المصريين أو مؤخراتهم

نظرآ للأحداث الأخيره وهى تفاقم العنف ضد مؤخرات الشعب و ذلك بأستخدام الخوابير و العصيان و أشياء أخرى ضد مؤخرة الشعب تحت مزاعم أمنيه وهى مساعدة الشعب فى علاج البواسير أو تدليك البروستاته كعلاج بديل لأقراص الفياجرا الغالية الثمن فقد تشكلت جبهه للدفاع عن حقوق المؤخرات وحقها فى العيش فى سلام

هذا وقد تبنت عدة مواقع القضيه و دعت للكف عن ملاحقة والعبث بالمؤخرات ومنها السيد وائل عباس فى موقعه الشهير الوعى المصرى وقد بدأ الحمله المدون المعروف دماغ ماك وقد كان سباقآ فى نشر أنتهاكات تمارس ضدالمواطن عماد وأن لم يكن الضحيه الأولى لمثل هذا النوع من التحرشات الأمنيه

كما قام السيد جرجس بالأشاده بجريدة الفجر لنشرها هذه القضيه ودعى لكشف الحالات المماثله من أنتهاكات

وقد أفادنا مراسلنا فى أوربا السيد باتوكس كاكا عن تظاهر الآف المؤخرات منددين بالأفعال المشينه الذى يرتكبها الأمن المصرى فى حق عضو مهم وهو المؤخره ونتيجه للأحداث المؤسفه وحالة الهلع والخوف التى أصابت المؤخرات مما أدى تباعآ لأصابتها بالأسهال الحاد للدفاع عن نفسها بشكل تلقائى فقد قام السيد وزير المحاليل بتوزيع أقراص الفلاجيل على المواطنين و نظرآ لتفاقم الأوضاع فقد أعلنت منظمة حقوق المؤخرات مصر كمؤخره منكوبه وقام بعض المواطنين بضرب سياج حول مؤخراتهم و زرع الألغام وأستخدام الأسلاك الشائكه لحمايتها بينما فضل البعض الأتجاه لشراء اللباس الواقى من التحرش والذى أخترعته ألزميله كلبوزه لكن سبماتيك لحماية منطقة الفخدين من أى أعتداء

من أى نوع وقد أعلنت عن توافر اللباس بألوان ومقاسات مختلفه

و نظرآ لحالة الهياج الأمنى على مؤخرات الشعب فنحن نناشد المواطنين عدم كشف المؤخرات أو عرضها فى الهواء و ضرورة أرتداء القناع الواقى بس من تحت عشان الحسد وقد أثبتت الأحداث الأخيره ضعف مزاعم أن مصر عاليه وقد تحدث الجغرافى الكبير عبده أطلس أن هناك مخاوف من تغير تضاريس الشعب المصرى بسبب العبث بــ ط ... مؤخرته كما قرر الفنان محمود عبد العزيز بعد أن تغنى بالقفا أن يتغنى بالمؤخره وذلك بالتعاون مع كل من المطرب الهارب من التجنيد و مطرب الفواكه

هذا وقد وافنا مراسلنا السيد بيبــي عن حدوث مواجهات والتهابات بين قوات الأمن وجموع المواطنين الذين قاموا بأطلاق الهتافات المعاديه للخابور مثل أدينى يا باشا على قفايا وبلاش المقطوره اللى ورايا وحملوا لافته على مؤخراتهم بتقول متبصش بعين قويه بص للخابور اللى فيا كما أطلقوا غازات الأنتفاخ ضد الأمن الذى رد عليهم بحبوب الفحم وشراب النعناع المحرم دوليآ وقد ناشد السيد وزير الخوابير الطرفين بضبط النفس و نفى قيام وزارته بأستيراد الخوابير من الصين وأكتفائه بألأنتاج المحلى لتشجيع المشروعات الصغيره وألمؤخرات الكبيره

و أنه سيتم محاسبة أى معتدى مهما بلغ حجم مؤخرته وكل من تسول له نفسه بالعبث بفلنشة مواطن التى هى شرف الوطن هذا وقد قام بعض الناشطين والناشطات بتنظيم وقفه أحتجاجيه أمام نقابة التواليتات وقد أتشحت مؤخراتهم باللون الأسود وقد صرح النائب حنفى بيه النايم بأستيائه مماحدث لبعض المواطنين وضرورة العودة لأستخدام قانون الجزم الذى ثبتت فاعليته بدلآ من قانون الخوابير الذى أضر بمصلحة الوطن العليا وأساء لسمعة مصر فى الخارج حيث أعلنت منظمة آآآآس رايتس أن مصر على رأس قائمة الدول التى تنتهك فيها المؤخرات بشكل علنى ومقنن ومن منبرى هذا أدعوا جميع المدونين الشرفاء الى الوقوف بجانب ضحايا الأنتهاكات ونشرها وفضح المتحرشين لأن مؤخرتك يا صديقى لم تعد بأمان وأن لم تواجه الخابور فسيطولك ويطول الجميع وأعلموا ان وطن بدون مؤخره كجندى بغير سلاح

لقد أنتشر فيديو التعذيب فى كل انحاء العالم وأصبحت مؤخرة الوطن مكشوفه عاريه وأصبحنا مستباحين فمن يستر عورة الوطن

أعتـــــراف

أعــتـراف

أعترف أني فــشلت

عندما نجـــحــت

أعترف اني أخطأت

عندما حاولت

أعترف اني تــهــت

بين فواصل الكلمات

فأهتز القلم

فأثرت الصمت

وعجزت عن كلِ شيء

حتى الغناء

فصوتى صدى

أعترف أنى لا أملك جملأ أو كلمات

ومللت بحور الشعر

و هجرت الأوزان

أعترف أن أبجديتى حماقه

وفكرى جنون

و خطواتى فوق ظلك

هـــــروب

وأن محاولة الكلام أنتحار
أعترف هنا

فى أرض بلا سماء

فى بيتى المجنون

أفتراضية أنا كمدونتى

الضاحكة الباكيه

أننى فى واقعى شريده

وخاضعه

وأننا فى زمن العهر

لسنا سوى جوارى

وأنتم يامن

تخربشون ردائى

لستم سوى غلمان

أعترف أننا لسنا سوى عبيد

فى مملكة اليأس

أعترف بأنى دمية

وبأن الناس كل الناس

عرائس

والمسرح خشبى بارد

و خيوطناوهم وحبائل قش
وأعترف أني .........وأني ..........لست

سوى ظلال وأنكسار

أعترف

وأعرف أنى أخطأت عندما أعترفت

وأعترف أنى أحترفت البكاء

مع الأطفال فى ليالى العيد

أعترف بخــداعى

و كـــذبى

و ذبــولى

كأوراق الشـــجر

فخريفك مــمتد بنا يا وطن

وأعترف يا وطنى بغربتى

و خوفـــى

أعـــترف

ولا يعــــترف سوى الصادقين

أنى قد ضلـــيت و ضللــت

وضل معى أخرين وأخريات

لكنهم يا وطنى الجريح

مكمـــمين

يخشــــون الأعتراف

منهـــم من صمت

ومنهــــم من صرخ

بغــــير صوت

لكننا فى النهايه

سنعـــترف بأحتراف لعــبةالصمت

تصفيق حاد

وبكاء حار

التوقيع الصامتون

البيه شكوكو

أضغط على الصوره

كركركركر هم يبكى وهم يكسف ظريف يا شكوكو

شوفتوا الفراغ بيعمل أيه فى الناس فى ناس بتقضى وقت فراغها تقرا كتاب أو تتفرج على التلفزيون أو ممكن تخصص جزء من وقت فراغها لمساعدة الغير أو محاربة الفساد ولو حتى بالدعا والصويت لكن لما ناس تقضى وقت فراغها فى السخريه من أنسان بسيط .....الخوف شل تفكيره أثناء التصوير لأنه تصور منظره لما يطلع فى التفزيـــــــــــون وبهانا بنت عم صميده الدخاحنى تشوفه.... يبقا أكيد الناس دى بتسخر مننا كلنا لأن بكل بساطه ده تم فى أوقات العمل المدفوعة الأجر من دمنا ...ده غير أن البلد فيها جرايم محتاجه ناس تفكر بنص تفكير عشان تقبض على المتهمين على سبيل المثال أنا ساكنه فى مكان تعددت فيه بلاغات السرقه وأبسط حقوقك أنك تعمل محضر وحد يجى يعاين ويشوف الحرامى ده أسلوبه أيه.... فتح الباب بأى طريقه نزل على المواسير ولا مشى على الحيطه بطريقة الرجل العنكبوت ..... وأستخدام طريقة أجاثا كرستى فى حل الغز أو حتى طريقة على للوز المشهوره وهى القبض على مختل عقليآ أو مجنون وبالمره ياخده مامته (والدته) يعنى وممكن أخواته والجيران ماهو فرح بقااااااااا لا بالعكس والله محدش هايعبرك ولا حد هايعملك محضر ده غير طريقة التعامل كأنك مذنب أو جى تضيع وقتهم الثمين وطبعآ نفس السؤال... أنت مركب باب حديد وشبابيك حديد ... طيب دى غلطتك أحنا هانحرس بيوتكم ..طبعآ مفيش مفر مــن واسطه عشان الباشا الصول يحترمك ويعملك المحضر وتاخد رقمه وتعمله حجاب ده اللى بيحصل فى المدن الجديده ده غير البلطجه والفساد ودى محتاجه كتاب والسؤال اللى بيسألوه للجندى المسكين اللى مش عارف يبلع ريقه من الخوف حرب تلاته وسبعين بين مصر وأسرائيل كانت بين مين ومين وياترى يا هلترى مين كسب تقولوش متش كوره فى دورى أبطال العزب طيب ده ممكن نقول عليه حظه زفت ومدخلش المدرسه لكن أنتوا نقول عليكوا أيه بعد الفشل الزريع و الغير مقصود فى القبض على المجرمــين أل غير مقصود أل ولا وظيفتهم هى ضرب الطلبه والمتظاهرين والناس اللى متعوده تصلى فى بعض المساجد وحضور ندوات دينيه ولا تعذيب أنسان شريف بيقول رأيه

متهيألى يضيعوا وقت الشغل فى حاجه مفيده يمسكوا كتاب لميكى العظيم أو يقروا رويات عبير أى عمل أكيد أفضل من السخريه على خلق الله وبلاش حركات شكوكو دى يا عم الظريف أتخنقنا

حبة رجوله لكل مواطن

ياسيدى المخترع العظيم

يا من أبتكرت حبة تحفز فينا الذكوره

فيـــــــــــــــــاجرا

وتعيد شد أوتارنا وأعصابنا المقهوره

يا باعث النصر والفرحه

فى الأجساد و القلوب

تيــــــــــــــــاجرا

و فى ألمخادع المهجوره

يا مرسل اللذه والدفء والرعشه

فى الضلوع والأبدان المنخوره

يا سيد المخترعين

كمـــــــــــــــــــــاجرا

وملهم المبدعين

يا من صنعت دواء فجعلته بلسمآ

يشفى من الصدأ والكهوله

و يعيد للشيوخ الفحوله

أما صنعت لنا بلسمآ

يزرع فى أمتنا الرجوله

تبآ لك ولأمه

ضاعت من ملامحها الرجوله

عن ثقافة التحرش وأنتهاك الأعراض نتحدث

غرفة الفئران

يعتقد البعض أن التحرش ظاهره حديثه على مجتمعنا بل وصل الأمر لألصاقها بالفقر و أن التحرش نتيجه منطقيه لما تبثه علينا وسائل الأعلام والفضائيات من عرى وأغراء وأيضآ أدعوا أن الفتيات هن سبب المشكله بملابسهن المثيره وأن التحجب والعوده الى زمن المشربيه هو الحل بل ربما طالب الأخرين بؤد البنات فهن عورة للرجال ورجث ودنس لا يطهر حتى بمية النار

رغم أن التحرش موجود من زمن والمتحرش موجود فى كل مكان وزمان
على سبيل المثال و ليس الحصر أذكر هنا بعض أمثلة المتحرشين ليعلم الجميع وخصوصآ البنات عن خطورة المتحرش وخطورة السكوت عليه بأسم الحياء و عدم القدره على أبلاغ الأهل لخوفهم من العقاب

1

غرفة الفئران

فى المرحله الأبتدائيه صادفنا مدرس العلوم وأسمه جمال وكان شديد القسوه فى التعامل مع التلاميذ خاصة الأولاد والبنات ألصغيرات الحجم اللاتى لم ترسم الأنوثه ملامحها عليهن فكان يعامل الفتيات الأكثر جمالآ و يمتلكن مايمكن تسميته مجازآ ثدي بشىء من اللين والرقه ومع الوقت يتطور الأمر لتقبيلهن على وجناتهن وأحتضانهن أمام التلاميذ داخل الفصول بدون أستحياءو كثير ما كان ينادى على فتاه أثناء الفسحه فتختفى ثم تعود مع نهاية الفسحه وهى باكيه وعينيها تدمعان

أو تعود واجمه لم نكن نتخيل مايحدث معهن ولم تجرأ أحداهن على التحدث فقط شعرنا كأطفال أن الموضوع يتعلق بقانون العيب الذى تحدثنا عنه امهاتنا على أستحيأ وانتهت المرحله الأبتدائيه ونسينا الموضوع لكن تذكرناه ونحن فى المرحله الثانويه عندما علمناأن الأستاذ جمال قام بالتحرش بفتاه داخل مخزن بالمدرسه وقام بتعريتها من جميع ملابسها وملامستها بشكل موجع مما أضطرها للبكاء بصوت عال ثم الصراخ حتى سمعها بعض التلاميذ فأبلوغوا أحدى المدرسات التى أقتحمت المكان ومعها لفيف من التلاميذ لمعرفة ماذا يحدث فى غرفة الفئران كما كانوا يطلقون عليهاوفؤجأ الجميع بالفتاه عاريه والمدرس يكشف عن ذكره فكانت فضيحه وتم عمل تحقيق وبدأت الفتيات فى التحدث حيث أتضح أن الأستاذ جمال أستحل ما يشتهى من الفتيات ولم يردعه صغر أعمارهن وقامت بعض زميلاتى بكشف المستور بألاعتراف لى بتعرضهن للتحرش فى غرفة الفئران قامت الأداره التعليميه بفصل الأستاذ جمال ورغم ذلك ماذلت أذكر هذه الواقعه التى راح ضحيتها فتيات صغيرات على مدار سنين طويله وأتذكر جملة أحدى زميلاتى عندما قالت لى أنه برغم مرور سنوات ألا أنهاماذالت تشعربالأستاذ جمال يتحرش بها فى غرفة نومها وهى نائمه فمن يعيد لهؤلاء الفتيات طفولتهن المغتصبه هذه أحدى االوقائع التى حدثت ربما حدثتكم عن مستر على و زملائه الذين تلاعبوا بفتيات أحدى مدارس التعليم المتوسط والتى ضمت بعض زميلاتى وأقرانى فقط أذا وجدت الكلمات المناسبه وهذه محاوله لتحطيم جدار الصمت الذى تقبع خلفه الكثيرات من الفتيات والنساء

البالونه يا ريس

كل عام و هــم بــخير وانتوا منفوخيــــين

وأنت طيب يا أسطى

كرباج ورا يا حنفى

نظرآ لحلول العيد فقد قررت حكومتنا الذكيه اللى أسمها وطنيه وأساسآ كانت بنت بهيه أهداء كل مواطن بلونه وليس العكس بأعتبار أن الشعب مش منفوخ ولا هيطرشأ من الأنبساط بلأضافه الى خبور طويل بطول متر أو يزيد حسب طول المواطن لأستخدامه كسواك أو لأغراض أخرى ستعلمنا بها الست أعتدال نفخو ممثلة الحكومه تباعآ

خابور لكل مواطن منفوخ

وقد علمنا من مصادرنا المسطوله أن البالونه والخابور ليست أختياريه بل أجباريه وستقوم أعتدال نفخو بنشر قواتها فى أيام العيد بقيادة القائد الهمام بمب الدين حرب الحبش ناشر الفتن الطائفيه بين جموع شعب بهيه و سيقوم سيادته بالتأكد بنفسه

من أن كل مواطن يضع البالونه فى مكانها الصحيح ويرتدى الخابور

بخفه ومرح

تحــت شعار الشعب المنفوخ

=================================

وقد تبنت حركة العقلاء فى بهيه

حمله جديده ضد أعتدال نفخو والقائد بمب الدين حرب الحبش

والأفكار العنصريه والوهابيه

وذلك لأطفاء نار الفتن والأحتفاظ بالوطن متوحد و تحقيق مبدأ المواطنه لكل مواطن منفوخ وهى رفض الخابور ورفع شعار جديد فى كل أرجاء الوطن وكل ده عشان أحلى بهيه مفاده

كلنا جرجس وكلنا طه

من نسل بهيه
أنتهت الأخبار واليكم النشيد وبالطبع النشيد صاحبه مجهول

وقيل أنه متخلف عقليآ

من يقوله؟!
آخرتها بعد خمس و عشرين أنكسار..
وبعد خمس و عشرين انتحار..
اجمل شهادة!!
من يلاقي مثل تقديري
كويس فـ البلاده
أنا بليد

!!!

مع تحيات أوسه الصغيره جدآ ولا يجوز محاسبتها أو أقامة الحد عليها

نظرآ لحداثة فكرها قبل سنها

ولشعورها بالنفخه الكدابه

نياهاهاها

العيد فرخه

الشيخ وطنى والبنت نوويه

قرر الشيخ العجوز المدعو وطنى

أن يتزوج مره أخيره من عذراء شابه

علها تعيد له شبابه المفقود وتنقل شىء من صبابتها أليه

ذهب الى سوق الجوارى وهناك أشترى فتاه فى السادسة عشر ربيعآ

تدعى نوويه رافقها الى منزله وتزوجها

وأقام حفل عرس كبير لم يشهده أحد من قبل

وبعد المأدبه وتناول الطعام وأنصراف المدعوين

تناول قرص الشجاعه ليستعيد شىء من قوته

دعها لتشاركه مخدعه ثم تركها ليذهب لمستشفى أم المصريين

ليمارس رياضة التنفس الصناعى التى يعشقها

بينما جلست نوويه على طرف الفراش تلاعب دميتها الصغيره

وتهز قدميها فى فرح

تمـــــــت

القصه من سلسلة تخاريف أوسه تشيكوف فى رمضان

شر البلية مايضحك

أخبار بتوجع

ألرفيق ألفنان المناضل المثقف الثورى

تامر حسنى يتقاضا مليوووووون جنيه

نظير أحياؤه حفل فى خيمه رمضانيه

وذلك بعد عودته من الداخل

تامر مسكين قبل هذا الأجر الرمزى على مضض

أم تلقى بطفلها من الدور الرابع من مجمع التحرير

بعد رفض الموظفه أستلام الطفل وأيداعه ملجأ

بسبب عدم قدرة الأم على رعايته

الغريب أن الطفل قام من على الأرض وجرى على مامته

أيوه عارفه أن ده خبر قديم شويه

أب يعرض أولاده للبيع لعدم قدرته على ألأنفاق عليهم بعد طرده من عمله نقلآ عن جريدة المزجانجى

===================

مواطن مصرى يعرض كليته للبيع ومعاها بنكرياس هديه

====================

تزايد أنتحار خريــجى الجامعات بعد يأسهم من أيجاد فرصة عمل

وأنتظارهم أعوام فى ظل البطاله لعدم وجود واســطه وأسألوا

مركز السموم

====================

حتى الأن لم تستكمل مستشفى الأطفال للسرطان رغم التبرعات

الأجباريه والأختياريه

البلد رايــحـه فى داهيه نقلآ عن سبعين مليون مصرى وشويه

أمتحان التاريخ

كله يبص فى ورقته

أمتحان التاريخ للصف الأول

من المرحله التدوينيه

مدرسة أم المصريين المشتركه

أدارة حنفى التعليميه

زمن الأمتحان خمس دقائق

أقرأ أو أقرأى القطعة التاليه ثم أجب أو أجيبى عن الأسئله و فسر وعلل وهلل ملحوظه ممنوع الغش و البرشام أحنا فى رمضااااان

الأحتلال البريطانى لمصر أستمر حوالى سبعون عامآوذلك لأسباب سياسيه وأقتصاديه ورغم تعسف الأحتلال ومساوئه وتعرض الشعب للسحق خاصة فى حادثة دنشواى المشهوره الا أنه أقام بعض المشروعات كالصرف الصحى وأنشاء واحده من أكبر شبكات السكك الحديديه فى العالم والتى أصبحت بعد ذلك شبكه لربط المواطنين بمشرحة زينهم ومقابر المحروسه كذلك قام الأنجليز بتعليم المصريين كيفية نشر الغسيل وبعد زوال الأحتلال البريطانى ورحيله عن مصر بعدة سنوات تعرضت مصر للأحتلال المنوفى من ناحية شرق النيل الملوث

س أذكر أهم أنجازات هذه الأحتلال ومساوئه

س ماهى أسباب الحمله المنوفيه على مصر

سؤال صعب جدآ متى سينتهى هذه الأحتلال

ملحوظه الأجابه لا تقل عن سطر ولا تزيد عن خمس وعشرين سســس سطر

تقدم الأجابات مصحوبه بقرص حلاوه لأقرب قسم شرطه

شعارنا فى هذه المرحله الله الوطن حنفى

مع تحيات الست الناظره

رمضان كريم يا شعب

فوانبس فوانيس مصرى مش تقليد

رمـــضـــان كريم يا شعب البوجررريه

نشيل فوانيس رمضان

ونغنى ونقووول

وحوى وحوى إياحا

وكمان وحوى إياحا

بنت السلطان إياحا

لابسة قفطان إياحا

بالأخضرى إياحا

بالأصفرى إياحا

يا لمونى إياحا

يادوا عيونى إياحا

يارب خليلى سى عثمان

خاللى نينته سى عثمان

لولا سى عثمان لولا جينا يالا الغفار

ولا تعبنا رجلينا يالا الغفار

يحل كيسه ويدينا يالا الغفار

ويدينا ياما يدينا يالا الغفار

يدينا ميتين ريال يالا الغفار

نروح بيهم على بر الشام يالا الغفار

و نقــوووول كمان

على عليوة ياللى

ضرب الزُميرة ياللى

ضربها حربى ياللى

نطت فى قلبى ياللى

قلبى رصاص ياللى

أحمد رقاص ياللى

رقص على مين ياللى

على شاهين ياللى

وشاهين ما مات ياللى

خلف بنات ياللى

خلفهم متعة ياللى

وجبهم تسعة ياللى

وتحت النصبة ياللى

فاطمة قاعدة على مكنتها بتخيط بدلة دخلتها

يا رب تمم فرحتها بنت العزيز الغالى

لما حوينا لما جينا يالله الغفار

ولا تعبنا رجلينا يالله الغفار

يحل كيسه ويدينا يالله الغفار

يدينا ياما يدينا يالله الغفار

يدينا متين ريال يالله الغفار

نروح بهم على بر الشام يالله الغفار

نجيب رنيئى ومئيئى يالله الغفار

نجيب زئيئى العصفور يالله الغفار

اللى يكاكى فوق السور يالله الغفار

ادونا العادة يالله يخليك

ولبه وقلادة يالله يخليكو

الفانوس طقطق يالله يخليكو

والشمعة خلصت يالله يخليكو

ولذلك تقرر أن يحضر كل بلوجر فانوس للأشتراك فى مظاهرة كبيره

بالفوانيس ضد الفساد وتبدأ المظاهره من أمام بيت شهروزه

و تنتهى فى لاظوغلى والسحور على حساب أمن الدوله

وكل عام وأنتوااا بخير

الحل أيه

عاوزين نتجوز وأحد حنفنف وصلحــه

بعد دراسه مستفيضه لمشكلة العنوسه وشكوة بعض المواطنين من صعوبة الجواز اليومين دول وبعد اللى أقريته عندالزميله الخاطبه كلبوزه والزميله عاوزه أبقا عروسه / والعزيزه تمر حنه / قررت دراسة الموضوع والجلوس على طابلية المفاوضات مع الطرفين حنفى ياكبدى نفسه يتجوز بدل الصور اللى هو ملطعها فى أوضته وطول النهار نازل بوس فيها لما شفايفه أشفت وطول النهار واقف فى الشباك والرادار شغال يمكن يلمح دراع بنت و قاعد قدام التلفزيوون يمكن هيفا تعدى ولا نانسى تظهر وباليل يروح المولات يتمحك يمكن تفرج بموزه ولا حتى معزه أهو حاجه فيها الروح وبتتنفس والبنت مسكينه طول النهار تلعن الجواز وهى حاتموت على حنفى ماهى لها مشاعر برضه وغريزه أه صحيح أكتشفوا أن البنت بتشعر وبتحــس زى الولد تمام بس فى سرها عشان الفضايح

المهم الحل أيه

بعد معرفتى أن البنات ضعف عدد الشباب يعنى أتنين لواحد أن البنات تبطل أنزحه وتتعاون أزاى أقولكوا أولآ الراجل من حقوا يتجوز أربعه طيب نفاصل ونقول كفايه أتنين على أساس أن الراجل اللى له ودنين يشيلوه بنتين وبدل العريس والعروسه مايطلع عنيهم وعين باباهم وماماهم فى تكاليف الشقه والعفش والفرح يتم الأتى يتم تقسيم ألتكاليف على عدد تلاته بالحق والمستحق والمليان يصب على الفاضى والشقه كفايه غرفتين وصاله غرفه نوم فيها سرير بدورين وترتيب النوم حسب الحروف الأبجديه يعنى أحلام فى الدور اللى تحت ومنى فى الدور اللى فوق والعريس بقا يتنطط يوم تحت ويوم فوق ويوم الأجازه ينام فى الصاله يريح يعنى بدل ميوقع من طوله ولو جاب جاز يروح عند امه أهو ياخد ثواب ، والعيال يتكربسوا فى غرفه حتى فستان الفرح ممكن يتأجر وكل واحده تلبسه تتصور بيه وياريت البنتين يكونو صحاب عشان الخناق والغيره و يتعاونوا على سعادة حنفى أو بهدلته حسب مايتفقوا وما فيش أحسن من أستمرار الصداقه بين البنات ولما تفرج بقا ويعملوا فلوس موووت ياحمار يشتروا شقه أكبر وينتشروا فيها

فى أنتظار تعليقاتكم و وسعوا خيالكم كده يعنى بلاش وجع قلب يمكن تفرج

كلـــــــنا ليلى_ حنفى يتحدى ليلى

;


ليــــلى و حنـــــفى

ليلى هى كل بنت مصريه بتبنى وتعليى فى المجتمع اللى بيحكمه راجل من نوعية حنفى

حنفى يصحا كل يوم الصبح يتاوب ويفرك فى مناخيره ويقعد على الطبليه مستنى الرضعه ياخد الرضعه

ويقوم يروح شغله وهو راسم على وشه أبتسامه كبيره أد كـــــــــــــــــــــــــده ويقضى يومه سعيد وليلى تجرى

على المواصلات عشان تلحق شغلها وطبعآ فى الطريق تتبهدل من ألف حنفى و حنفى

وفى الشغل متسلمش من رزالة زمايل من نوعية حنفى لغاية ميعاد المرواح تبدأ رحلتها مع سواق أسمه حنفى

معندوش أى رحمه وقاعد شمالها واحد أسمه حنفى برضه عمال يميل يمين وشمال وكل ماتبصله يعمل حنفى

تعدى على السوق تشيل فوق قلبها لوازم ألبيت وترجع توقف فى المطبخ تحضر الغدا وهى بتدعى ربنا

أن حنفى يتأخر وتستقبل ولادها وهم راجعين من مدارسهم بحب وفرحه

أنما حنفى أول مايخلص شغل ورزاله على خلق الله يروح شايل ألأبتسامه الماسخه وحاطط مكانها لوية بــوز أد كـــــــــــــــــــــــــــــــــده ، أول مايدخل ينادى على ليلى فين الطفح لا سأل عامله أيه ولا أيه أخبار العيال

ولا عنده فكره البيت ماشى أزاى ومن الأكل للنوم للقهوه أو التلفزيون و ليلى مسؤله عن البيت والعيال ومذكراتهم ونجاحهم وسقوطهم وكمان وراها شغلها وياسلام لو ليلى تفوقت عن حنفى فى شغلها طبعا الغيره والحقد

الأسود المد فون يظهر ويدور على أى حجه عشان يعكنن عليها ويشوه صورة نجاحها ولو طال يقعدها

من الشغل ياريت بس حنفى عينه على القرشينات ماهو راجل حنفى بقا وليلة الخميس الليله الموعوده

يدخل بعرقه ورريحته مفحوته سجاير و واخد حباية شجاعه ونفس رجوله ويطالب بحقه الشرعى

ولو قالت تعبانه يعمل مظاهره ويسلام بقا لو عندها الدورة الشهريه حنفى يتعكـــنــن ويبقا أخر قرف منها كأنها

مريضه بالجرب وممكن تعديه طيب ربنا خلقها كده ودى حاجه مش بأيدها ولا برجلها وللأسف معظم الرجاله

من نوعية حنفى وللى مش عارف حنفى يبقا مش مذاكر تاريخ لان التاريخ طول الوقت بيتكلم عن حنفى اللى سوى الهوايل ومع أول مشكله يعمل نفسه مش واخد باله ورامى حمولته على ليلى اللى ربت وعلمت وسهرت وأشتغلت

و داوت وطبطبت و أتعذبت عشان بكره يجى أحلى من امبارح ومع كل طلعة شمس تصحى وتصحى معاها أحلامها وتنفض امبارح بمرارته و أسوته عشان المركب تمشى والبنا يعلى ويعلى

وفى النهايه تفضل هى ليلى ويفضل هو حنفى

السؤال أمتى حنفى يبقا أى حاجه حلوه غير حنفى

التوقيع ليلى الأم والأخت والصديقه والحبيبه والأبنه

المدونه الأم تحت أهى بص يافندى

http://laila-eg.blogspot.com/

هل أنت متــكوكــع

عزيزتى المستمعه عزيزى المشاهد هل أنت مريض بداء الكوكعه

أولآ مكوكع جيه من القوقعه وهى الحبس الفردى لمدة تزيد عن خماشر يوم مع التجديد داخل الكوكعه الأفتراضيه اللى هى عالم البلوجررررريه أرجو الأهتمام بالموضوع ده عشان مكلفنى دم قلبى يعنى تلات فناجين بن وأربع سجاير فرت المهم أنا عملت بحث على مجموعه عشوائيه من البلوجريه من مختلف أنحاء العالم وأشترك معايا ناس حبايبى كده ميتخيروش عنكم منهم على سبيل المساس لا الححصى الأخ العزيز صاحب الأبتسامه الهاديه سيجمان فرويد وجاب معاه منخل نمساوى عشان نحلل بيه الكركترات وألفيلسوف اللى ربنا يديله على أد نيته ديكارت اللى ركب أول ميكروباز طالع من فرنسا لعماد الدين و حبيبنا داروين الله يهده بتاع الأنسان أصله مانكى وجايب فى أيده الواد مايكل جاكسوس يستشهد بسحنته بصراحه خليته يغنيلى أغنية زى أيرث وبعدين روحت طرداه بره المعمل وضرباه قفا على سهوه ، أيوه المعمل مهو أنا كيميائيه أساسآ حتى أسألوا شهرزاد / وسوسه المفروسه المهم

توصلنا للأتى

هل أول ماتصحى من النوم بطير على الكمبيوتر عشان تشوف فى أيه

أول مابتروح شغلك بتفتح بلوجك وبوقك وتديها فى الخباسه تدويــنــتــش

هل أهملت حياتك الأجتماعيه بعد معرفتك بعالم التدوينتش

عند مقابلتك للبنت بتاعتك أو الواد بتاعك بتكلى ودنه كلام عن التدوينتش

وأنت بعيد فى المصيف كنت بتفكر فى البلوج بتاعك وبتقول ياريتنى قعدت فى البيت

وأنت نايم بتحلم بيا أقصد بالتدوين والمدونين

فاضح الدنيا عن موضوع التدوين لما الناس نفسها تولع فيك

بتقضى كل يوم أكتر من أربع ساعات رايح جى بين المدونات لما دوخت وفرفرت

نفسك كل صحابك يعملوا بلوجز وتقلبوها شاتس

بقالك أسبوع مختش شاور لما ريحتك فاحت والسكان أشتكوا

لو أجابتك نعم على خمس أسأله فأقل أطمن فى وقت تعيش

لو أجابتك نعم على ست أسئله فأزيد يبقا يؤسفنى أبلغك أنك عندك مررررض الكوكعه ومحتاج علاج سريع أو تدخل جراحى حاول تحدد يوم فى الأسبوع تمتنع فيه عن تعاطى أى أنترنت بالتدريج حاول تقلل عدد الساعات للمعدل الطبيعى وهو ساعتين الا ربع يوميآ

حاول تخرج بره وتقابل الناس و مع الوقت هاتبدأ تستمتع

ولما تكون مع حبايبك ياريت تحط بلاستر على بوقك مش ناقصه نفخ

لو مفيش تحسن فى حالتك أرجو التوجه لعيادة الدكتوره أوسه

العنوان القصر العينى الدور التاسع عنبر الكحه

فيما عدا الخميس والجمعه عندى غسيل وتنفيض

العواف

الملك شنديد

ومن روائع الأدب العالمى

الأديبه أوسه تشيكوف

تقدم

الملك شنــــــديـــد

ذو العمر

المـــــــــــــــديــــــــــــــــــــد

يحكى أنه فى الزمن البعيد كان يعيش ملك عنيد يدعى شنديد حكم البلاد سنين وسنين بطول المسافه من أسوان الى بورسعيد و فى عهده شاخ

الشباب وأمتلأت الزنازين بدم العبيد فكرهه الناس صغار وكبار

شيخ و وليد ففكر شنديد بعقل غير رشيد كيف يقوم بعمل فريد فجمع شنديد الكهنه والموالين وسألهم التفكير خوفا أن ينساه التاريخ

أشعل الكهنه البخور وفكروا فى حل يريح شنديدويكفيهم شر الأنتقام والوعيد فقد سبقه ملكان نقشوا أسمائهما فى جبــين التاريخ

حملوا ألافكار وتوجهوا لقصر ملكهم الرعديد قال كاهن أيها الشنديد لما لا نبنى سد منيع كما فعل ملك سابق يمنع الفيضان ويمنع الطين وبينما هناك سد فى الجنوب فلنبنى أخر فى الشمال فيمنع سقوط المياه فى البحر فترتد ونحصر المياه بين السديين فيتحول النهر الى بركة وتزيد المياه بالخير الوفير فشــخر شنديد فى الجمع الغفير وقال فكر غير سديد فكيف لى بالبناء بعد أن أستدنت من كل البلاد

فقال كاهن أخر أيها الشنديد لن يخلدك التاريخ بغير حرب وقتال شديد فعلى صوت شنديد وقال ياروح أمك متنساش أن هناك تطبيع مع العدو الوضيع وبعدين أنا كبيرى ألعب بولينج أو أعتقل الشعب لو فكر يتاوب فوقف كاهن يدعى الوزير أشتهر بالسفاح فقد جلب للبلاد سرطان وأمراض وله فكر مضادأيها الشنديد نحن ضائعين ولسنا صناعيين ولا حرفيين فماقولك فى الزراعه وهى صنعتى وحرفتى فلنزيد رقعة الأرض الزراعيه بلمسة سحريه ونتوجه للجنوب ونغير معالم الصحراء ونخضر الرمال ونقيم مشروع فريد فأبتسم الشنديد وتسأل ولكن الملك السابق أستعان بخبرات من الهكسوس وأفادوا بعدم جوازالمشروع وأقرار الموضوع فتكلفته تفوق وطبيعة الأرض تعوق ولن نكسب منه أرباح ولن يستفيد منه الشعب المعوق فقال الوزير المشروع يحتاج وقت طويل والشعب عويل وبلأحرى عبيط ولايعرف أحد متى يفيق وياترى من يعيش وتم بالفعل المشروع وسعد الشعب وفرح شنيد فالأرض مختلفه عن غيرها فلو قمت بزراعتها خيار تطرح ممبار وتكلف المشروع الكثير وغرق الشعب فى الدين وزادت الأمراض والبطاله وعاش شنديد عمر طويل ورغم المشروع سقط سهوا من التاريخ وأستيقظ الديك المريض وصرخ فى الفجر ليوقظ النيام وصرخ وبكا والكل فى ثبات عميق
ملحوظه الفكره من الخيال منعا للقيل والقال وأحتمالية الأعتقال أوسه الجبانه

شعوب منبطحه

أنبطاح نفسى

أسدكائى سديكاتى محادرة النهارده حول ظاهرة الأبنبطاح السياسى والنفسى والأجتماعى وكلها مواضيع منفصله ومتصله برضه يعنى بنظره موضوعية على طبيعة العلاقات بين الدول وشعوبها من ناحيه وبين طبيعة العلاقة بين الرجل والمراءة فى مجتمعاتنا المستهويه وعلاقة الأنسان المحاصر ســورى المعاصر بذاته هنلاقى أن جميعها يخضع لنظرية الأنبطاح لو بدانا بالشعوب المنبطحه حنلاحظ مع بعض أن فيه شعوب طول الوقت مصدره العبيط يعنى ملهاش علاقه أو دور فى الحراك السياسى الداخلى وعدم تبنى أهداف على المستوى الداخلى والرغبه فى تحقيقها أو عدم وجود رغبه فى التعاطى مع المشاكل الداخليه والسياسيه بدعوى الخوف أو بأدعاء عدم الفهم كذلك الدول المنبطحه وده حال معظم الدول العربيه يعنى الدنيا تنقلب رأس على عقب والعالم بيتغير و شعوب بتقرر مصيرها ومصير غيرها وبتتحكم فيها وهى فاتحه بوقها ومدلدله ودانها وعملا تلاهى ولا بتسمع ولابتشوف وكاتما على نفس شعوبها وعايشه فى دور الست المستحيه تسمع كلام دوله تانيه وتقولها حادر تحت شعار ألأدب فضلوه عن العلم وأساسآ مفيش لا أدب ولا علم ويوم متفكر تتفاعل مع الخارج تقلبها سياسة أنفتاح وتعرى نفسها وتغرق نفسها فى الديون وتتجه بس للأستيراد شوية بندق على عين جمل وشغال وتنسا أن سياسة أم شاديه بتــقول هات وخد تفضل تاخد تاخد لحد لم يجلها تخمه، و تفرج على نفسها الدول الصديقه والعدوه أما عن علاقة الرجل بالست فمبنيه على الأنبطاح يعنى طرف منبطح للطرف التانى وسايــبله الحبل وبعدين يرجع يشتكى يعنى كده مفيش نديه فى التعامل ولا أحترام وناس عايشه وخلاص وضل حنفى ولاضل حيطه وعيال بتــتولد راضعه أنبطاح تسمع كلام مــس لواحظ صح غلط مش مهم اما الأنبطاح الذاتى وهو أخطر الأنواع فهو مرض نفسى توصلت أليه من خلال أبحاثى المعمليه وهو مزيج من مرض الفوبيا ومرض الاكتئاب يخلى صاحبه منبطح جوه نفسه طول الوقت وعايش فى حاله رعب وخوف والكل يلطش فيه بالنهار ، وهو يلطش فى روحه بالليل قبل ماينام بأنه يفضل يفتكر أيه اللى حصله ويفضل ينكد على روحه لحد لما الديك يقول كوكوكو ،والانبطاح مرض يمكن علاجه على جميع المستويات المهم النيه تكون خالصه كده وبداية العلاج أن الناس تبطل خوف وتبطل أنهزام وتبطل سجاير لو لزم الأمر والتــحول من حالة الأنبطاح الى حالة التفاعل والحراك بيحتاج تــغــير فى الطبائع يعنى بيحتاج وقت يجى تــلت تيام كده المهم كفايه كده عليكوا بلاش أطول عليكوا عشان مـتــنموش منى فى السكه وفى أنتظار تليفوناتكم وأى أسئله يا شعب

الأميره أوسا أتنين دكتوراه فى علم النفس والسياسه

أول مصريه تحوز على جايزة نوفــل للعلوم

أنت تدون أذن أنت مــفــقوع

علامةأستفهام

دى مش أسئله ده أمتحان لا دى توريطه من أبيتاف

ومعلش كان لابد من القيام بتغيير فى صيغة أحد الأسئله

بصوا ياشاطرين ده أمتحان بجد كلبوزه هاتوزع عليكم ورق الأسئله وبطابيط هانم هتوزع عليكم حلبسه وكل واحد يطلع خمسه جنيه تمن الحلبسه ومن زمااان هيللم الفلوس عشان مزنوق فى قرشين .. وياريت كل واحد يبص فى ورقة أجابة اللى جنبه واللى عاوز يولع سوجاره يولع براحته ولو حد مش لاقى مكان يقعد فيه ممكن يقعد على حجر زميله أو زميلته أهى زى خالته ساعوا بعض أخرتكوا قربت

س هل أنت منشكح من مدونتك شكلاً وموضوعاً؟

صراحه هى لسه تحت التطوير وعلى العموم رضا أحنا هننهب ده لحد من شهرين كان كبيرى شات

س هل تعلم أسرتك الصغيرة بأمر مدونتك؟

طبعا لأ هى ناقصه كلاكيع وعقد وبتــنجان

س هل تجد حرجآً فى أن تخبر صديقاً عن مدونتك؟

لا مفيش حرج خاصة أنى لا أستخدم أى ألفاظ بزيئه أنا بريئه يا بيه

س هل تعتبرها أمرا خاصا بك؟

طبعا هى دى الفسحه بتاعتى ومن حقى أبــعــبر

س هل تسببت
المدونات بتغيير إيجابى لأفكارك؟ فلسعنى مثال
فى حالة الاجابة بنعم

نعم نعم تعرفت على أفكار جديده وأنفعلت معها ولكن صدمنى وجود بعض المـتـناقدات

عند البعض كذلك وجدت ناس مثبطه للهمم بيستكتروا علينا الكلام ويقولك الكلام مامنوش فايده

بصراحه مستغرباهم جدآ يعنى صمتهم هو اللى مؤثرعندك الصهاينه سلاحهم الأول الأعلام والدعايه

والشعب هناك بيستخدموا المدونات فى نشر أفكارهم و البعض هنا عامل حنفى

س هل تكتفى
بفتح صفحات من يعقبون بردود فى مدونتك أم تسعى لاكتشاف المزيد؟

من فتره طويله وأنا بتابع المدونين وبسيب تعليق رغم أن مكنش عندى مدونه

يعنى الأفضل أن الواحدة تقرا أكتر ما تكتب وتتعرف على الآخر هو مين الآخر ده

س ماذا يعنى لك عداد الزوار.. هل تهتم بوضعه فى مدونتك؟

طبعا مفيش أحسن من حب الناس ومافيش أحسن من لبن الأم

س هل حاولت تخيل سحنة اصدقائك المدونين؟

ممكن تعرف أى كائن كان من أسلوبه يعنى مثلا مكسوفه هانم كانت وهى فى العشرينات موزه موزه

لكن مع الجواز والخلفه أتغيرت شويه بس مازالت برضه حرشه وفيها الطمع

هل ترى فائدة حقيقية للتدوين؟

طبعا أنا أدون أذن أنا مفقوع ومطحون

والتدوين بعتبره فضفضه بتغـنى عن الذهاب للدكتور النفسى

س هل تشعر
أن مجتمع المدونين مجتمع منفصل عن العالم المحيط بك أم متفاعل مع احداثه؟

متفاعل ومعبر عن راى الشارع المصرى ولو امتلك كل الناس الأدوات اللازمه لعمل مدونه

لتضاعف عدد المدونين بس للأسف بلد فقريه والمواطن المصرى مش واخد حقه

س هل يزعجك وجود نقد بمدونتك ؟ أم تشعر انه ظاهرة وأدوات صحية؟

أى نقد بناء ومبنى على وجهة نظر ومدعم بفكر جيد وفلسفه خاصة بأحترمه

وأى نقد لمجرد النقد والسفسطه بأقوله أحــه ولامؤاخذه

س هل تخاف من
بعض المدونات التى تفتح تابوهات السياسه و الجنس و الدين وتتحاشاها؟

أنا من أكتر زوار مدونة علاء ومنال وألسياسه والجنس أمور هامه منقدرش نديها

ضهرنا يا حوكشه أما الدين فهو شىء خاص جدا قابل للتناول فقط فى المسجد والكنيسه

س هل صدمك اعتقال بعض المدونين؟

لا طبعا متصدمتش أى حاجه فى مصر عادى ضرب قاضى ـ صحفى أو أعتقال مدون

أو هتك عرض فتاه أوسيده متوقع أحنا فى حالة أستعمار

س هل فكرت فى مصير مدونتك حال وفاتك؟

بعد الشر عليا يا فقرى
آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟

حدوته مصريه لمحمد منير عاشق النيل

أكتب اسماء خمسة
مدونين ليقوموا بهذا الاستقصاء بعدك خمسة بس؟؟؟

مش هاكتب حريتى هنا تتوقف عند حرية الأخرين ومقدرش أفرض رأى

على حد بصراحه الموضوع اللى أقترحته أبيتاف عجبنى جدا فبالتالى كتبت

شكرا لكل من ساهم فى هذا العمل وأرجو أرسال قرش حشيش

حاجات بحبها مووووت

I love it So much

حاجات بحبها

كل البنات كتبت عن الحاجات اللى بتسعدها بناء على نصيحة جدو

وأنا كمان أشمعنا أبيتاف عشان عسوله و حلوه وبحبها وخطها حلو فى الأنجليزى

أه بالمناسبه شوفــتوا الفضايح اللى أنا فيها فيونكه حمرا مش كتبت بوست عنى

وفرجت عليا البشريه جمعاء وسيرتى على كل لسان أينعم مفهمتش هى بتقول أيه

بس قلبى بيقولى ده كلام كوخه عيب يعنى ياريت حد يقرا كلامها وبعدين يبقا يوشوشنى على جمب

وهى كالأتى

ظاهرة خالتي وخالتك واتفرقوا الخالات

في ظل العولمه وما يستتر تحت قناع الواجب والمعرفه تاهت بل تبددت الكثير من المعاني

واصبحت اجدها في تكوين فضوي يمثل لي ...نقطة ارتكازي علي هذا العالم الافتراضي

الذي طالما قررت الاقلاع عن تعاطيه اوقعتني الايام في صفحة الدرافت

دون ان اري................................................عن ظاهرة خالتي وخالتك

واتفرقوا الخالات اكتب بكعوب عاليه

اهدرتها نزوات ربه ..ــــــــــــــــــــــــــــــــــــــــبعد الرجوع خرجت باكتشاف جديد

هي الاميره اوســــــــــــــــــــــــــــــــــــه....بجد اهلا بكي علي ارض التدوين

...نورتي هذا العالم الافتراضي بلوكك الجديد لعل المدونات الان اصبحت تشبه الي حد كبير السينما

....تتعدد الافلام فيها وتتنوع ويكثر الممثلون وتختلف شخصيلتهم وتهبط افلام وتصعد افلام ....

وفي الاخر السينما ليست بحاله جيده ولا حتي دون الجيده..دا مش اساءه فيكي

انتي اهلا بيكي علي ارض التدوين .... التي شابهت السنما في تكرار اعملها وابتذالها......انما دي بواخه علي هذا العالم الافتراضيـــــــــــــــــــــــــــــــــــــــــــ فالنتينا فيونكه ماركسيه حمراااااااااااااااااااااااااااااااااااااااااااااا

أنتهى

كعوب عاليه تبقا شتيمه

هى دى شتيمه يا كابتن

عم حنفى هو الكلام ده هجاء ولا حبشتكنات

خالتى سكسكه أطلعى شويه فوق*** ألكلام ده معنته أيه سجع ده ولا برد

ولو شعر يبقا القصيده بتاعت فيونكه حمره أيه؟

أيه فى المقرر حفظ يعنى ولا نظر

يالهوووووووووووى

ألحقووووووووونى

أنا الظاهر فيونكه زميلتى فى الزنزانه بتسيحلى

ماعلينا خلينا فى موضوعنا
أيوه الحاجات اللى بتسعدنى أحممم أحممم أصلى بسلك البلعوم

لما بشوف أفلام رعب خاصة فيلم دراكولا بيفكرنى بواحد أعرفه

لما أشوف خناقه فى الشارع

لما شاب يبعاكسنى فى الشارع بتبسط بيه أأوى

لما حد بيهدينى طبق مومبار حاجه شبه المحشى كده

لما بيجيلى ميسد كوول من حد متوفــى

لما أسمع عن واحده ضربت جوزها بقعد أهللل

لما أعمل مقلب فى حد بحبه ويطلع من عينيه

لما أتــلــم أنا والبنات صحباتى وندديها نميمه

لما أسمع السلام الجمهورى اليومين دول بديها هرتله

لما أشوف راجل أفندى بيكلم نفسه فى الموبيل وباصص نحيتى

لما أكون واقفه فى المطبخ بعمل لازنيا أو بشوى دره

لما باروح البحر وأسمع واحد بيقول الحقووونى والكل مطنش

لما أتفرج على العاشره مساء وأشوف منى الشازلى

لما أشوف حمدى قنديل بحس أنى عايزه أبوسه

لما أشوف حبيبى اللى عرفنى موضوع التدوين هو عارف نفسه

لما اروح فرح وتحصل خناقه أديها زغاريد على طول

لما أشوف فيلم لزينات صدقى كتاكيتو بنى

لما الشوباب فى المواصلات يقوموا ويقعدونى وأنا أقول ميرسي و عامله مكسوفه

لما الكهربا تقطع فى الشغل هييه مفيش أحلى من التــنبله

لما حد يسيب تعليق كويس

وأزعل أوى من التعليقات الوحشه

واخدين بالكوا بازعل وممكن أولع فى الكمبيوتر

ياريت بقا حد يسمعنا سبعه كيبورد ومسافه

واللى زعلان يعمل أسكيب

Escape